ຂປລ
ຂປລ. ໃນວັນທີ 30 ກັນຍາ 2019 ທີ່ຫ້ອງວ່າການສໍານັກງານ ນາຍົກລັດຖະມົນຕີ, ທ່ານ ເພັດ ພົມພິພັກ ລັດຖະມົນຕີ, ຫົວຫນ້າຫ້ອງວ່າການສຳນັກງານ ນາຍົກລັດຖະມົນຕີ ໄດ້ຕາງໜ້າລັດຖະບານ ຮັບເງິນຊ່ວຍເຫລືອຜູ້ປະສົບໄພນໍ້າຖ້ວມ ຈາກກຸ່ມບໍລິສັດ ຄຳໄພຊະນະ ຈຳນວນ 200 ລ້ານກີບ
ຂປລ. ໃນວັນທີ 30 ກັນຍາ 2019 ທີ່ຫ້ອງວ່າການສໍານັກງານ ນາຍົກລັດຖະມົນຕີ, ທ່ານ ເພັດ ພົມພິພັກ ລັດຖະມົນຕີ, ຫົວຫນ້າຫ້ອງວ່າການສຳນັກງານ ນາຍົກລັດຖະມົນຕີ ໄດ້ຕາງໜ້າລັດຖະບານ ຮັບເງິນຊ່ວຍເຫລືອຜູ້ປະສົບໄພນໍ້າຖ້ວມ ຈາກກຸ່ມບໍລິສັດ ຄຳໄພຊະນະ ຈຳນວນ 200 ລ້ານກີບ ເພື່ອນໍາໄປຊ່ວຍເຫລືອ ແລະ ມອບໃຫ້ບັນດາແຂວງທີ່ຖືກກະທົບ ຈາກໄພພິບັດນໍ້າຖ້ວມຢູ່ພາກກາງ ແລະ ພາກໃຕ້ຂອງລາວ ຕາງໜ້າມອບໂດຍ ທ່ານ ຄຳໄພ ສົມຊະນະ ປະທານກຸ່ມບໍລິສັດ ຄຳໄພຊະນະ ໂດຍມີພະນັກ ງານທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ບໍລິສັດດັ່ງ ກ່າວ ທີ່ໄດ້ນຳເອົາເງິນມາມອບ ເພື່ອຊ່ວຍເຫລືອຜູ້ປະສົບໄພນໍ້າຖ້ວມໃນຄັ້ງນີ້, ເຊິ່ງເງິນຊ່ວຍເຫລືອດັ່ງກ່າວ ແມ່ນຈະໄດ້ນຳໄປມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍ ເຫລືອບັນເທົາທຸກ ແກ່ຜູ້ປະສົບໄພນໍ້າຖ້ວມໃນປີນີ້, ເຊິ່ງການຊ່ວຍເຫລືອດັ່ງກ່າວ ຈະເປັນກຳລັງໃຈໃຫ້ແກ່ປະຊາຊົນ ແລະ ປະກອບສ່ວນເຮັດໃຫ້ການແກ້ໄຂ ແລະ ຟື້ນຟູ ຊີວິດການເປັນຢູ່ຂອງຜູ້ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ ສາມາດຜ່ານພົ້ນຄວາມຫຍຸ້ງຍາກ ແລະ ກັບຄືນສູ່ສະພາບປົກກະຕິໂດຍໄວ.
ໃນໄລຍະຜ່ານມາໄດ້ມີຫລາຍພາກສ່ວນ ທີ່ໄດ້ນຳເອົາເງິນມາປະກອບສ່ວນຊ່ວຍເຫລືອ ຜູ້ປະສົບໄພນ້ຳຖ້ວມ ໂດຍຜ່ານ ຫ້ອງວ່າການສຳນັກງານ ນາຍົກລັດຖະມົນຕີ ປະມານ 17 ຕື້ກວ່າກີບ. ນອກຈາກນີ້ ຍັງມີຜູ້ປະກອບສ່ວນເປັນເຄື່ອງ ອຸປະໂພກ-ບໍລິໂພກເປັນຈຳນວນຫລວງ ແລະ ກໍໄດ້ນຳເອົາວັດຖຸອຸປະກອນ ແລະ ເຄື່ອງຊ່ວຍເຫລືອດັ່ງກ່າວ ໄປມອບໃຫ້ປະຊາຊົນຜູ້ທີ່ໄດ້ຮັບ ຜົນກະທົບຈາກໄພ ນ້ຳຖ້ວມ ດັ່ງກ່າວແລ້ວ, ແຕ່ກໍຍັງບໍ່ທັນພຽງພໍ ກັບຄວາມຕ້ອງການ ຂອງພໍ່ແມ່ປະຊາຊົນເປັນຕົ້ນ ເຕັ້ນພັກເຊົາຊົ່ວຄາວ, ເຄື່ອງອຸປະ ໂພກ-ບໍລິໂພກ, ເຂົ້າສານ, ອາຫານ, ນໍ້າດື່ມ-ນ້ຳສະອາດໃຊ້, ເຄື່ອງໃຊ້ຄົວເຮືອນ, ເຄື່ອງນອນ, ຢາປົວພະຍາດຕ່າງໆ ເພື່ອມາຮັບໃຊ້ໃນຊີວິດປະຈຳວັນ.
ຂ່າວ: ມະນີທອນ, ພາບ: ເກດສະໜາ
KPL
