ປາຖະກະຖາ ການຮ່ວມມືກັບອິນເດຍ ໃນໄລຍະໃໝ່
ຂປລ. ສະຖາບັນການຕ່າງປະເທດ, ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດ ອິນເດຍ ປະຈໍາ ສປປ ລາວ ຈັດປາຖະກະຖາພາຍໃຕ້ຫົວຂໍ້ “ການຮ່ວມມືກັບອິນເດຍ ໃນໄລຍະໃໝ່ ເປີດກວ້າງການຮ່ວມມືກັບ ສປປ ລາວ ແລະ ອາຊຽນ” ໃນວັນທີ 2 ກຸມພາ 2024 ໂດຍການເປັນປະທານກ່າວເປີດຂອງ ທ່ານ ບຸນເຫລືອ ພັນດານຸວົງ ຮອງລັດຖະມົນຕີ ກະຊວງການຕ່າງປະ ເທດ, ມີພາກສ່ວນຕ່າງໆເຂົ້າຮ່ວມື.
ການຈັດປາຖະກະຖາຄັ້ງນີ້, ເປັນກິດຈະກໍາໜຶ່ງ ເພື່ອສະເຫລີມສະຫລອງ ວັນສ້າງຕັ້ງສາຍພົວພັນການທູດລາວ-ອິນເດຍ ຄົບຮອບ 68 ປີ (2 ກຸມພາ 1956 ເຖິງ 2 ກຸມພາ 2024) ເປັນການສົ່ງເສີມການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອິນເດຍ ໃນໄລຍະຜ່ານມາ ກໍຄື ເສີມຂະ ຫຍາຍການຮ່ວມມືທີ່ເປັນທ່າແຮງ ຂອງສອງປະເທດໃນອະນາຄົດ. ນອກຈາກນີ້, ກໍເພື່ອເສີມຂະຫຍາຍການຮ່ວມມື ລະຫວ່າງ ອິນເດຍ ແລະ ອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ໃນປີ 2024 ໂດຍຜູ້ເຂົ້າຮ່ວມ ໄດ້ຮັບຟັງ ແລະ ແລກປ່ຽນຄໍາຄິດຄໍາເຫັນຕໍ່ກັບຂົງເຂດວຽກງານຕ່າງໆ ພາຍໃຕ້ການຮ່ວມມື ລາວ-ອິນເດຍ ແລະ ອາຊຽນ-ອິນເດຍ ໃນໄລຍະຜ່ານ, ກາລະໂອກາດ, ສິ່ງທ້າທ້າຍ ແລະ ຂົງເຂດວຽກງານ ທີ່ເປັນທ່າແຮງສໍາລັບການຮ່ວມມື ລະຫວ່າງ ສອງປະເທດ ໃນອະນາຄົດ.
ສປປ ລາວ ແລະ ອິນເດຍ ໄດ້ສ້າງສາຍພົວພັນການທູດຮ່ວມກັນ ໃນວັນທີ 2 ກຸມພາ 1956. ຕະຫລອດໄລຍະ 68 ປີຜ່ານມາ, ການພົວພັນການທູດ ລະຫວ່າງສອງປະເທດ ໄດ້ຮັບການເສີມຂະ ຫຍາຍຢ່າງຕໍ່ເນື່ອງ ແລະ ເປັນຮູບປະທໍາ ເຊິ່ງມີລັກສະນະມູນເຊື້ອ ດ້ານປະຫວັດສາດ ເນື່ອງຈາກມີຄວາມຄ້າຍຄືກັນ ທາງດ້ານວັດທະນະທໍາ ແລະ ສາສະໜາ, ສອງຝ່າຍໄດ້ໃຫ້ການສະໜັບສະໜູນເຊິ່ງກັນ ແລະ ກັນ, ມີການແລກປ່ຽນການຢ້ຽມຢາມກັນ ຢ່າງເປັນປົກກະຕິໃນລະດັບການນໍາຂັ້ນສູງ ຈົນເຖິງວິຊາການ, ມີການຮ່ວມມືກັນ ໃນຫລາຍຂົງເຂດວຽກງານເຊັ່ນ: ການເມືອງ, ເສດຖະກິດ, ວັດທະນະທໍາ-ສັງຄົມ, ສາທາລະນະສຸກ, ສຶກສາ, ເຕັກໂນໂລຊີ, ການຄ້າ-ການລົງທຶນ ແລະ ອື່ນໆ. ນອກນີ້, ທັງສອງຝ່າຍ ກໍໄດ້ລົງນາມຮ່ວມກັນ ໃນນິຕິກໍາຕ່າງໆຫລາຍສະບັບ. ໃນນັ້ນ, ກໍແມ່ນບົດບັນທຶກ ຄວາມເຂົ້າໃຈ ລະຫວ່າງ ສະຖາບັນການຕ່າງປະເທດ ຂອງ ສປປ ລາວ ແລະ ສະຖາບັນການຕ່າງປະເທດ ຂອງ ອິນເດຍ ເພື່ອເສີມຂະຫຍາຍການຮ່ວມມືສອງຝ່າຍ ໂດຍຜ່ານການຈັດຕັ້ງປະຕິບັດກິດຈະກໍາ ໃນຂົງເຂດຕ່າງໆ ທີ່ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ.
ພາບ: ຂັນໄຊ