ຂປລ
ກອງປະຊຸມ ວຽກງານ ຂອງສະຖາບັນ ການປົກຄອງ ທົ່ວປະເທດຈີນ ໄດ້ຈັດຂຶ້ນ ເມື່ອບໍ່ດົນມານີ້ ຢູ່ນະຄອນຫລວງ ປັກກິ່ງ.
ຂປລ.ວິທະຍຸ-ໂທລະພາບ ສູນກາງຈີນ ຫລື CMG. ກອງປະຊຸມ ວຽກງານ ຂອງສະຖາບັນ ການປົກຄອງ ທົ່ວປະເທດຈີນ ໄດ້ຈັດຂຶ້ນ ເມື່ອບໍ່ດົນມານີ້ ຢູ່ນະຄອນຫລວງ ປັກກິ່ງ.ທ່ານ ສີ ຈິ້ນຜິງ, ເລຂາທິການໃຫຍ່ ຄະນະກຳມະການ ສູນກາງພັກ ກອມມູນິດຈີນ, ປະທານ ປະເທດຈີນ, ປະທານ ຄະນະກຳມະການ ການທະຫານ ສູນກາງຈີນ ໄດ້ໃຫ້ຄຳຊີ້ນຳສຳຄັນຕໍ່ ວຽກງານ ຂອງສະຖາບັນ ດັ່ງກ່າວ ໂດຍໄດ້ຢືນຢັນ ຢ່າງເຕັມທີ່ ຕໍ່ຜົນງານໃໝ່ ນັບຕັ້ງແຕ່ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 18 ຂອງພັກກອມມູນິດຈີນ ເປັນຕົ້ນມາ ຂອງສະຖາບັນ ການປົກຄອງຂັ້ນຕ່າງໆ ໃນດ້ານຄຸນນະພາບການຮຽນ-ການສອນ, ການຄົ້ນຄ້ວາ ວິທະຍາສາດ ແລະ ການປະດິດສ້າງ. ທ່ານ ສີ ຈິ້ນຜິງ ເນັ້ນໜັກວ່າ: ໃນຂະບວນການໃໝ່, ຕ້ອງຍຶດໝັ້ນ ຖືເອົາແນວຄິດ ສັງຄົມນິຍົມ ທີ່ມີສີສັນພິເສດຂອງ ສປ ຈີນ ໃນຍຸກໃໝ່ ເປັນທິດຊີ້ນຳ, ລົງເລິກການປະຕິຮູບ ການຮຽນ-ການສອນ, ເພີ່ມທະວີ ການສຶກສາອົບຮົມ ດ້ານທິດສະດີພັກ, ການຝຶກຝົນ ຫລໍ່ຫລອມ ຕໍ່ສະຕິພັກ ແລະ ການອົບຮົມ ຄວາມສາມາດ ໃນການປະຕິບັດໜ້າທີ່, ເພີ່ມທະວີ ການຄົ້ນຄວ້າ ທິດສະດີພັກ ທີ່ມີການປະດິສ້າງ ຢ່າງເປັນລະບົບ, ເສີມຂະຫຍາຍ ບົດບາດຂອງຄັງປັນຍາ. ພ້ອມນີ້ ທ່ານ ສີ ຈິ້ນຜິງ ຍັງໄດ້ຮຽກຮ້ອງ ໃຫ້ຍຶດໝັ້ນ ການຄຸ້ມຄອງ ສະຖາບັນ ຢ່າງເຂັ້ມງວດ, ສ້າງສະຖາບັນ ດ້ວຍຄຸນນະພາບດີ, ສ້າງຖັນແຖວ ຄູສອນ ໃຫ້ເຂັ້ມແຂງ, ຄຸ້ມຄອງນັກສຶກສາ ຢ່າງເຂັ້ມງວດ. ຄະນະພັກຂັ້ນຕ່າງໆ ຕ້ອງເພີ່ມທະວີ ການຮັບປະກັນ ແລະ ການສະໜັບ ສະໜູນ, ຊຸກຍູ້ໃຫ້ວຽກງານ ຂອງສະຖາບັນ ການປົກຄອງ ພັດທະນາ ດ້ວຍຄຸນນະພາບສູງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
