ຂປລ
ຂປລ. ສວນນໍ້າທິດາເພັດ ຈາກນະຄອນປາກເຊ ແຂວງຈໍາປາສັກ ແມ່ນສະຖານທີ່ທ່ອງທ່ຽວ ທີ່ພວມໄດ້ຮັບຄວາມນິຍົມຊົມຊອບ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງຈາກວ່າສວນແຫ່ງນີ້ເປັນສູນລວມການຮຽນຮູ້ ດ້ານການປູກຝັງ-ລ້ຽງສັດ
ຂປລ. ສວນນໍ້າທິດາເພັດ ຈາກນະຄອນປາກເຊ ແຂວງຈໍາປາສັກ ແມ່ນສະຖານທີ່ທ່ອງທ່ຽວ ທີ່ພວມໄດ້ຮັບຄວາມນິຍົມຊົມຊອບ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງຈາກວ່າສວນແຫ່ງນີ້ເປັນສູນລວມການຮຽນຮູ້ ດ້ານການປູກຝັງ-ລ້ຽງສັດ ໂດຍມີການຈັດໂຊນຕ່າງໆຢ່າງສວຍງາມເປັນຕົ້ນ ການປູກເຂົ້າ, ປູກຕົ້ນໄມ້ໃຫ້ໝາກ, ລ້ຽງສັດ ແລະ ການທ່ອງທ່ຽວທາງທໍາມະຊາດ ຈະພັດທະນາປັບປຸງແຄມຫ້ວຍໂຕະໂໝະ, ເຮັດກັນເຈື່ອນ, ປູກຕົ້ນໄມ້ປະດັບເພື່ອຮັກສາພື້ນທີ່ ສີຂຽວໃຫ້ມີຄວາມສວຍສົດງົດງາມ.ແນວໃດກໍດີ, ເພື່ອເປັນການສະເຫລີມສະຫລອງ ບຸນປີ
ໃໝ່ລາວທີ່ໃກ້ຈະມາເຖິງນີ້ ກໍມີຫລາຍກິດຈະກໍາເພື່ອຕ້ອນຮັບນັກທ່ອງທ່ຽວ.
ທ່ານ ນາງ ພອນປະດິດ ແພງສັກເມືອງ ຜູ້ພັດທະນາ ສວນນໍ້າທິດາເພັດ ໃຫ້ຮູ້ວ່າ: ເຖິງວ່າທຸລະກິດ ແຫລ່ງທ່ອງທ່ຽວສວນນໍ້າທິດາເພັດ ໄດ້ຮັບການພັດທະນາຢ່າງຕໍ່ເນື່ອງ, ແຕ່ຖ້າທຽບໃສ່ຄວາມຮຽກຮ້ອງຕ້ອງການທາງດ້ານການທ່ອງທ່ຽວ ກໍຄື ການຊົມໃຊ້ບໍລິການຂອງນັກທ່ອງທ່ຽວ ເຫັນວ່າຍັງມີບາງດ້ານຕ້ອງໄດ້ປັບປຸງໃຫ້ດີຂຶ້ນ. ສໍາລັບໄລຍະສະເຫລີມສະຫລອງບຸນປີໃໝ່ລາວ ພສ 2569 ທີ່ຈະຈັດຂຶ້ນໃນວັນທີ 14 - 16 ເມສາ 2026 ນີ້, ກໍມີການບໍລິການແບບປົກກະຕິຄືທີ່ຜ່ານມາ, ພິເສດໃນໄລຍະບຸນປີໃໝ່ລາວ ປີນີ້ ຢູ່ສວນນໍ້າທິດາເພັດ ຈະບໍ່ໄດ້ເກັບຄ່າເຂົ້າຊົມ, ບໍ່ໄດ້ເກັບຄ່າຝາກລົດ, ຄ່າບ່ອນນັ່ງ ແລະ ຄ່າຕູບກໍບໍ່ໄດ້ເກັບ, ມີການບໍລິການອາຫານ, ເຄື່ອງດື່ມ, ມີກາເຟແຊບໆ, ນໍ້າ
ໝາກພ້າວຫວານໆ ແຕ່ລາຄາບໍ່ແພງ ເພື່ອບໍລິການລູກຄ້າ. ນອກນີ້
, ສວນນໍ້າທິດາເພັດ ຍັງມີກິດຈະກໍາດີໆສໍາລັບເດັກນ້ອຍ. ທັງນີ້ ກໍເພື່ອສ້າງໃຫ້ສວນນໍ້າທິດາເພັດ ເປັນສວນຕົວແບບໃຫ້ນັກຮຽນໄດ້ເຂົ້າມາທັດສະນະສຶກສາກ່ຽວກັບປະເພດຕົ້ນໄມ້ຕ່າງໆ ເພື່ອປູກຈິດສໍານຶກໃຫ້ລູກຫລານຮູ້ຮັກທໍາມະຊາດ, ສິ່ງແວດລ້ອມ ແລະ ເປີດກ້ວາງໃຫ້ອົງກອນຕ່າງໆໄດ້ເຂົ້າມາຈັດກິດຈະກຳ ຕາມເເຕ່ລະໂອກາດວັນສໍາຄັນຕ່າງໆ.
ທ່ານ ນາງ ພອນປະດິດ ກ່າວຕື່ມວ່າ: ການພັດທະນາແຫລ່ງທ່ອງທ່ຽວສວນນໍ້າທິດາເພັດ ແມ່ນພັດທະນາໃນຮູບແບບກະສິກຳ ໂດຍຖືເອົາວຽກງານກະສິກຳ ເປັນບູລິມະສິດໜຶ່ງ ໃນການພັດທະນາ ເພື່ອສົ່ງເສີມການຜະລິດເປັນສິນຄ້າ, ການບໍລິການສ້າງວຽກເຮັດງານທໍາ, ສ້າງລາຍຮັບ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ. ສວນນໍ້າທິດາເພັດ ມີຄວາມສວຍສົດງົດງາມ, ມີສາຍນໍ້າທໍາມະຊາດໄຫລຜ່ານຕະຫລອດປີຈິ່ງເໝາະສົມສໍາລັບພັກຜ່ອນ ແລະ ທ່ອງທ່ຽວໂດຍສະເພາະໃນສະພາບອາກາດຮ້ອນໆແບບນີ້. ສະຖານທີ່ທ່ອງທ່ຽວສວນນໍ້າທິດາເພັດ ຢູ່ບ້ານຫລັກ 40 ເມືອງປະທຸມພອນ ແຂວງຈໍາປາສັກ ໄລຍະປີ 2015 - 2018, ໄດ້ຮັບຄວາມນິຍົມຊົມຊອບຈາກສັງຄົມເປັນຢ່າງດີ ໃນດ້ານການທ່ອງທ່ຽວສີຂຽວ ຈຶ່ງໄດ້ຂະຫຍາຍໃຫ້ມີສະຖານທີ່ບໍລິການໃຫ້ພຽງພໍ ໂດຍເປີດຮ້ານອາຫານບໍລິການ ໃນໄລຍະວັນເສົາ - ວັນອາທິດ ແລະ ເທດສະການວັນສໍາຄັນຕ່າງໆ, ຄຽງຄູ່ກັນນີ້ ກໍໄດ້ເລີ່ມປູກຕົ້ນໄມ້ໃຫ້ໝາກ ແລະ ລ້ຽງສັດຈໍານວນໜຶ່ງ ເຊັ່ນ: ລ້ຽງປາ, ງົວ, ຂົກກະຈອກ ແລະ ໝູປ່າ. ໃນປີ 2019 - 2023, ເຖິງວ່າຈະໄດ້ຮັບຜົນກະທົບຢ່າງໜັກໜ່ວງຈາກໄພພິບັດນໍ້າຖ້ວມ ແລະ ການລະບາດຂອງພະຍາດໂຄວິດ-19 ແລະ ວິດກິດການໄພເງີນເຟີ້ ແຕ່ຜູ້ພັດທະນ່ສວນນໍ້າທິດາເພັດ ບໍ່ໄດ້ລົດລະຄວາມພະຍາຍາມ ແລະ ໄດ້ຫັນວິກິດໃຫ້ກາຍເປັນໂອກາດ, ໂດຍໄດ້ມີການປັບປຸງພື້ນທີ່ທໍາການຜະລິດ ໃນຂອບເຂດເນື້ອທີ່ 60 ເຮັກຕາ, ເປັນໂຊນທ່ອງທ່ຽວ 4 ເຮັກຕາ ຂອງຈໍານວນເນື້ອທີ່ທັງໝົດ ເພື່ອໃຫ້ສອດຄ່ອງຕາມແຜນພັດທະນາເສດຖະກິດ ຈິ່ງໄດ້ຂໍອະນຸຍາດຈົດທະບຽນດຳເນີນທຸລະກິດ ເປັນທິດາເພັດຟາມ ຂຶ້ນເຊິ່ງໄດ້ຮັບທຶນສະໜັບສະໜູນຈາກ ທະນາຄານຮ່ວມທຸລະກິດລາວ-ຫວຽດ ຈໍານວນໜຶ່ງ, ເປົ້າໝາຍກໍເພື່ອພັດທະນາເປັນແຫລ່ງທ່ອງທ່ຽວໃນຮູບແບບກະສິກຳ. ເລີ່ມແຕ່ກາງປີ 2024 ຈົນຮອດປະຈຸບັນ ໄດ້ມີການປັບປຸງຮ້ານອາຫານ, ສະຖານທີ່ບໍລິການພັກຜ່ອນ, ມີການບໍລິການແບບແຄ້ມປິ້ງ, ມີສັດລ້ຽງໄວ້ໃຫ້ນັກທ່ອງທ່ຽວໄດ້ທ່ຽວຊົມເປັນຕົ້ນແມ່ນນົກກະຈອກເທບ, ແກະ, ນົກຍຸງ ແລະ ອື່ນໆ.
ໂດຍ: ທູນທອງໃຈ
KPL
