ສື່ມວນຊົນມີບົດບາດສຳຄັນໃນການເປັນສື່ກາງເຊື່ອມໂຍງລະຫວາງ ພັກ-ລັດ ແລະ ປະຊາຊົນ
ຂປລ. ວຽກງານຖະແຫລງຂ່າວ-ສື່ມວນຊົນ ມີບົດບາດສຳຄັນຢ່າງຍິ່ງ ເປັນພາຫະນະທີ່ສຳຄັນໃນການເຂົ້າເຖິງ ແລະ ຫັນປ່ຽນສະພາບແນວຄິດດັ້ງເດີມຂອງປະຊາຊົນ ແລະ ຕ້ານກົນອຸບາຍອັນເລິກແລບຂອງອິດທິກຳລັງປໍລະປັກ; ພ້ອມນັ້ນ ຍັງມີບົດບາດໃນການສຶກສາ ອົບຮົມແນວຄິດ, ເຕົ້າໂຮມຄວາມສາມັກຄີປອງດອງ, ເສີມຂະຫຍາຍປະຊາທິ ປະໄຕ, ສ້າງທັດສະນະຫລັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນຳພາຂອງພັກ, ໂຄສະນາປຸກລະດົມປະ ຊາຊົນ ບັນດາເຜົ່າເຂົ້າຮ່ວມ ການປະຕິວັດຊາດປະຊາທິປະໄຕ ແລະ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ປຸກລະດົມຂົນຂວາຍປະຊາຊົນເຂົ້າຮ່ວມການພັດທະນາເສດຖະກິດ-ສັງຄົມຂອງປະເທດເຮົາ, ຫັນປ່ຽນເສດຖະ ກິດທຳມະຊາດເປັນເສດຖະກິດສິນຄ້າ, ປຸກລະດົມທົ່ວປວງຊົນເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ, ດຶງດູດເອົາການຮ່ວມມື, ການຊ່ວຍເຫລືອ ແລະ ລົງທຶນຈາກຕ່າງປະເທດ. ນອກຈາກນັ້ນ, ສື່ມວນຊົນຍັງເປັນອົງປະກອບສຳຄັນໃນການເຜີຍແຜ່ນະໂຍບາຍ, ແນວທາງຜົນງານຂອງພັກ-ລັດ ແລະ ກົດໝາຍຂອງພັກ-ລັດໃຫ້ເຂົ້າເຖິງປະຊາຊົນຢ່າງກວ້າງຂວາງ, ເປັນຊ່ອງທາງໃນການສະທ້ອນຄວາມຄິດເຫັນ, ຄວາມຕ້ອງການ ແລະ ສຽງຂອງປະຊາຊົນໄປສູ່ອົງການບໍລິຫານ ຊຶ່ງໃນສັງຄົມປັດຈຸບັນສື່ມວນຊົນບໍ່ພຽງແຕ່ເຮັດໜ້າທີ່ລາຍງານຂ່າວ ແຕ່ຍັງເປັນຜູ້ໃຫ້ຄວາມຮູ້, ສ້າງຄວາມເຂົ້າໃຈ ແລະ ປູກຈິດສຳນຶກໃຫ້ປະຊາຊົນມີຄວາມຮັບຜິດຊອບຕໍ່ສັງຄົມ. ການນຳສະເໜີຂ່າວທີ່ຖືກຕ້ອງ, ວ່ອງໄວ ແລະ ທັນເຫດການ ຈະຊ່ວຍສ້າງຄວາມເຊື່ອໝັ້ນ ແລະ ຄວາມສາມັກຄີໃນສັງຄົມ, ຄຽງຄູ່ກັບການຕ້ານຂ່າວບິດເບືອນ, ສົ່ງເສີມຄຸນຄ່າທາງວັດທະນະທຳ, ຮີດຄອງປະເພນີອັນດີງາມຂອງຊາດໃຫ້ຄົງຢູ່ສືບໄປ ແລະ ຊຸກຍູ້ການສ້າງສາພັດທະນາປະເທດໃຫ້ຈະເລີນກ້າວໜ້າ.
ຕະຫລອດໄລຍະຜ່ານມາ ພາຍໃຕ້ການນໍາພາໂດຍກົງຂອງພັກ, ການຄຸ້ມຄອງຢ່າງໃກ້ຊິດຂອງລັດ, ການສະໜັບສະໜູນ ຂອງປະຊາຊົນບັນດາເຜົ່າ ແລະ ການຊ່ວຍເຫລືອ ຈາກປະເທດເພື່ອນ ມິດຍຸດທະສາດ ແລະ ອົງການຈັດຕັ້ງສາກົນອື່ນໆ; ຂະແໜງການຖະແຫລງຂ່າວ, ສື່ມວນຊົນ ໄດ້ຮັບການພັດທະນາ, ມີຄວາມກ້າວໜ້າ, ເຕີບໃຫຍ່ ແລະ ເຂັ້ມແຂງຢ່າງບໍ່ຢຸດຢັ້ງ. ໃນປີຜ່ານມາສື່ມວນຊົນໄດ້ປະກອບສ່ວນສຳຄັນ ໃນບັນດາຜົນສຳເລັດຂອງການຈັດຕັ້ງ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ. ອັນສຳຄັນແມ່ນການ ປະກອບສ່ວນເຂົ້າໃນ ການໂຄສະນາເຜີຍແຜ່ ການເຄື່ອນໄຫວວຽກງານການຕ່າງປະເທດ, ເຊື່ອມໂຍງກັບພາກພື້ນ ແລະ ສາກົນ ປະສົບຜົນສຳເລັດ ຢ່າງສະຫງ່າງາມ ຊຶ່ງໄດ້ເຮັດໃຫ້ຖານະບົດບາດ ແລະ ຊື່ສຽງຂອງ ສປປ ລາວພົ້ນເດັ່ນຂຶ້ນໃນເວທີພາກພື້ນ ແລະ ສາກົນ. ມາຮອດປັດຈຸບັນ ວຽກງານຖະແຫລງຂ່າວ, ສື່ມວນຊົນ ໄດ້ສືບຕໍ່ເຕີບໃຫຍ່ຂະຫຍາຍຕົວ ທ່າມກາງສິ່ງທ້າທາຍທົດຊອບນາໆປະການ. ອັນພົ້ນເດັ່ນແມ່ນໄດ້ປັບປ່ຽນຮູບແບບ ການເຜີຍແຜ່ຂໍ້ມູນຂ່າວສານຜ່ານລະ ບົບອອນລາຍ ເພື່ອກະຈາຍຂໍ້ມູນໃຫ້ສັງຄົມ ໄດ້ຮັບຮູ້ຢ່າງທົ່ວເຖິງທັງຮັບປະກັນໄດ້ຄວາມຖືກຕ້ອງ, ວອງໄວ ແລະ ຊັດເຈນ.
