KPL
ຂປລ. ເມື່ອບໍ່ດົນມານີ້, ໄດ້ມີພິທີເປີດ ສະມາຄົມທຸລະກິດບໍລິການຈັດຫາງານລາວ ຢ່າງເປັນທາງການ ໂດຍມີ ທ່ານ ນາງໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ນາງ ອີນາ ມາຈໍລູນີແຕ ເອກອັກຄະລັດຖະທູດ ສຳນັກງານຜູ້ຕາງໜ້າສະຫະພາບເອີ ຣົບປະຈຳລາວ, ທ່ານ ນາງ ມີແກນ ຈອນສ ເອກອັກຄະລັດຖະທູດ ແຫ່ງປະເທດອົດສະຕຣາລີ ປະຈຳລາວ, ທ່ານ ວຽງປະສິດ ເທບພະສຸດາ ຜູ້ຕາງໜ້າອົງການແຮງງານສາກົນ ປະຈຳສປປລາວ
ຂປລ. ເມື່ອບໍ່ດົນມານີ້, ໄດ້ມີພິທີເປີດ ສະມາຄົມທຸລະກິດບໍລິການຈັດຫາງານລາວ ຢ່າງເປັນທາງການ ໂດຍມີ ທ່ານ ນາງໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ນາງ ອີນາ ມາຈໍລູນີແຕ ເອກອັກຄະລັດຖະທູດ ສຳນັກງານຜູ້ຕາງໜ້າສະຫະພາບເອີ ຣົບປະຈຳລາວ, ທ່ານ ນາງ ມີແກນ ຈອນສ ເອກອັກຄະລັດຖະທູດ ແຫ່ງປະເທດອົດສະຕຣາລີ ປະຈຳລາວ, ທ່ານ ວຽງປະສິດ ເທບພະສຸດາ ຜູ້ຕາງໜ້າອົງການແຮງງານສາກົນ ປະຈຳສປປລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງໃບຄຳ ຂັດທິຍະ ໄດ້ມີຄຳເຫັນໃນວ່າ: ຜ່ານຄວາມພະຍາຍາມສູງ ຂອງບັນດາຜູ້ປະກອບການ ດ້ານການບໍລິການຈັດຫາງານ ໃນການຄົ້ນຄວ້າ, ເກັບກຳຂໍ້ມູນ, ລະດົມແນວຄວາມ ຄິດບວກ ກັບຄວາມຮັບຜິດຊອບ ຂອງກົມການຈັດຫາງານ ແລະ ພາກສ່ວນທີ່ກ່ຽວຂ້ອງຕ່າງໆທັງພາກລັດ, ພາກທຸລະກິດນັບແຕ່ສູນກາງຮອດທ້ອງຖິ່ນ ແລະ ດ້ວຍການສະໜັບສະໜູນ ທາງດ້ານທັດສະນະ, ເຕັກນິກ, ວິຊາການ ແລະ ງົບປະມານຈາກບັນດາປະເທດ ໃນສະຫະພາບອີຢູ ໂດຍຜ່ານໄອໂລ ແລະການສະໜັບສະໜູນ ຈາກລັດຖະບານອົດສະຕຣາລີ ໂດຍແມ່ນສະຖານທູດ ອົດສະຕຮາລີ ເປັນໃຈກາງ, ມາຮອດມື້ນີ້, ສະມາຄົມທຸລະກິດບໍລິການຈັດຫາງານ ໄດ້ຮັບການສ້າງຕັ້ງຂຶ້ນ ຢ່າງເປັນລະບົບຄົບຊຸດ ຕາມນິຕິກໍາໄດ້ນົດໄວ້.
ຜົນສຳເລັດຂອງການສ້າງຕັ້ງສະມາຄົມດັ່ງກ່າວ, ເປັນພຽງຜົນສຳເລັດເບື້ອງຕົ້ນ, ບັນຫາສຳຄັນແມ່ນ ໝາກຜົນຂອງ ການເຄື່ອນໄຫວຂອງສະມາຄົມ ໃນການບໍລິການຈັດຫາງານ ໃຫ້ແກ່ຜູ້ອອກແຮງງານ, ກໍຄື ສະໜອງແຮງງານ ໃຫ້ແກ່ບັນດາຕໍາແໜ່ງງານ ທັງພາຍໃນ ແລະ ຕ່າງປະເທດ ເພື່ອເປັນການປະກອບ ສ່ວນຢ່າງຕັ້ງໜ້າເຂົ້າໃນ ການແກ້ໄຂຄວາມທຸກຍາກ ຂອງປະຊາຊົນ ກໍຄື ກຳລັງແຮງງານ, ເຮັດໃຫ້ກຳລັງແຮງງານມີລາຍໄດ້, ມີວຽກເຮັດງານທຳທີ່ໝັ້ນຄົງ, ມີສະຫວັດດີການ ສັງຄົມຢ່າງເປັນລະບົບຄົບຊຸດ ເພື່ອຮັບປະກັນໃຫ້ເສດຖະກິດ ມີການຂະຫຍາຍຕົວ, ທັງເປັນການສ້າງຄວາມໝັ້ນທ່ຽງໃຫ້ແກ່ຂະແໜງ ການຜະລິດ ແລ ບໍລິການ ໄດ້ດຳເນີນທຸລະກິດ ດ້ວຍຄວາມລາບລື່ນ ແລະ ມີຜົນສຳເລັດ.
ໂອກາດນີ້, ທ່ານ ລັດຖະມົນຕີ ຮສສ ໄດ້ສະແດງຄວາມຫວັງວ່າ: ສະມາຄົມຈັດຫາງານ ຈະເປັນສ່ວນໜຶ່ງໃນການປະສານສົມທົບ ກັບຜູ້ປະກອບການພາຍໃນ ເພື່ອປັບປຸງສະພາບ ແວດລ້ອມ, ເງື່ອນໄຂຂອງການເຮັດວຽກ ທີ່ເອື້ອອຳນວຍ, ສ້າງຕຳແໜ່ງງານທີ່ໝັ້ນຄົງ ເພື່ອສ້າງແຮງຈູງໃຈດຶງດູດແຮງງານ ໃຫ້ເຂົ້າສູ່ຕະຫລາດແຮງງານພາຍໃນ ໃຫ້ຫລາຍຂຶ້ນ.
ສະມາຄົມທຸລະກິດບໍລິການ ຈັດຫາງານລາວ ແມ່ນການເຕົ້າໂຮມຄວາມສາມັກຄີເປັນປຶກແຜ່ນ, ເປັນການເພີ່ມກຳລັງແຮງ ທາງດ້ານສະຕິປັນຍາ, ກຳລັງຊັບພະຍາກອນ ເພື່ອສາມາດ ແຂ່ງຂັນກັບກົນໄກເສດຖະກິດຕະຫລາດ, ທັງເປັນການຫລຸດຜ່ອນ ການແກ້ງແຍ່ງແຂ່ງຂັນ ທາງດ້ານທຸລະກິດ ເພື່ອປົກປ້ອງແລະ ຊ່ວຍເຫລືອ ເຊິ່ງກັນ ແລະ ກັນ, ພ້ອມກັນເຕີບໃຫ່ຍ ຂະຫຍາຍຕົວ ໄປຂ້າງໜ້າ. ພ້ອມນີ້, ກໍເພື່ອຊ່ວຍພາກລັດ ໃນການຄຸ້ມຄອງ ແລະ ດັດສົມລະຫວ່າງຄວາມຕ້ອງການ ແລະ ຄວາມອາດສາມາດ ໃນການສະໜອງແຮງງານ ໃນເງື່ອນໄຂ ປັດຈຸບັນ ແລະ ອະນາຄົດ.
ຂໍ້ມູນ-ພາບ: ຂ່າວສານ ຮສສ
KPL
