*ທ່ານ ຄໍາຈັນ ໂສຕາປະເສີດປະທານກໍາມາທິການບັນດາເຜົ່າ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ ໃຫ້ຮູ້ວ່າ:  ກໍາມາທິການບັນດາເຜົ່າປະຕິບັດ 03 ພາລະບົດບາດຂອງສະພາແຫ່ງຊາດ ລົງເລິກເຂດຄວາມຮັບຜິດຊອບວຽກງານພັດທະນາຊົນນະບົດ-ແກ້ໄຂຄວາມທຸກຍາກ, ວຽກງານຊົນເຜົ່າ-ສາສະໜາ, ວຽກງານ 03 ສ້າງ, ການປົກຄອງທ້ອງຖິ່ນ ແລະ ວຽກງານອື່ນໆ  ໃນການຕິດຕາມກວດກາການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຕາມມະຕິ 82/ສພຊ ຕິດພັນກັບການຍົກສູງພາລະບົດບາດການຕິດຕາມກວດກາຂອງບັນດາທ່ານ ສສຊ ແລະ ສສຂ ທີ່ສັງກັດກໍາມາທິການບັນດາເຜົ່າປະຈໍາຢູ່ເຂດ ເລືອກຕັ້ງຕ່າງໆທົ່ວປະເທດ ຕໍ່ກັບວຽກງານດັ່ງກ່າວ ແລະ ນໍາເອົາວຽກງານພັດທະນາຊົນນະບົດເຂົ້າໃນກອງປະຊຸມສະໄໝສາມັນ ເທື່ອທີ 7 ແລະ ກອງປະຊຸມຮັບຮອງເອົົາເປັນມະຕິສະເພາະ ເພື່ອຍົກສູງຄວາມເອົາໃຈໃສ່ໃນວຽກງານນ້ີ ໃຫ້ບັນລຸຄາດໝາຍທີ່ກໍານົດຕາມມະຕິສະພາແຫ່ງຊາດ ແລະ ມະຕິສະ ພາປະຊາຊົນແຂວງ.

    ພ້ອມດຽວກັນໃນຕໍ່ໜ້າ ກໍ່ມີຫລາຍເປົ້າໝາຍທີ່ຈະສຸມໃສ່ຈັດຕັ້ງປະຕິບັດໜຶ່ງໃນນັ້ນ ແມ່ນຈະສຸມໃສ່ການຕິດຕາມກວດກາການຈັດຕັ້ງປະຕິບັດບັນດາຄາດໝາຍ ຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຕາມມະຕິ 118 / ສພຊ, ລົງວັນທີ 21 ພະຈິກ 2023: ສ້າງຄອບຄົວພົ້ນທຸກໃຫ້ໄດ້ 35.000 ຄອບຄົວ, ສ້າງບ້ານພົ້ນທຸກໃຫ້ໄດ້ 500 ບ້ານ, ສ້າງເມືອງພົ້ນທຸກໃຫ້ໄດ້ 15 ເມືອງ, ສ້າງຄອບຄົວພັດທະນາໃຫ້ໄດ້ 33.000 ຄອບຄົວ, ສ້າງບ້ານພັດທະນາໃຫ້ໄດ້ 500 ບ້ານ, ສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດໃຫ້ໄດ້ 4 ບ້ານ, ສ້າງ ເມືອງເຂັ້ມແຂງຮອບດ້ານໃຫ້ໄດ້ 4 ເມືອງ, ຈັດສັນພູມລໍາເນົາ ແລະ ອາຊີບໝັ້ນຄົງຖາວອນໃຫ້ປະຊາຊົນໃຫ້ໄດ້ 1.156 ຄອບຄົວ; ຂະ ຫຍາຍກອງທຶນພັດທະນາຂັ້ນບ້ານຂອງເມືອງທຸກຍາກ ບ້ວງ 500 ລ້ານກີບ ໃຫ້ໄດ້ 14 ບ້ານ.  ສຸດທ້າຍເພື່ອເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມ ມີປະສິດທິຜົນກ່ອນອື່ນທຸກພາກສ່ວນຄວນເອົາໃຈໃສ່ປັບປຸງບັນຫາດ້ານບຸກຄະລາກອນຂອງ ແຕ່ລະພາກສ່ວນໃຫ້ມີຄວາມຮັບຮູ້, ຄວາມເຂົ້າໃຈ ແລະ ປະຕິບັດກົດ ໝາຍ ແລະ ລະບຽບການທີ່ພັກ-ລັດວາງອອກຕາມແຕ່ລະໄລຍະຢ່າງເຂັ້ມງວດ; ມີສະຕິຕື່ນຕົວ, ມີຄວາມເປັນເຈົ້າການຕໍ່ໜ້າທີ່ວຽກງານ ແລະ ຫັນປ່ຽນແນວຄິດຈິນຕະນາການໃຫ້ແທດເໝາະກັບສະພາບຄວາມຮຽກຮ້ອງຕ້ອງການຂອງວຽກງານຕົວຈິງໃນປັດຈຸບັນ.

ບົດໂດຍ: ມາລີດາ

KPL