ແກ້ງເຊລະນອງ ບ້ານຕະຫລຸງ ເມືອງຕະໂອ້ຍ ຍິນດີຕ້ອນຮັບນັກທ່ອງທ່ຽວທຸກທ່ານໃນໄລຍະບຸນປີໃໝ່ລາວ
ຂປລ. ແກ້ງເຊລະນອງ ບ້ານຕະຫລຸງ ເມືອງຕະໂອ້ຍ ແຂວງສາລະວັນ ກຽມພ້ອມຕ້ອນຮັບນັກທ່ອງທ່ຽວດ້ວຍຄວາມອົບອຸ່ນ ແລະ ເປັນກັນເອງ ໂດຍໄດ້ພາກັນປຸກຕູບກາງນໍ້າ ຫລາຍກວ່າ 10 ຕູບ ເພື່ອໃຫ້ເປັນບ່ອນພັກຜ່ອນ, ກິນເຂົ້າ, ນັ່ງຫລິ້ນ ແລະ ແຊ່ນໍ້າເຢັນໆ ທ່າມກາງທໍາມະຊາດທີ່ສວຍງາມ ຊຶ່ງສະຖານທີ່ທ່ອງທ່ຽວແຫ່ງນີ້ ເໝາະສໍາລັບການມາທ່ຽວແບບຄອບຄົວ ຫລື ພາໝູ່ຄູ່ມາເປັນທີມ ເພື່ອຜ່ອນຄາຍຮ້ອນ ແລະ ສະເຫລີມສະຫລອງບຸນປີໃໝ່ລາວ ພສ 2569 ຢ່າງເບີກບານມ່ວນຊື່ນ.
ທ່ານ ເດີນ ເລຂາ ພັກບ້ານ ຕະຫລຸງ ກ່າວໃນພິທີເປີດແຫລ່ງທ່ອງທ່ຽວແກ້ງເຊລະນອງ ຢ່າງເປັນທາງການ ໃນວັນທີ 3 ເມສາ 2026 ຜ່ານມາວ່າ: ແກ້ງເຊລະນອງ ຖືເປັນອີກໜຶ່ງສະຖານທີ່ທ່ອງທ່ຽວທີ່ສຳຄັນຂອງບ້ານຕະຫລຸງ ໂດຍສະເພາະແມ່ນໄລຍະບຸນປີໃໝ່ທີ່ຈະມາເຖິງນີ້ ຊຶ່ງຈຸດເດັ່ນທີ່ໜ້າສົນໃຈຂອງແກ້ງເຊລະນອງຈະມີນໍ້າໃສເຢັນໆໄຫລຜ່ານຕະຫລອດ, ມີທຳມະຊາດທີ່ສວຍສົດງົດງາມ ເໝາະສໍາລັບການແຊ່ນໍ້າຜ່ອນຄາຍຮ້ອນໃນໄລຍະລະດູຮ້ອນແບບນີ້, ນອກຈາກນັ້ນ,ຍັງມີບ່ອນພັກຜ່ອນທີ່ສະດວກສະບາຍໂດຍສະເພາະແມ່ນ ຕູບກາງນໍ້າ ທີ່ປຸກດ້ວຍວັດສະດຸທໍາມະຊາດ ເຮັດໃຫ້ມີຄວາມກົມກືນກັບສະພາບແວດລ້ອມ ເພື່ອຮອງຮັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຈະເຂົ້າມາທ່ຽວໃນໄລຍະປີໃໝ່ນີ້.
ແນວໃດກໍດີ, ແກ້ງເຊລະນອງ ຖືເປັນອີກໜຶ່ງສະຖານທີ່ທ່ອງທ່ຽວທີ່ສຳຄັນຂອງ ບ້ານຕະຫລຸງ ທີ່ມີທັດສະນີຍະພາບສວຍງາມ, ອ້ອມຮອບບໍເວນດັ່ງກ່າວມີປ່າໄມ້ທີ່ຂຽວງາມ ແລະ ພູທີ່ສະຫລັບສັບຊ້ອນ ເຮັດໃຫ້ມີອາກາດທີ່ບໍລິສຸດສົດຊື່ນ, ມີສາຍລົມເຢັນພັດຜ່ານມາເປັນບາດໆ, ມີແກ້ງຫີນທີ່ເປັນເອກະລັກ ແລະ ລະດັບນ້ຳທີ່ປອດໄພສຳລັບການລົງຫລິ້ນນ້ຳ. ເຖິງແນວໃດກໍຕາມ, ປີໃໝ່ລາວທີ່ຈະມາເຖິງນີ້ ຂໍເຊີນຊວນນັກທ່ອງທ່ຽວ ທັງພາຍໃນ ແລະ ຕ່າງປະເທດ ມາທ່ຽວຢູ່ ແກ້ງເຊລະນອງ ເມືອງຕະໂອ້ຍ ແຂວງສາລະວັນ ເພື່ອສຳຜັດກັບຄວາມງາມຂອງທໍາມະຊາດ, ແຊ່ນໍ້າເຢັນໆ, ກິນອາຫານແຊບໆທີ່ເປັນເອກະລັກ ແລະ ຮ່ວມສະ ເຫລີມສະຫລອງບຸນປີໃໝ່ລາວ ຢ່າງເບີກບານມ່ວນຊື່ນ.
ໂດຍ: ກິລິຍາ