ຄູເປັນປັດໄຈພື້ນຖານຕັດສິນຄຸນນະພາບການສຶກສາ ແລະ ການພັດທະນາປະເທດຊາດ
ໃນໂອກາດວັນຄູແຫ່ງຊາດ 7 ຕຸລາ, ທ່ານ ຫຸມພັນ ແກ້ວອຸ່ນຄຳ ຮອງຫົວໜ້າກົມສາມັນສຶກສາ, ກະຊວງສຶກສາທິການ ແລະ ກິລາ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 7 ຕຸລາ 2026 ວ່າ: ຄູມີບົດບາດສຳຄັນຕໍ່ການພັດທະນາຊັບພະຍາກອນ ຊຶ່ງປະທານ ໄກສອນ ພົມວິຫານ ທີ່ແສນເຄົາລົບຮັກໄດ້ກ່າວໃນປີ 1978 ວ່າ: “ຄູແມ່ນແມ່ພິມຂອງຊາດ ແລະ ຄູແມ່ນຄົນຂອງພັກ” ໃນອະດີດຜ່ານມາ, ພວກເຮົາອາດເບິ່ງຄູເປັນຜູ້ຖ່າຍທອດຄວາມຮູ້, ສູ້ຊົນສອນໃຫ້ຈົບຫຼັກສູດ, ນຳພານັກຮຽນກະກຽມຄົ້ນຄວ້າເພື່ອສອບເສັງ, ແຕ່ໃນສະພາບເງື່ອນໄຂໃໝ່ນີ້ ຍຸກສະໄໝແຫ່ງຂໍ້ມູນຂ່າວສານເຕັກໂນໂລຊີ ແລະ ປັນຍາປະດິດ (AI) ທີ່ມີການພັດທະນາຢ່າງວ່ອງໄວ, ຄູຍິ່ງໄດ້ມີບົດສຳຄັນທີ່ສຸດໃນການພັດທະນາຊັບພະຍາກອນມະນຸດໃຫ້ມີຄຸນນະພາບ ແລະ ມີບົດສຳຄັນຕໍ່ການພັດທະນາການສຶກສາ ຍ້ອນວ່າຄູເປັນຜູ້ແນະນຳ, ຜູ້ສ້າງແຮງບັນດານໃຈ, ເປັນຜູ້ຮຽນຮູ້ຕະຫຼອດຊີວິດ, ສຳຄັນທີ່ສຸດເປັນຜູ້ປູກຝັງໃຫ້ນັກຮຽນມີຄຸນນະທຳ, ສິລະທຳ ແລະ ຈັນຍາບັນນຳພາສັງຄົມມີຄວາມສະຫງົບ. ໃນຍຸກປະຈຸບັນ, ຄູບໍ່ພຽງແຕ່ເປັນຜູ້ສອນໃຫ້ນັກຮຽນຮູ້ຢູ່ໃນບົດຮຽນເທົ່ານັ້ນ ແຕ່ຄູຕ້ອງສອນໃຫ້ນັກຮຽນຮູ້ວິທີຮຽນ, ຮູ້ວິທີຄິດ, ຮູ້ວິທີແກ້ບັນຫາ ແລະ ຮູ້ຈັກພັດທະນາຕົນເອງ.
ທ່ານ ຫຸມພັນ ແກ້ວອຸ່ນຄຳ ຍັງເນັ້ນໃຫ້ຄູ ຕ້ອງພັດທະນາວິຊາສະເພາະ ແລະ ວິທີສິດສອນໃຫ້ທັນສະໄໝ, ການສອນບໍ່ຄວນເນັ້ນແຕ່ການຈື່ຈຳແຕ່ຄວນສ້າງໂອກາດໃຫ້ນັກຮຽນໄດ້ຄິດ, ໄດ້ຖາມ, ໄດ້ປຶກສາຫາລື, ໄດ້ສົນທະນາ, ໄດ້ທົດລອງ, ແກ້ບັນຫາ ແລະ ນຳຄວາມຮູ້ໄປໃຊ້ກັບຊີວິດຕົວຈິງໃຫ້ໄດ້; ຄູຕ້ອງມີທັກສະດີຈິຕອນ ແລະ ຮູ້ຈັກນຳໃຊ້ປັນຍາປະດິດ (AI) ແລະ ເຕັກໂນໂລຊີຢ່າງສ້າງສັນບໍ່ຄວນເບິ່ງ AI ວ່າເປັນສິ່ງທີ່ຈະມາທົດແທນບົດບາດການສອນຂອງຄູ, ແຕ່ເປັນເຄື່ອງມືທີ່ຄູສາມາດນຳມາຊ່ວຍອອກແບບການຮຽນ-ການສອນ, ພັດທະນາສື່, ວິເຄາະຜົນການຮຽນ ແລະ ຊ່ວຍນັກຮຽນທີ່ມີຄວາມຕ້ອງການທີ່ຫຼາກຫຼາຍ; ຄູຕ້ອງເປັນຜູ້ຊອກຮູ້ຮໍ່າຮຽນກຳໄດ້ແນວທາງຂອງພັກ ແລະ ຂອງລັດໃຫ້ດີໃນແຕ່ລະໄລຍະ, ມີຄວາມຮັກຊາດສູງ, ຄວາມເຂົ້າໃຈ, ຄວາມມັກຮັກນັກຮຽນ, ຄວາມຍຸຕິທຳ, ຄວາມອົດທົນ, ເປັນຜູ້ຮັບຟັງທີ່ດີ ແລະ ການເຄົາລົບຄວາມແຕກຕ່າງ ຊຶ່ງນັກຮຽນບໍ່ໄດ້ຮຽນຄືກັນທຸກຄົນບາງຄົນຮຽນໄວ, ບາງຄົນຕ້ອງການເວລາ, ບາງຄົນມີພອນສະຫວັນສະເພາະ ແລະ ບາງຄົນຕ້ອງການການຊ່ວຍເຫຼືອເປັນພິເສດ ຊຶ່ງຄູທີ່ດີຕ້ອງບໍ່ປ່ອຍໃຫ້ເດັກຄົນໃດຖືກປະໄວ້ຂ້າງຫຼັງ.
ເຖິງຢ່າງໃດກໍຕາມ, ຍັງມີສິ່ງທ້າທາຍໃນການສິດສອນ, ຄູຍັງຕ້ອງສູ້ຊົນແກ້ໄຂຊ່ອງວ່າງດ້ານຄຸນນະພາບຂອງການສຶກສາລະຫວ່າງເຂດໃນເມືອງ ແລະ ເຂດຊົນນະບົດລວມເຖິງພື້ນຖານໂຄງລ່າງ, ສິ່ງອຳນວຍຄວາມສະດວກ, ສື່ການຮຽນ, ເຕັກໂນໂລຊີ ແລະ ສະພາບແວດລ້ອມການຮຽນ-ການສອນ; ທຸກສິ່ງທຸກຢ່າງແມ່ນທັນສະໄໝ ແລະ ເປັນຍຸກວັດຖຸນິຍົມ ມີການແຂ່ງຂັນກັນສູງ, ມີການສົ່ງເສີມໂຄສະນາສິນຄ້າ ແລະ ຜະລິດຕະພັນ, ເຕັກໂນໂລຊີທີ່ກ້າວໜ້າ, ພ້ອມທັງມີການເຜີຍແຜ່ຂໍ້ມູນຂ່າວສານສື່ສັງຄົມອອນລາຍ ຢ່າງບໍ່ມີເຂດຈຳກັດ, ມີທັງດີ ແລະ ບໍ່ດີ ຊຶ່ງພາໃຫ້ລູກຫຼານນັກຮຽນຕິດສື່ສັງຄົມອອນລາຍບໍ່ໜ້ອຍ, ບາງຄົນຫຼົງໄຫຼໃນວັດຖຸນິຍົມ ແລະ ນຳໄປສູ່ການຂາດຄຸນນະທຳ, ສິນທຳ, ຈັນຍາບັນ ແລະ ສົ່ງຜົນກະທົບຕໍ່ການຮຽນ.
ຂ່າວ: ກິດຕາ