KPL
ທ່ານ ຫວາງຢີ້, ກຳມະການ ກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງ ການຕ່າງປະເທດຈີນ ໄດ້ເປັນເຈົ້າພາບ ຈັດກອງປະຊຸມ ສະພາມົນຕີ ລັດຖະມົນຕີ ຕ່າງປະເທດ ອົງການຮ່ວມມື ຊຽງໄຮ ຢູ່ນະຄອນ ທຽນສິນ ຂອງ ສປ ຈີນ.
ຂປລ.ວິທະຍຸ ສາກົນ ແຫ່ງ ສປ ຈີນ, ວັນທີ 15 ກໍລະກົດນີ້, ທ່ານ ຫວາງຢີ້, ກຳມະການ ກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງ ການຕ່າງປະເທດຈີນ ໄດ້ເປັນເຈົ້າພາບ ຈັດກອງປະຊຸມ ສະພາມົນຕີ ລັດຖະມົນຕີ ຕ່າງປະເທດ ອົງການຮ່ວມມື ຊຽງໄຮ ຢູ່ນະຄອນ ທຽນສິນ ຂອງ ສປ ຈີນ. ໃນໂອກາດນີ້ ທ່ານ ຫວາງຢີ້ ກ່າວວ່າ: ນັບແຕ່ ອົງການ ຮ່ວມມື ຊຽງໄຮ ໄດ້ຮັບການສ້າງຕັ້ງຂຶ້ນ ເປັນເວລາ 24 ປີຜ່ານມາ, ພາຍໃຕ້ ການນຳພາ-ຊີ້ນຳ ທາງດ້ານ ຍຸດທະສາດ ຂອງຜູ້ນຳ ປະເທດ ສະມາຊິກຕ່າງໆ, ເຮັດໃຫ້ມີທ່າອ່ຽງ ການພັດທະນາ ທີ່ໝັ້ນທ່ຽງ ເປັນຢ່າງດີ, ຂົງເຂດ ການຮ່ວມມື ໄດ້ເປີດກວ້າງອອກ ຢ່າງບໍ່ຢຸດຢັ້ງ, ສ້າງຊື່ສຽງ ໃນສາກົນ ສູງຂຶ້ນ ຢ່າງຕໍ່ເນື່ອງ ແລະ ມີມູນຄ່າ ທາງດ້ານຍຸດທະສາດ ທີ່ພົ້ນເດັ່ນ ກວ່າເກົ່າ ໄດ້ກາຍເປັນ ອົງການ ທີ່ເພີ່ງພາ ອາໄສ ໄດ້ຂອງບັນດາປະເທດ ສະມາຊິກ ໃນການຮັກສາ ຄວາມໝັ້ນຄົງ ຂອງພາກພື້ນ ແລະ ບັນລຸ ການພັດທະນາ ຮ່ວມກັນ. ພາຍຫລັງ ກອງປະຊຸມຄັ້ງນີ້, ທ່ານ ຫວາງຢີ້ ແລະ ທ່ານ ນູລານ ເຢີເມັກບາເຢັຟ ເລຂາທິການໃຫຍ່ ອົງການຮ່ວມມື ຊຽງໄຮ ໄດ້ຮ່ວມກັນ ໃຫ້ສຳພາດ ຕໍ່ນັກຂ່າວ. ທ່ານ ຫວາງຢີ້ ປະກາດວ່າ: ກອງປະຊຸມ ສຸດຍອດ ອົງການ ຮ່ວມມື ຊຽງໄຮ ຈະຈັດຂຶ້ນ ຢູ່ນະຄອນ ທຽນສິນ ແຕ່ວັນທີ 31 ສິງຫາ ຫາວັນທີ 1 ກັນຍາປີນີ້. ຜູ້ນຳຈາກ 20 ກວ່າປະເທດ ແລະ ຜູ້ຮັບຜິດຊອບ ຈາກອົງການ ຈັດຕັ້ງສາກົນ 10 ແຫ່ງ ຈະເຂົ້າຮ່ວມ ກອງປະຊຸມສຸດຍອດ ແລະ ກິດຈະກຳ ທີ່ກ່ຽວຂ້ອງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
