KPL
ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດໃຫ້ຮູ້ວ່າ: ໃນໄລຍະແຕ່ກອງປະຊຸມປະຖົມມະລຶກຂອງສະພາແຫ່ງຊາດ ຊຸດທີ IX ຮອດປັດຈຸບັນ, ກຳມາທິການການຕ່າງປະເທດ ແລະ ບັນດາກຳມະການຂອງກຳມາທິການ ການຕ່າງປະເທດໄດ້ ເອົາໃຈໃສ່ປະຕິບັດພາລະບົດບາດ ແລະ ໜ້າທີ່ຂອງຕົນຢ່າງຫ້າວຫັນ ໃນການເປັນເສນາທິການຄົ້ນຄວ້າພິຈາລະນາການສ້າງ ແລະ ປັບປຸງກົດໝາຍໃນຂົງເຂດວຽກງານການຕ່າງປະເທດ
*ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດໃຫ້ຮູ້ວ່າ: ໃນໄລຍະແຕ່ກອງປະຊຸມປະຖົມມະລຶກຂອງສະພາແຫ່ງຊາດ ຊຸດທີ IX ຮອດປັດຈຸບັນ, ກຳມາທິການການຕ່າງປະເທດ ແລະ ບັນດາກຳມະການຂອງກຳມາທິການ ການຕ່າງປະເທດໄດ້ ເອົາໃຈໃສ່ປະຕິບັດພາລະບົດບາດ ແລະ ໜ້າທີ່ຂອງຕົນຢ່າງຫ້າວຫັນ ໃນການເປັນເສນາທິການຄົ້ນຄວ້າພິຈາລະນາການສ້າງ ແລະ ປັບປຸງກົດໝາຍໃນຂົງເຂດວຽກງານການຕ່າງປະເທດ, ໃນນັ້ນໄດ້ເຂົ້າຮ່ວມແຕ່ຫົວທີໃນການຄົ້ນຄວ້າກ່ຽວກັບການສ້າງກົດໝາຍວ່າດ້ວຍຊາຍແດນແຫ່ງຊາດ ຮ່ວມກັບກະຊວງການຕ່າງປະເທດ ແລະ ກຳມາທິການກ່ຽວຂ້ອງພາຍໃນສະພາແຫ່ງຊາດ ແລະ ໄດ້ຮັບຮອງເອົາຢູ່ໃນກອງປະຊຸມສະໄໝສາມັນ ເທື່ອທີ 02 ແລະ ກົດໝາຍວ່າດ້ວຍໜັງສືຜ່ານແດນ ທີ່ໄດ້ພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX; ໄດ້ປະສານສົມທົບກັບກຳມາທິການ ທີ່ກ່ຽວຂ້ອງຂອງສະພາແຫ່ງຊາດ ແລະ ຂະແໜງການຕ່າງໆຂອງລັດຖະບານ ນຳເອົາບັນດາກົດໝາຍຕ່າງໆເຂົ້າຜ່ານ ແລະ ຮັບຮອງເອົາ ຢູ່ກອງປະຊຸມສະໄໝສາມັນແຕ່ລະເທື່ອຂອງສະພາແຫ່ງຊາດ ຊຸດທີ IX.
ພ້ອມດຽວກັນນັ້ນ, ກໍ່ໄດ້ມີການຈັດກອງປະຊຸມແລກປ່ຽນບົດຮຽນ ກັບຝ່າຍຫວຽດນາມ ໃນຮູບແບບທາງໄກ່ຽວກັບກົດໝາຍວ່າດ້ວຍ ຊາຍແດນແຫ່ງຊາດ ແລະ ກົດໝາຍວ່າດ້ວຍການສຳຫລວດວັດແທກ ແລະ ແຜນທີ່ແຫ່ງຊາດ. ກຳມາທິການ ການຕ່າງປະເທດໃນນາມເປັນເສນາທິການໃຫ້ແກ່ສະພາແຫ່ງຊາດ ໄດ້ເອົາໃຈໃສ່ກະກຽມ ແລະ ຮ່າງເນື້ອໃນບົດບັນທຶກຄວາມເຂົ້າໃຈວ່າດ້ວຍການຮ່ວມມື (MOU) ກັບລັດຖະສະພາຕ່າງປະເທດເຊັ່ນ: ສະພາແຫ່ງຊາດຫວຽດນາມຈຳນວນ 03 ສະບັບ, ລັດຖະສະພາໄທ 01 ສະບັບ, ສະພາແຫ່ງຊາດ ກໍາປູເຈຍ 02 ສະບັບ, ລົງນາມບົດບັນທຶກຄວາມເຂ້ົາໃຈວ່າດ້ວຍການຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ກັບຄະນະເລຂາທິການສະພາຄູຣານໃຫຍ່ມົງໂກລີ 01 ສະບັບ, ສະພາຄູຣານໃຫຍ່ແຫ່ງ ມົງໂກລີ 01 ສະບັບ ແລະ ສະພາຜູ້ແທນປະຊາຊົນທົ່ວປະເທດຈີນ 1 ສະບັບ; ໄດ້ເຊັນບົດບັນທຶກວ່າດ້ວຍການຍົກລະດັບກອງປະຊຸມສາມສະພາແຫ່ງຊາດກຳປູເຈຍ, ລາວ, ຫວຽດນາມ (CLV); ລົງນາມບົດບັນທຶກວ່າດ້ວຍການຮ່ວມມື ແລະ ການປະສານງານລະຫວ່າງກຳມາທິການ ການຕ່າງປະເທດສະພາແຫ່ງຊາດ ແລະ ກະຊວງການຕ່າງປະເທດ 01 ສະບັບ, ຄົ້ນຄວ້າແລະລາຍງານກ່ຽວກັບຮ່າງບົດບັນທຶກການຮ່ວມ ມື 08 ສະບັບ.
ນອກນັ້ນ, ກໍາມາທິການການຕ່າງປະເທດ ຍັງເປັນເຈົ້າການໃນ ການຮ່າງມະຕິຕົກລົງຂອງຄະນະປະຈໍາສະພາແຫ່ງຊາດວ່າດ້ວຍ ການພິຈາລະນາໃຫ້ສັດຕະຍາບັນ ແກ່ສົນທິສັນຍາໂດຍການປະສານສົມທົບກັນກັບບັນດາກໍາມາທິການ ທີ່ກ່ຽວຂ້ອງພາຍໃນສະພາແຫ່ງຊາດ ຄົ້ນຄວ້າ ແລະ ນໍາເອົາບັນດາສົນທິສັນຍາ, ສັນຍາສາກົນເຂົ້າກອງປະຊຸມຄະນະປະຈໍາສະພາແຫ່ງຊາດ ໃນການພິຈາລະນາ ແລະ ຕົກລົງເຂົ້າຮ່ວມເປັນພາຄີແລະໃຫ້ສັດຕະຍາບັນແກ່ສົນທິສັນຍາສາກົນຈຳນວນ 04 ສະບັບ.
ພ້ອມດຽວກັນນ້ີ, ກໍາມາທິການການຕ່າງປະເທດ ໃນນາມເປັນເສນາທິການໃຫ້ແກ່ຄະນະປະຈໍາສະພາແຫ່ງຊາດ ໃນການເຄື່ອນໄຫວວຽກງານການຕ່າງປະເທດ ໃນກອບສອງຝ່າຍ ແລະ ຫລາຍຝ່າຍ. ສຸດທ້າຍເພື່ອເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມມີປະສິດທິຜົນທຸກພາກສ່ວນຄວນເອົາໃຈໃສ່ບາງບັນຫາດັ່ງນີ້: ໃນຍຸກປັດຈຸບັນນີ້, ສປປ ລາວ ພວກເຮົາກໍາລັງພົບກັບຄວາມຫຍຸ້ງຍາກທາງດ້ານເສດຖະກິດ-ການເງິນຫລາຍ ບັນຫາໂດຍສະເພາະບັນຫາການເໜັງຕີງຂອງອັດຕາແລກປ່ຽນ, ລາຄາສິນຄ້າເພີ່ມຂຶ້ນສູງ, ບັນຫາ ເງິນເຟີ້ ແລະ ໜີ້ສິນຕ່າງປະເທດ; ສະນັ້ນ, ທຸກຄົນ, ນິຕິບຸກຄົນ, ພາກລັດ, ເອກະຊົນ ຕ້ອງໄດ້ຈັດຕັ້ງປະຕິບັດບັນດາກົດໜາຍທີ່ໄດ້ປະກາດໃຊ້ 167 ສະບັບໃຫ້ເຂັ້ມງວດລວມ ທັງບັງຄັບໃຊ້ບັນດາມາດຕະການທີ່ໄດ້ວາງອອກແລ້ວນັ້ນໃຫ້ປະກົດຜົນເປັນຈິງ ແລະ ເປັນຮູບປະທຳຫລາຍຂຶ້ນ; ປັບປຸງສະພາບແວດລ້ອມ ແລະ ນະໂຍບາຍສົ່ງເສີມການລົງທຶນ ແລະ ການດຳເນີນທຸລະກິດຢູ່ ສປປ ລາວ ໃຫ້ແຂງແຮງກວ່າເກົ່າ ແລະ ສາມາດຕັດຂັ້ນຂອດທີ່ອຸດຕັນອອກໃຫ້ໄດ້; ສຸມໃສ່ຕິດຕາມກວດກາບັນດາໂຄງການລົງທຶນທີ່ໄດ້ຮັບອະນຸມັດຜ່ານມາ, ໂຄງການໃດທີ່ບໍ່ມີຄວາມຄືບໜ້າ ຫລື ມີຄວາມຄືບໜ້າຊ້າ; ເລັ່ງປັບປຸງຂັ້ນຂອດການບໍລິການຂົນສົ່ງສິນຄ້າຜ່ານດ່ານຊາຍແດນ ແລະ ບັນດາທ່າບົກໃຫ້ງ່າຍດາຍ, ວ່ອງໄວ, ສະດວກກວ່າເກົ່າ ແລະ ຫລຸດຄ່າໃຊ້ຈ່າຍທີ່ບໍ່ຈຳເປັນເພື່ອສາມາດແຂ່ງຂັນໃນການເຊື່ອມຈອດ ແລະ ເຊື່ອມໂຍງກັບສາກົນ ໂດຍເລັ່ງຄົ້ນຄວ້າການເກັບຄ່າບໍລິການຜ່ານທ່າບົກ, ການຂົນສົ່ງສິນຄ້າຜ່ານທາງລົດໄຟ, ທາງລົດບັນທຸກຂົນສົ່ງສິນຄ້າ, ຄ່າທຳນຽມ, ຄ່າບໍລິການຜ່ານດ່ານ ໃຫ້ເໝາະສົມ ແລະ ເປັນເອກະພາບກັນ; ສົ່ງເສີມການຜະລິດກະສິກໍາ ທີ່ຕິດພັນກັບການບໍລິການ ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແລະ ເປັນສິນຄ້າສົ່ງອອກໃຫ້ຫລາຍ; ສືບຕໍ່ສົ່ງເສີມຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ຂະໜາດກາໃຫ້ແຂງແຮງກວ່າເກົ່າ
ບົດໂດຍ: ມາລີດາ
KPL