ພະຍາດອະຫິວາ ແພ່ລະບາດເຮັດໃຫ້ມີຜູ້ເສຍຊີວິດທົ່ວໂລກ ເພີ່ມຂຶ້ນ 71%
ຂປລ. ສຳນັກຂ່າວ ເອເອຟພ, ວັນທີ 5 ກັນຍາ, ອົງການ ອະນາໄມໂລກ (ດັບເບິລຢູເອຊໂອ) ເປີດເຜີຍ ຈຳນວນ ຜູ້ເສຍຊີວິດ ຈາກ ພະຍາດ ອະຫິວາ ໃນປີ 2023 ລວມມີ 4.000 ຄົນ ເພີ່ມຂຶ້ນ 71% ເມື່ອທຽບກັບປີ 2022, , ໂດຍ ທະວີບ ອາຟຣິກາ ໄດ້ຮັບຜົນກະທົບ ຫລາຍທີ່ສຸດ ແລະ ມີຜູ້ຕິດເຊື້ອ ເພີ່ມຂຶ້ນ ຢ່າງຫລວງຫລາຍ. ສະນັ້ນ, ອົງການ ອະນາໄມໂລກ ໄດ້ຮຽກຮ້ອງໃຫ້ທຸກຝ່າຍ ເລັ່ງດຳເນີນການ ເພື່ອຢຸດຕິ ການແພ່ລະບາດ ຂອງພະຍາດນີ້. ເຖິງແມ່ນວ່າ ຈະເປັນພະຍາດ ທີ່ ປ້ອງກັນແລະ ປິ່ນປົວໄດ້ ແຕ່ຄວາມຂັດແຍ່ງ, ການປ່ຽນແປງ ຂອງສະພາບ ພູມອາກາດ , ນໍ້າ ແລະ ສຸຂະອະນາໄມ ທີ່ບໍ່ດີ ຄື ປັດໄຈຕົ້ນຕໍ ທີ່ ເຮັດໃຫ້ພະຍາດ ອະຫິວາ ກັບຄືນມາແພ່ລະບາດ ອີກຄັ້ງ. ໂດຍສະເພາະ ອາຟຣິກາ, ກວມເອົາ ຜູ້ຕິດເຊື້ອພະຍາດນີ້ ເພີ່ມຂຶ້ນ 125% ໃນຂະນະທີ່ ຕາເວັນອອກກາງ ແລະ ອາຊີ ມີຜູ້ຕິດເຊື້ອ ຫລຸດລົງ 32%. ໃນປີນີ້ ມີຜູ້ຕິດເຊື້ອນີ້ ຫລາຍກວ່າ 342.000 ຄົນ ແລະ ເສຍຊີວິດ 2.400 ຄົນ ແລະ ກວດພົບ ການແພ່ລະບາດ ຢ່າງຕໍ່ເນື່ອງ ຢູ່ 22 ປະເທດ ລວມເຖິງ ຊູດັງ ທີ່ໄດ້ຮັບຜົນກະທົບ ຈາກ ການຂັດແຍ່ງ./