ຂປລ.  ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ມີຄຳເຫັນຊີ້ນຳ ໂດຍເນັ້ນໃຫ້ຜູ້ສະໝັກຮັບເລືອກຕັ້ງເປັນ ສສຊ ແລະ ສສຂ ທີ່ເປັນເພດຍິງຈາກສູນກາງ ແລະ 10 ແຂວງພາກເໜືອ ຕ້ອງກຽມຄວາມພ້ອມຮອບດ້ານ, ປະກອບຄວາມຮູ້-ທັກສະຕ່າງໆ ເພື່ອເຮັດໃຫ້ການເລືອກຕັ້ງປະສົບຜົນສໍາເລັດຕາມຄາດໝາຍທີ່ວາງໄວ້ ກໍຄື ໃຫ້ໄດ້ເພດຍິງທີ່ເປັນຕົວແທນພົນລະເມືອງລາວເຄິ່ງໜຶ່ງທ່ີເປັນເພດຍິງໃຫ້ໄດ້ 30% ຂອງຈໍານວນ ສສຊ ທັງໝົດ 175 ທ່ານ ແລະ ສສຂ 745 ທ່ານ. 

    ເພື່ອເຮັດໃຫ້ເພດຍິງ ທີ່ເປັນຜູ້ສະໝັກຮັບເລືອກຕັ້ງເປັນ ສສຊ ແລະ ສສຂ ໄດ້ຮັບຊາບເຖິງຄວາມສໍາຄັນຂອງບັ້ນເລືອກຕັ້ງ ແລະ ການກະກຽມໂຄສະນາຫາສຽງໃນເວລາລົງພົບປະປະຊາຊົນຜູ້ມີສິດເລືອກຕັ້ງ, ທ່ານ ນາງ ສູນທອນ ໄຊຍະຈັກ ໄດ້ເຜີຍແຜ່ມະຕິຂອງກົມການເມືອງສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາ ຂອງຄະນະພັກທຸກຂັ້ນ ຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ແລະ ຄໍາແນະນໍາຂອງຄະນະກຳມະການເລືອກຕັ້ງລະດັບຊາດ ກ່ຽວກັບການໂຄສະນາ, ພົບປະປະຊາຊົນຜູ້ມີສິດເລືອກຕັ້ງຂອງຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ຊຶ່ງການເລືອກຕັ້ງແຕ່ລະຄັ້ງ ລ້ວນແຕ່ ເປັນເຫດການປະຫວັດສາດທີ່ສໍາຄັນຂອງຊາດ, ມີຄວາມໝາຍສໍາຄັນ ແລະ ຈຳເປັນໃນການເສີມຂະຫຍາຍສິດປະຊາທິປະໄຕຂອງປະຊາຊົນລາວບັນດາເຜົ່າ, ເພື່ອບູລະນະລະບອບປະຊາທິປະໄຕ, ປັບປຸງລະບົບອຳນາດລັດໃຫ້ມີຄວາມເຂັ້ມ ແຂງ ໂດຍຖືເອົາຄຸນທາດການເມືອງ, ຄຸນສົມບັດສິນທໍາປະຕິວັດເປັນກົກ, ຖືເອົາຄວາມຮູ້ຄວາມສາມາດ, ປະສົບການ ແລະ ຄຸນນະພາ ເປັນສິ່ງສໍາຄັນ.

    ພ້ອມນີ້, ທ່ານ ນາງ ສູນທອນ ໄຊຍະຈັກ ຍັງໄດ້ມີຄຳເຫັນຊີ້ນຳອີກວ່າ: ການພົບປະປະຊາຊົນແຕ່ລະບ່ອນ ໃນກໍລະນີຈັດຕັ້ງໃຫ້ຜູ້ສະໝັກຮັບເລືອກຕັ້ງຫລາຍທ່ານ ໄປໂຄສະນາຫາສຽງຢູ່ຈຸດດຽວ ຄວນມີການຈັດແບ່ງເວລາທີ່ເໝາະສົມ ເພື່ອໃຫ້ຜູ້ສະໝັກຮັບເລືອກຕັ້ງແຕ່ລະທ່ານ ໄດ້ມີໂອກາດອອກຄໍາເຫັນ ແລະ ເວລາອອກຄໍາເຫັນ ຂອງຜູ້ສະໝັກຮັບເລືອກຕັ້ງຄວນເລີ່ມຈາກການແນະນໍາຕົວໂດຍຫຍໍ້ ແລະ ມີຈຸດສຸມ, ຫລີກເວັ້ນການເວົ້າຍືດຍາວ, ໃຊ້ຄໍາສັບທີ່ສຸພາບງ່າຍດາຍ, ເຂົ້າໃຈງ່າຍ, ຈື່ໄດ້ດົນ ແລະ ພະຍາມຍາມສ້າງເງື່ອນໄຂໃຫ້ປະຊາຊົນ ໄດ້ສະເໜີຄໍາຄິດເຫັນ, ຄວາມມຸ່ງມາດປາຖະໜາ ແລະ ຄວາມສົນໃຈຂອງເຂົາເຈົ້າ, ຫລີກເວັ້ນລັກສະນະເວົ້າຄົນດຽວ ຫລື ມີຄໍາເຫັນຝ່າຍດຽວ ແລະ ໃນຕອນທ້າຍ, ຜູ້ສະໝັກຮັບເລືອກຕັ້ງແຕ່ລະທ່ານ ຕ້ອງສ້າງຄວາມໝັ້ນໃຈໃຫ້ແກ່ປະຊາຊົນ ໂດຍອາດໃຫ້ຄວາມໝັ້ນໝາຍວ່າ ຖ້າຕົນໄດ້ຮັບເລືອກຕັ້ງເປັນສະມາຊິກສະພາແຫ່ງຊາດ ຫລື ສະມາຊິກສະພາປະຊາຊົນຂັ້ນແຂວງແລ້ວ ຈະເອົາໃຈໃສ່ປະຕິບັດສິດ ແລະ ໜ້າທີ່ຂອງສະມາຊິກສະພາໃຫ້ດີທີ່ສຸດ ແລະ ຈະພະຍາຍາມໃກ້ຊິດຕິດແທດກັບປະຊາຊົນຕາມລະບຽບການ ເພື່ອນໍາເອົາແນວທາງນະໂຍບາຍຂອງພັກ, ແຜນພັດທະນາເສດຖະກິດ- ສັງຄົມຂອງຊາດ, ຂອງແຂວງ, ກົດໝາຍຕ່າງໆທີ່ກ່ຽວຂ້ອງ ທີ່ວາງອອກໃນແຕ່ລະໄລຍະມາຈັດຕັ້ງເຜີຍແຜ່ໃຫ້ປະຊາຊົນ, ພິຈາລະນາ, ຄົ້ນຄວ້າຄໍາສະເໜີຂອງປະຊາຊົນ ຢ່າງສົມເຫດສົມຜົນ ເພື່ອສະເໜີຕໍ່ການຈັດຕັ້ງທີ່ກ່ຽວຂ້ອງພິຈາລະນາ.

ຂ່າວ-ພາບ: ທະນູທອງ

KPL