ຫໍວາງສະແດງໂລກຂອງ ສປ ຈີນ ໄດ້ຮັບ ລາງວັນຫລຽນຄຳ ຂອງງານວາງສະແດງໂລກໂອຊະກາ
ຂປລ.ວິທະຍຸ-ໂທລະພາບ ສູນກາງຈີນ,ເມື່ອບໍ່ດົນມານີ້, ຫໍວາງສະແດງຂອງ ສປ ຈີນ ໃນງານວາງສະແດງໂລກ ໂອຊະກາ ໄດ້ຮັບລາງວັນ ຫລຽນຄຳ ຫໍວາງສະແດງໃຫຍ່ ທີ່ເຢັນຜູ້ອອກແນວຄິດສ້າງເອງ ຂອງງານວາງສະແດງໂລກຄັ້ງນີ້ ມອບໂດຍ ກົມວາງສະແດງສາກົນ. ນີ້ຖືວ່າ ສປ ຈີນ ໄດ້ຮັບລາງວັນ ຫລຽນຄຳ ເທື່ອທຳອິດ ໃນການເຂົ້າຮ່ວມ ງານວາງສະແດງໂລກ ປະເພດ ສັງລວມ ທີ່ຈັດຂຶ້ນ ຢູ່ຕ່າງປະເທດ ແລະ ກໍ່ແມ່ນ ສປ ຈີນ ໄດ້ຮັບລາງວັນສຳຄັນ 5 ເທື່ອ ລຽນຕິດ ໃນງານວາງສະແດງໂລກ ນັບແຕ່ ຄະນະກຳມະການສົ່ງເສີມ ການຄ້າສາກົນຈີນ ໂດຍຕາງໜ້າ ລັດຖະບານຈີນ ຈັດຫໍວາງສະແດງຂອງ ສປ ຈີນ ໄປເຂົ້າຮ່ວມ ງານວາງສະແດງໂລກ ຢູ່ຕ່າງປະເທດໃນປີ 1982 ເປັນຕົ້ນມາ. ລາງວັນທຸກຢ່າງ ໃນງານວາງສະແດງໂລກຄັ້ງນີ້ ແມ່ນເຈົ້າພາບຈັດງານ ກັບຊ່ຽວຊານ ສະຖາປະຕະຍະກຳ, ງານວາງສະແດງ, ສີລະປະ ແລະ ຂົງເຂດອື່ນໆ ທັງໝົດ 9 ຄົນ ທີ່ມາຈາກ ປະເທດຕ່າງໆ ຮ່ວມກັນ ດຳເນີນ ການປະກວດ ພິຈາລະນາ, ຕັ້ງລາງວັນ ໂດຍແບ່ງເປັນ 3 ປະເພດ ຄື: ການວາງສະແດງ, ສະຖາປະຕະຍະກຳ ແລະ ການບັນຍາຍຫົວຂໍ້ ຕາມເນື້ອທີ່ນ້ອຍໃຫຍ່ ຂອງຫໍວາງສະແດງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ