ຂປລ. ສະຫາຍ ແຫລ້ ເພັງສີ ຮອງເລຂາໜ່ວຍພັກໄດ້ລາຍງານໃນປະຊຸມໃຫຍ່ ໜ່ວຍພັກຫ້ອງການກະສິກຳແລະ ສິ່ງແວ້ດລ້ອມ ເມືອງທ່າພະບາດຄັ້ງທີ I ແຂວງບໍລິຄຳໄຊ ເມື່ອມໍ່ໆນີ້ວ່າ:   ໜ່ວຍພັກຂອງຫ້ອງການກະສິກຳ ແລະ ສິ່ງແວ້ດລ້ອມແມ່ນໜ່ວຍພັກໜຶ່ງ ທີ່ໄດ້ຮັບການແຕ່ງຕັ້ງຂຶ້ນໃໝ່ ພາຍໃຕ້ການນຳ ພາ-ຊີ້ນຳ ຂອງອົງຄະນະພັກເມືອງທ່າພະບາດ ມີໜ້າທີ່ເປັນເສນາໂດຍກົງ ໃນການຈັດຕັ້ງຜັນຂະຫຍາຍວຽກງານດ້ານກະສິກຳ ແລະ ສິ່ງແວດລ້ອມ ໃຫ້ແກ່ຄະນະພັກເມືອງ ແລະ ພະແນກກະສິກຳ ແລະ ສິ່ງແວດລ້ອມແຂວງ. ພາຍໃນໜ່ວຍພັກມີສະມາຊິກພັກ ທັງໝົດ 40 ສະຫາຍ, ຍິງ 12 ສະຫາຍ.

ຕະຫລອດໄລຍະຜ່ານມາ ໄດ້ເອົາໃຈໃສ່ນຳພາ-ຊີ້ນຳ ແລະ ສຶກສາອົບຮົມດ້ານການເມືອງ-ແນວຄິດໃຫ້ແກ່ສະມາຊິກພັກ, ພະນັກງານໄດ້ຮັບຮູ້, ເຂົ້າໃຈ ແລະ ໃຫ້ເຫັນຄວາມໝາຍ ຄວາມສຳຄັນຂອງວຽກງານປ້ອງກັນຊາດປ້ອງກັນຄວາມສະຫງົບ, ຊຸກຍູ້ສົ່ງເສີມ ແລະ ສ້າງເງື່ອນໄຂທາງດ້ານການຜະລິດເປັນສິນຄ້າ ກໍໄດ້ມີການຂະຫຍາຍຕົວຢ່າງຕໍ່ເນື່ອງ ໂດຍສຸມໃສ່ເຕັກນິກທີ່ທັນສະໄໝເຂົ້າຊ່ວຍໃນການຜະລິດເປັນສິນຄ້າ, ອຳນວຍຄວາມສະດວກໃຫ້ແກ່ຊາວກະສິກອນ, ໄດ້ລົງແນະນຳ ຕິດຕາມໃນການປູກຝັງ ລ້ຽງສັດ-ການປະມົງ ໃຫ້ແກ່ປະຊາຊົນ ເຫັນວ່າມີການຂະຫຍາຍຕົວ, ມີປັດໄຈໃໝ່ເພີ່ມຂຶ້ນ ໂດຍສະເພາະແມ່ນການນຳໃຊ້ແນວພັນປັບປຸງ ແລະ ກ້າວໄປລ້ຽງສັດແບບເປັນກຸ່ມ, ເປັນຟາມເພີ່ມຂຶ້ນໃນແຕ່ລະບ້ານ ຊຶ່ງສະແດງອອກໃຫ້ເຫັນໃນສະຖິຕິປີ 2024 ແລະ ຫັນໃຫ້ເຂົ້າສູ່ລະບົບລະບຽບການຢ່າງເຂັ້ມງວດ.

 ບັນດາອົງການຈັດຕັ້ງມະຫາຊົນໄດ້ເຄື່ອນໄຫວຕາມພາລະບົບບາດ, ສິດ ແລະ ໜ້າທີ່ຂອງຕົນ, ມີການຮ່ວມຊີວິດ, ເສຍເງິນສະຕິເປັນປົກກະຕິ, ປັບປຸງການຈັດຕັ້ງພັກໃຫ້ມີຄວາມເຂັ້ມແຂງ ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາໃຫ້ແທດເໝາະກັບຄວາມເປັນຈິງໂດຍສະເພາະຖືສຳຄັນດ້ານການເມືອງ-ແນວຄິດໄດ້ຈັດຕັ້ງດຳເນີນໃນຫລາຍຮູບການ, ເອົາມະຫາຊົນກໍ່ສ້າງພັກ, ດຳເນີນຊີວິດການເມືອງ, ຮ່ວມຊີວິດປະຈຳເດືອນ ຕີລາຄາຈັດປະເພດສະມາຊິກພັກແຂງກວມເອົາ 100% ຂອງສະມາຊິກພັກທັງໝົດ, ສ້າງເງື່ອນໄຂອໍານວຍຄວາມສະດວກໃຫ້ໜ່ວຍພັກ, ພະນັກງານ-ລັດຖະກອນໄດ້ເຄື່ອນໄຫວຕາມພາລະບົດບາດ, ໜ້າທີ່ ແລະ ຂອບເຂດຂອງແຕ່ລະໜ້າວຽກ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງບັນດາໜ້າວຽກ. ສະຫາຍ ແຫລ້ ເພັງສີ ກ່າວ. 

ກອງປະຊຸມໃຫຍ່ຄັ້ງນີ້ ບັນດາສະມາຊິກພັກໄດ້ໃຊ້ສິດປະຊາທິປະໄຕຂອງຕົນເລືອກເອົາເລຂາໜ່ວຍພັກຊຸດໃໝ່ ຈາກຜູ້ຮັບລົງສະໝັກ 5 ສະຫາຍ, ຍິງ 0 ສະຫາຍ. ໃນນັ້ນ, ເລືອກເອົາ ສະຫາຍ ຄຳເບົ້າ ໄພມະນີວົງ ເປັນເລຂາໜ່ວຍພັກຫ້ອງການກະສິກຳ ແລະ ສິ່ງແວດລ້ອມເມືອງທ່າພະບາດ, ສະຫາຍ ແຫລ້ ເພັງສີ ເປັນຮອງເລຂາ ແລະ ສະຫາຍ ເຄນ ດວງອຸດົມ ເປັນຜູ້ກວດກາ.

KPL