ຂປລ. ໃນວັນທີ 1 ກໍລະກົດ 2019, ມູນນິທິ ປີແອຣຟາເບຼີ ( Pierre Fabre ) ຮ່ວມກັບອົງການ ມະຫາວິທະຍາໄລ ທີ່ໃຊ້ພາສາຝຣັ່ງ (AUF) ໄດ້ຈັດການ ຖ່າຍທອດສົດ ກອງປະຊຸມ ສາກົນ ທາງໄກປະຈໍາປີ ຜ່ານລະບົບ ວີດີໂອສຕຣິມມິງ ທີ່ໄດ້ເຜີຍແຜ່ໄປ ທົ່ວໂລກ ເປັນປີທີ 4 ຕິດຕໍ່ກັນທີ່ສູນຂໍ້ມູນຂ່າວ ສານຝຣັ່ງໂກໂຟນວຽງຈັນ (CNF), ມະຫາວິທະຍາໄລ ແຫ່ງຊາດລາວ ພາຍໃຕ້ຫົວຂໍ້ ການຫັນປ່ຽນຍຸດທະສາດສຸຂະພາບ ເພື່ອປະໂຫຍດ ຂອງທຸກໆຄົນ ຈາກການ ສ້າງຄວາມເຂັ້ມແຂງ ດ້ານທັກສະ ດ້ານສຸຂະພາບ ໃນຮູບແບບດິຈິຕອນ ແລະ ການກໍ່ສ້າງ ລະບົບຂໍ້ມູນ ທີ່ມີປະສິດທິພາບ ເພື່ອຕິດຕາມ ແລະ ຮັບຊົມຈາກ 15 ວິທະຍາເຂດ ດິຈິຕອນ ຂອງອົງການ AUF ໃນທົ່ວໂລກ.

ຈຸດປະສົງ ຂອງການຊົມ ຖ່າຍທອດສົດ ຄັ້ງນີ້, ເພື່ອເປີດໂອກາດ ໃຫ້ນັກສຶກສາ, ຄູອາຈານ ແລະ ຜູ້ຊ່ຽວຊານ ໄດ້ມີການຕິດຕາມ ການໂຕ້ວາທີ ໃນກອງປະຊຸມ ດັ່ງກ່າວ, ເພື່ອແບ່ງປັນ ຄວາມຮູ້, ປະສົບການ ພາກສະໜາມ ແລະ ຊ່ວຍສ້າງ ການແລກປ່ຽນ ແບບຈໍາລອງ ຫລື ແບບຈິງ, ລະຫວ່າງຜູ້ທີ່ກ່ຽວ ຂ້ອງ ແລະ ຄູ່ຮ່ວມງານ ທີ່ມີທ່າແຮງ ຂອງລະບົບ ນິເວດສຸຂະພາບ. ໂດຍໄດ້ເຕົ້າໂຮມ ເອົາບັນດາຊ່ຽວ ຊານສາກົນ ແລະ ຜູ້ທີ່ຢູ່ເບື້ອງຫລັງ ຂອງໂຄງການຕ່າງໆ, ບັນດາຜູ້ຕາງໜ້າ ຈາກອົງການຈັດຕັ້ງສາກົນ, ກະຊວງຕ່າງໆ, ອົງການທີ່ບໍ່ຂຶ້ນກັບ ລັດຖະບານ, ບັນດາໜ່ວຍງານ ແລະ ບໍລິສັດທີ່ເຄື່ອນໄຫວໃນຂົງ ເຂດສຸຂະພາບເຂົ້າຮ່ວມ. ສ່ວນຢູ່ລາວເຮົາ ມີບັນດານັກສຶກສາ ຈາກມະຫາວິທະຍາໄລ ວິທະຍາສາດສຸຂະພາບ, ມີບັນດາຜູ້ຕາງໜ້າສະຖາບັນຄົ້ນຄວ້າ ແລະ ວິໄຈສາກົນຕ່າງໆ ປະຈຳລາວ ແລະ ນັກຄົ້ນຄວ້າ ໃນຂົງເຂດການແພດ ກໍ່ໄດ້ໃຫ້ກຽດເຂົ້າຮ່ວມ ໃນກອງປະຊຸມ ທາງໄກໃນຄັ້ງນີ້. ນັບແຕ່ປີ 2000, ບັນດາປະເທດທີ່ມີລາຍໄດ້ຕ່ຳ ແລະ ປານກາງ ແມ່ນເຫັນດີຮັບຮອງເອົາເຕັກໂນໂລຢີໂດຍສະເພາະເຕັກໂນໂລຊີມືຖື. ໃນຂະນະທີ່ ການເຂົ້າເຖິງ ການຮັກສາສຸຂະພາບ ຍັງເປັນຄວາມກັງວົນທີ່ສໍາຄັນ, ການນໍາໃຊ້ ເຄື່ອງມື ສຸຂະພາບ ທາງດ້ານ ອີເລັກໂທຣນິກ ທີ່ຢູ່ໃນຈຸດຂະໜານ ຂອງເຕັກໂນໂລຊີ ຂໍ້ມູນຂ່າວສານ ແລະ ການສື່ສານ (ICT) ແລະ ການເບິ່ງແຍງດູແລຮັກສາ ກໍແມ່ນລວມຢູ່ໃນຫົວຂໍ້ນີ້.

ອີງຕາມອົງການອະນາໄມໂລກ, ນະວັດຕະກຳແບບດິຈິຕອນ ມີທ່າແຮງ ທີ່ຈະປະກອບສ່ວນ ກັບເປົ້າໝາຍ ຂອງການຄຸ້ມຄອງ ສຸຂະພາບໃນທົ່ວໂລກ. ເຖິງຢ່າງໃດກໍ່ດີ, ຂ່າວສານ ອີເລັກໂຕຣນິກ ດ້ານສຸຂະພາບ ສາມາດ ເອົາຊະນະ ອຸປະສັກ ບາງຢ່າງ ເຊັ່ນ: ຄ່າໃຊ້ຈ່າຍ, ການເຂົ້າເຖິງ ຫລື ຂາດການເບິ່ງ ແຍງດູແລທີ່ມີຄຸນນະພາບ ແລະ ການຂະຫຍາຍຂອບເຂດ ຂອງການບໍລິການທີ່ສະໜອງໃຫ້.

ຂ່າວ-ພາບ: ມະນີທອນ

KPL