ການນໍາພັກ-ລັດ ແລະ ມວນຊົນຮ່ວມ ໃສ່ບາດ ຢູ່ຜາສາດຫີນ ວັດພູຈໍາປາສັກ
ຂປລ. ຕອນເຊົ້າວັນທີ 12 ກຸມພາ 2025 ກົງກັບວັນພຸດ, ເພັງ 15 ຄໍ່າເດືອນສາມ (ວັນບຸນມາຄະບູຊາ) ພສ 2566, ທ່ານ ພົນເອກ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ, ພ້ອມດ້ວຍການນໍາພັກ-ລັດທັງສູນກາງ ແລະ ທ້ອງຖິ່ນ ໄດ້ຮ່ວມກັບຊາວພຸດພາຍໃນແຂວງຈໍາປາສັກ, ຕ່າງແຂວງ ແລະ ຕ່າງປະເທດ ຮ່ວມກັນທຳບຸນຕັກບາດຖວາຍເຄື່ອງໄຊຍະທານຕ່າງໆ ທີ່ສະຖານບູຮານວັດພູຈຳປາສັກ ມໍລະລົກໂລກ ແຫ່ງທີ 2 ຂອງລາວ.
ໃນພິທີ, ທ່ານ ພົນເອກ ວິໄລ ຫລ້າຄຳຟອງ ໄດ້ໄຕ້ທຽນໄຊ ໄຫວ້ພະລັດຕະນະໄຕ ແລະ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ກໍໄດ້ລັ່ນຄ້ອງ 9 ບາດ, ພະອາຈານໄດ້ນຳພາຄະນະສົງຈຳນວນ 390 ກວ່າອົງ ແລະ ອອກຕົນຍາດໂຍມທັງຫລາຍ ດຳເນີນພິທີທາງສາສະໜາ ໄຫວ້ພະຣັດຕະນະໄຕ, ກ່າວຄຳຖວາຍປັດໄຈ, ລາດທະນາສິນ, ຢາດນໍ້າໃຫ້ພອນແກ່ອອກຕົນຍາດຍົມ. ຈາກນັ້ນ, ອອກຕົນຍາດໂຍມ ກໍໄດ້ໃສ່ບາດຖວາຍປັດໄຈທານ ແດ່ພະສົງ, ຂຶ້ນກາບໄຫວ້ຂໍພອນ ທີ່ສະຖານບູຮານວັດພູ ແລະ ບາສີສູ່ຂວັນຕາມຄວາມເຊື່ອ ຕາມຈິດໃຈໃສສັດທາຂອງຕົນ.
ການໃສ່ບາດຢູ່ສະຖານບູຮານວັດພູຈຳປາສັກ ນອກຈາກເປັນການສືບທອດ ຮີດຄອງປະເພນີວັດ ທະນະທຳອັນດີງາມຂອງຊາດ ທີ່ຊາວເມືອງ ກໍຄື ແຂວງ ຈຳປາສັກ ສືບທອດມາແຕ່ບູຮານນະການ ໃຫ້ຄຽງຄູ ຢູ່ກັບຄົນລາວຕະຫລອດໄປແລ້ວ, ຍັງເປັນການສະເຫລີມສະຫລອງ ເປີດປີທ່ອງທ່ຽວລາວ ແລະ ເປັນການອຸທິດສ່ວນບຸນ ສ່ວນກຸສົນ ແລະ ເປັນສີລິມົງຄຸນໃຫ້ແກ່ຕົນເອງ ແລະ ຄອບຄົວໃຫ້ຢູ່ດີມີສຸກ, ທັງເປັນການເຜີຍແຜ່ວັດທະນະທຳ ແລະ ດຶງດູດນັກທ່ອງທ່ຽວ ເຂົ້າມາທ່ອງທ່ຽວຊົມວັດພູຈໍປາສັກ ມໍລະດົກໂລກແຫ່ງທີ 2 ຂອງລາວໃຫ້ນັບມື້ຫລາຍຂຶ້ນ.
