ຂປລ. ໃນໄລຍະ 6 ເດືອນຕົ້ນປີ 2025 ນີ້, ຄະນະພັກ-ອົງການປົກຄອງ ແຂວງຊຽງຂວາງ ໄດ້ເອົາໃຈໃສ່ນໍາພາ-ຊີ້ນຳ ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຂອງແຂວງຕິດພັນກັບ ວຽກງານ 3 ສ້າງ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ເຮັດໃຫ້ ຈັງຫວະການຂະຫຍາຍຕົວ ຂອງເສດຖະກິດ ມີທ່າອ່ຽງເພີ່ມຂຶ້ນ ແລະ ລື່ນຄາດໝາຍທີ່ໄດ້ວາງໄວ້ ເປັນຕົ້ນ ຄາດຄະເນປີ 2025 ເສດຖະກິດ ຈະຂະຫຍາຍຕົວຢູ່ໃນລະດັບ 6% ລວມຍອດຜະລິດຕະພັນພາຍໃນ (GDP) ໃຫ້ບັນລຸ 6.858,61 ຕື້ກີບ, ລາຍ​ຮັບ​ສະ​ເລ່ຍຕໍ່ຫົວຄົນຈະບັນລຸໄດ້ 1.153 ໂດລາ/ຄົນ/ປີ.

ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ໃຫ້ສຳພາດ ໃນໂອກາດເຂົ້າຮ່ວມກອງປະຊຸມ ລັດຖະບານເປີດກວ້າງ ຄັ້ງທີ 1 ປີ 2025 ໃນວັນທີ 15 ກໍລະກົດ 2025 ນີ້ວ່າ: ໃນໄລຍະ 6 ເດືອນຕົ້ນປີ 2025 ນີ້, ແຂວງຊຽງຂວາງ ໄດ້ສຸມໃສ່ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຕິດພັນກັບຫລາຍບັນຫາສຳຄັນ ເຮັດໃຫ້ເສດ ຖະກິິດຂອງແຂວງມີທ່າອ່ຽງ ຂະຫຍາຍຕົວຢ່າງຕໍ່ເນື່ອງ ເປັນຕົ້ນ ໄດ້ເອົາໃຈໃສ່ລະດົມ ການລົງທຶນທົ່ວສັງຄົມໄດ້ທັງໝົດ 2.481 ຕື້ກີບ, ສາມາດຈັດເກັບລາຍຮັບທ້ອງຖິ່ນ ເຂົ້າງົບປະມານໄດ້ 171 ກວ່າຕື້ກີບ ເທົ່າກັບ 59% ຂອງແຜນການປີ, ຄຸ້ມຄອງ ແລະ ປະຕິບັດລາຍຈ່າຍໄດ້ 378 ກວ່າຕື້ກີບ ເທົ່າກັບ 43% ຂອງແຜນການ, 6 ເດືອນຕົ້ນປີຂາດດູນງົບປະມານ 207 ຕື້ກີບ. ພ້ອມນີ້, ຍັງໄດ້ສຸມໃສ່ການຜະລິດກະສິກໍາ ປູກພືດສະບຽງອາຫານ ແລະ ພືດເປັນສິນຄ້າ ເປັນຕົ້ນ ແມ່ນການປູກເຂົ້າ ມາຮອດປັດຈຸບັນ, ສາມາດປັກດໍາ ເຂົ້ານາແຊງໄດ້ທັງໝົດ 150 ເຮັກຕາ, ເກັບກູ້ຜົນຜະລິດເຂົ້ານາແຊງ ໄດ້ 630 ໂຕນ, ປັກດໍາເຂົ້ານາປີສໍາເລັດ 90%. ນອກນັ້ນ, ຍັງສຸມໃສ່ການປູກສາລີ ແລະ ພືດຜັກລວມຕ່າງໆ. ອັນທີ່ພົ້ນເດັ່ນມາຮອດປັດຈຸບັນ, ມີງົວພັນນົມທັງໝົດ 4.000 ກວ່າໂຕ. ໃນນັ້ນ, ງົວທີ່ສາມາດໃຫ້ນົມໄດ້ມີ 1.800 ໂຕ, ສາມາດຜະລິດນົມສົດ ສົ່ງອອກໄປ ສສ ຫວຽດນາມ ສະເລ່ຍ 60 ໂຕນຕໍ່ມື້; ການສົ່ງ​ອອກສິນຄ້າ ບັນລຸໄດ້ 778 ຕື້ກີບ, ເທົ່າກັບ 48% ຂອງແຜນການປີ; ການນໍາເຂົ້າສິນຄ້າ ປະຕິບັດໄດ້ 469 ຕື້ກີບ, ເທົ່າກັບ 41% ຂອງແຜນການປີ, ໄລ​ຍະ 6 ເດືອນ​ຕົ້ນ​ປີ 2025 ແຂວງເກີນດູນການຄ້າ ມູນຄ່າ 309 ຕື້ກີບ,

ສຳລັບວຽກ​ງານ​​ລຶບ​ລ້າງ​ຄວາມ​ທຸກ​ຍາກ ແຂວງຊຽງຂວາງ ໄດ້​ເອົາ​ໃຈ​ໃສ່​ນຳ​ພາ​ຈັດ​ຕັ້ງ​ຜັນ​ຂະ​ຫ​ຍາຍ ແລະ ປະຕິບັດບັນດາ​​ມະ​ຕິ​, ຄຳ​ສັ່ງ, ບົດ​ແນະ​ນຳ ແລະ ນິ​ຕິ​ກຳ​ຕ່າງໆ ທີ່​ຂັ້ນ​ເທິງ ແລະ ຂັ້ນ​ແຂວງວາງ​ອອກ​ ຢ່າງ​ຕໍ່​ເນື່ອງ ເຮັດໃຫ້​ຊີ​ວິດ​ການ​ເປັນ​ຢູ່ຂອງ​ປະ​ຊາ​ຊົນ​ ມີ​ການ​ປ່ຽນ​ແປງ ແລະ ໄດ້ຮັບການ​ພັດ​ທະ​ນາ​ດີ​ຂຶ້ນເປັນກ້າວໆ, ສ້າງບ້ານພົ້ນທຸກໄດ້ 4 ບ້ານ, ທົ່ວແຂວງຍັງມີບ້ານບໍ່ພົ້ນທຸກ 181 ບ້ານ, ກວມ 38%, ສ້າງຄອບຄົວພົ້ນທຸກໄດ້ 285 ຄອບຄົວ, ຍັງມີຄອບຄົວບໍ່ພົ້ນທຸກ 13.281 ຄອບຄົວ, ກວມ 26% ແລະ ຍັງມີເມືອງທຸກຍາກ 6 ເມືອງ, ກວມ 85%, ສ້າງບ້ານພັດທະນາໄດ້ 7 ບ້ານ ລວມເປັນ 103 ບ້ານ, ກວມ 21%, ສ້າງຄອບຄົວພັດທະນາໄດ້ 288 ຄອບຄົວ, ລວມມີຄອບຄົວພັດທະນາ ທັງໝົດ 28.522 ຄອບຄົວ ກວມ 55% (ສັງລວມຕາມດໍາລັດ 348/ລບ ແມ່ນມາດຕະຖານສູງຫລາຍ, ເກີນກວ່າຄວາມສາມາດ, ເງື່ອນໄຂ ແລະ ທ່າແຮງຕົວຈິງ ຂອງແຂວງ ຈຶ່ງເຮັດໃຫ້ຫລາຍມາດຕະຖານ ບໍ່ສາມາດປະຕິບັດໄດ້ຕາມແຜນ ການໄດ້ວາງໄວ້).

ສ່ວນວຽກງານຈຸດສຸມ ໃນ 6 ເດືອນທ້າຍປີ 2025 ແຂວງຊຽງຂວາງ ຈະສືບຕໍ່ສຸມໃສ່ຫລາຍບັນຫາສຳຄັນ ເປັນຕົ້ນ ຈະສຸມໃສ່ຜະລິດພືດລະດູແລ້ງ, ລະດູຝົນ ແລະ ຊຸກຍູ້ສົ່ງເສີມການຜະລິດ ເພື່ອທົດແທນການນໍາເຂົ້າ, ເອົາ ໃຈໃສ່ປັບປຸງ ແລະ ຂະຫຍາຍຖານລາຍຮັບທີ່ໝັ້ນຄົງ, ຊຸກຍູ້ການຈັດເກັບລາຍຮັບ ແລະ ຄຸ້ມຄອງລາຍຈ່າຍ ຕາມທິດປະຢັດມັດຖະຢັດ, ຫັນໄປສູ່ທັນສະໄໝ, ພ້ອມທັງຈະສຸມໃສ່ປັບປຸງ, ກໍ່ສ້າງ ແລະ ສ້ອມແປງພື້ນຖານໂຄງລ່າງ ເສັ້ນ ທາງຄົມມະນາຄົມ ໃຫ້ຮັບປະກັນການສັນຈອນ ແລະ ຂົນສົ່ງສິນຄ້າໄປ-ມາສະດວກ ແລະ ຄຸ້ມຄອງນໍ້າໜັກລົດບັນ ທຸກຢ່າງເຂັ້ມງວດ; ສືບຕໍ່ຄົ້ນຄວ້າເກັບຄ່າລົດບັນທຸກແຮ່ ແລະ ຂົນສິນຄ້າຜ່ານທາງຫລວງແຫ່ງຊາດ ແລະ ທາງແຂວງຄຸ້ມຄອງ ທີ່ບັນທຸກນໍ້າໜັກເກີນ ຕາມທິດຊີ້ນຳຂອງລັດຖະບານ ແລະ ຕາມແຜນການຂອງແຂວງ, ພ້ອມທັງ ຈະເອົາໃຈໃສ່ຕິດຕາມ ແລະ ເຝົ້າລະວັງໄພພິບັດທາງທໍາມະຊາດ ທີ່ອາດຈະເກີດຂຶ້ນ ເພື່ອກຽມຄວາມພ້ອມຮອບດ້ານ ໃຫ້ການຊ່ວຍເຫລືອຜູ້ປະສົບໄພພິບັດ, ແກ້ໄຂສຸກເສີນ ແລະ ຟື້ນຟູ ໃຫ້ກັບຄືນສູ່ສະພາບປົກກະຕິ.

ຂ່າວ: ທະນູທອງ

ພາບ: ຂັນໄຊ

KPL