ຂປລ. ກະຊວງກະສິກຳ ແລະ ປ່າໄມ້, ອົງການຮ່ວມມືສາກົນ ສ ເກົາຫລີ (KOICA) ແລະ ອົງການສົ່ງ ເສີມການຄ້າ-ການລົງທຶນ ສ ເກົາຫລີ (KOTRA) ຈັດງານວາງສະແດງ ສິນຄ້າ ແລະ ຜະລິດຕະພັນກະສິກຳ ລາວ-ເກົາຫລີ 2025 ໃນວັນທີ 6-7 ມິຖຸນາ 2025 ຢູ່ສູນການຄ້າລາວ-ໄອເຕັກ ເພື່ອເປັນການສະເຫລີມສະຫລອງ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ ເກົາຫລີ ຄົບຮອບ 30 ປີ, ແນໃສ່​ຮັດ​ແໜ້ນ​ການ​ພົວພັນ​ດ້ານ​ກະສິກຳ​ແບບ​ຍືນ​ຍົງ ​ແລະ ການ​ສ້າງ​ລາຍ​ຮັບໃນເຂດ​ຊົນນະບົດ​ ລະຫວ່າງ​ສອງ​ປະ​ເທດ.

ໃນງານຄັ້ງນີ້, ມີຊາວກະສິກອນ, ບັນດາອົງການຈັດຕັ້ງທາງສັງຄົມ ທີ່ບໍ່ຂຶ້ນກັບລັດຖະບານ (NGOs) ຂອງເກົາຫລີ, ໂຄງການເກົາຫລີ ກ່ຽວກັບກະສິກຳສາກົນ (KOPIA), ມູນນິທິ Saemaul, ບັນດາບໍລິສັດ ກ່ຽວກັບ ການ ກະເສດ ແລະ ອາຫານ ໄດ້ນຳເອົາສິນຄ້າ ແລະ ຜະລິດຕະພັນຂອງຕົນເຂົ້າມາຮ່ວມວາງສະແດງ ເຊິ່ງງານດັ່ງກ່າວ ແນໃສ່​ການ​ພັດ​ທະ​ນາ​ຊົນ​ນະ​ບົດ, ການ​ສ້າງ​ຄວາມ​ເຂັ້ມ​ແຂງ​ຂອງ​ຊຸມ​ຊົນ, ການ​ສ້າງ​ລາຍ​ຮັບ​ຂອງ​ກະ​ສິ​ກອນ, ການ​ເຊື່ອມ​ໂຍງ​ທຸ​ລະ​ກິດ​ ລະ​ຫວ່າງ ​ວິ​ສາ​ຫະ​ກິດ​ກະ​ສິ​ກຳ​ຂອງ​ລາວ ແລະ ສ ​ເກົາຫລີ.

          ໂອກາດນີ້, ອົງການ KOICA ໄດ້ນຳເອົາຜະລິດຕະພັນ ກະສິກຳຈາກໂຄງການ “ການສ້າງແຜນປະຕິບັດງານ ສ້າງລາຍຮັບຊົນນະບົດ ໃນຂົງເຂດພາກເໜືອ ແລະ ພາກກາງຂອງ ສປປ ລາວ (2021-2025)” ເຊິ່ງຈັດຕັ້ງປະຕິບັດ ຢູ່ 14 ບ້ານ ບ້ານເປົ້າໝາຍ ຂອງແຂວງ ຊຽງຂວາງ ວຽງຈັນ ແລະ  ບໍລິຄຳໄຊ ມາວາງສະແດງ ແລະ ຈຳໜ່າຍ ສະ​ແດງ​ໃຫ້​ເຫັນ​ທ່າ​ແຮງ​ການ​ຄ້າ​ຂອງທ້ອງຖິ່ນ ​ແລະ ​ການ​ກະ​ສິ​ກໍາ​ຂະ​ໜາດ​ນ້ອຍ​ ເຊິ່ງໂຄງການດັ່ງກ່າວ, ຮ່ວມຈັດຕັ້ງປະຕິ ບັດໂດຍ ກົມພັດທະນາຊົນນະບົດ ກະຊວງກະສິກຳ ແລະ ປ່າໄມ້ ແລະ ສະ​ຖາ​ບັນ​ຍຸດ​ທະ​ສາດ​ການ​ພັດ​ທະ​ນາ​ເກົາ​ຫລີ (KDS) ແນໃສ່ການພັດທະນາຊົມຊົນເປັນຫລັກ. ສ່ວນອົງການ KOTRA ເປັນຝ່າຍອຳນວຍຄວາມສະດວກ ໃນການນຳເຂົ້າສິນຄ້າການກະເສດ ຂອງບັນດາຜູ້ຈຳໜ່າຍ ສິນຄ້າຂອງ ສ ເກົາຫລີ ໃນປະເທດລາວກວ່າ 11 ຮ້ານວາງສະແດງ. ນອກນັ້ນ, ຍັງມີບໍລິສັດ GUBI Co., Ltd. ແລະ NEXUS SOLE Co., Ltd. ໄດ້ນຳເອົາ ອາຫານເສີມ ເພື່ອສຸຂະພາບ, ເຄື່ອງດື່ມ ແລະ ອາຫານຫວ່າງມາວາງສະແດງ ແລະ ຈຳໜ່າຍໃນງານ.

          ພິທີເປີດງານຢ່າງເປັນທາງການ ຈັດຂຶ້ນໃນວັນທີ 6 ມິຖຸນາ 2025 ໂດຍມີ ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ຈອງ ຢອງຊູ ເອກອັກຄະລັດຖະທູດ ສ ເກົາຫລີ ປະຈຳລາວ, ທ່ານ  ຊຸງຊູ ໂອ (Mr Sungsoo Oh) ຜູ້ອໍານວຍການ KOICA ປະຈໍາ ສປປ ລາວ, ທ່ານ ປັກ ຈຸນກິວ (Mr. Jungwe Park) ຜູ້ອໍານວຍການໃຫຍ່ KOTRA ວຽງຈັນ  ແລະ ບັນດາທ່ານຮອງເຈົ້າແຂວງຊຽງຂວາງ ແລະ ວຽງຈັນ ເຂົ້າຮ່ວມ.

ໂອກາດນີ້, ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄດ້ໄດ້ມີຄໍາເຫັນວ່າ: ງານ ວາງສະແດງຜະລິດຕະພັນກະສິກຳລາວ-ສ ເກົາຫລີ ເປັນເວທີ ເພື່ອໃຫ້ກະສິກອນ ແລະ ພາກສ່ວນກ່ຽວຂ້ອງ ໄດ້ມີໂອກາດແລກປ່ຽນຄວາມຮູ້ ແລະ ນະວັດຕະກໍາ, ທັງ​ເປັນ​ໂອກາດ​ທີ່​ມີ​ຄວາມ​ໝາຍ​ເພື່ອ​ໃຫ້​ປະຊາຊົນ ສ ​ເກົາຫລີ ​ແລະ ລາວ ​ໄດ້​ສະ​ແດງ​ໃຫ້​ເຫັນ​ຄວາມ​ເຂັ້ມ​ແຂງ ​ແລະ ສະທ້ອນ​ເຖິງ​ການ​ຮ່ວມ​ມື ​ທີ່​ແໜ້ນ​ແຟ້ນ​ໃນ ຕະຫລອດໄລຍະ ເວລາ 30 ປີ.

          ທ່ານ ຈອງ ຢອງຊູ ເອກອັກຄະລັດຖະທູດ ສ ເກົາຫລີ ປະຈຳລາວ ກໍໄດ້ມີຄໍາເຫັນວ່າ: ການສະ​ເຫລີມ​ສະ​ຫລອງ 30 ປີ ​ແຫ່ງ​ສາຍ​ພົວ​ພັນ​ທາງ​ການ​ທູດ ສ ​ເກົາຫລີ ແລະ ສປປ ລາວ ໄດ້​ສະ​ເຫລີມ​ສະ​ຫລອງ​ ການ​ພົວ​ພັນ​ຄູ່​ຮ່ວມ​ມື​ຮອບ​ດ້ານ​  ​ເພື່ອ​ແນ​ໃສ່​ຊຸກ​ຍູ້​ການ​ພັດ​ທະ​ນາ​ກະ​ສິ​ກຳ ແລະ ຊົນ​ນະ​ບົດ ເຊິ່ງ​ທັງ​ສອງ​ປະ​ເທດ ​ສືບ​ຕໍ່​​ພົວ​ພັນ​ຄູ່​ຮ່ວມ​ມື​ແບບທີ່​ຕ່າງ​ຝ່າຍ​ຕ່າງໄດ້ຮັບຜົນ​ປະ​ໂຫຍດ.

          ພາຍໃນງານ KOTRA ໄດ້ມອບລາງວັນໃຫ້ 3 ຮ້ານວາງສະແດງ ທີ່ໄດ້ຮັບຄວາມນິຍົມ ຈາກທັງໝົດໃນ 11 ຮ້ານທີ່ເຂົ້າຮ່ວມໃນງານວາງສະແດງ ເຊິ່ງ ລາງວັນທີ 1 ແມ່ນ ບໍລິສັດ Nexus Sole ຈຳກັດ, ລາງວັນທີ 2 ແມ່ນ Vone ແບຣນເນມ ແລະ  ລາງວັນທີ 3 ແມ່ນ ບໍລິສັດ AK Trading ຈຳກັດ.

KPL