ຂປລ. ຕະຫລອດ​ໄລ​ຍະ 76 ປີຜ່ານມາ, ກອງທັບປະຊາຊົນລາວ ໄດ້ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງຕົນ, ຍາມໃດກໍເຊີດຊູສະຕິລະວັງຕົວກຽມພ້ອມສູ້ຮົບ, ເປັນກຳລັງຫລັກແຫລ່ງ ເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ໄວ້ໄດ້ຢ່າງໝັ້ນຄົງ ຮັບປະກັນໄດ້ສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ, ປະກອບສ່ວນຢ່າງຕັ້ງໜ້າໃນການ ພັດທະນາເສດຖະກິດ-ສັງຄົມ ຂອງຊາດ ຂະຫຍາຍຕົວຢ່າງຕໍ່ເນື່ອງ.

ທ່ານ ພັອ ສະແຫວງ ແດນນາມົນ ເລຂາຄະນະພັກ, ຫົວໜ້າການເມືອງ ໂຮງຮຽນວັດທະນະທໍາຊົນເຜົ່າກອງທັບ ໄດ້ສະແດງບາງທັດສະນະ ຕໍ່ກອງທັບປະຊາຊົນລາວ ໃນໂອກາດວັນສ້າງຕັ້ງກອງທັບປະ ຊາຊົນລາວ ຄົບຮອບ 76 ປີ ວ່າ: ກອງທັບປະຊາຊົນລາວ ໄດ້ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງຕົນ ເປັນກຳລັງຫລັກແຫລ່ງ ເຮັດໜ້າທີ່ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ. ສຳລັບທາງດ້ານການການທະຫານ ໄດ້ມີອາວຸດ-ຍຸດໂທ ອຸປະກອນທີ່ທັນສະໄໝ, ມີກໍາລັງແຂງແກ່ນ ແລະ ນັບມື້ນັບເຂັ້ມແຂງ ທາງດ້ານການຈັດຕັ້ງ-ບັນຊາ ໂດຍສະເພາະ ໂຮງຮຽນວັດທະນະທໍາຊົນເຜົ່າກອງທັບ ໃນຊຸມປີຜ່ານມາ ໄດ້ສໍາເລັດຫລາຍໆດ້ານ ເຊິ່ງເປັນຜົນງານ ແລະ ໝາກຜົນສຳເລັດອັນໜຶ່ງ ທີ່ໄດ້ປະກອບສ່ວນໃຫ້ ການຈັດຕັ້ງຂັ້ນເທິງ ກໍຄື ກະຊວງປ້ອງກັນປະເທດ ໂດຍຖືເອົາການປະຕິບັດ 4 ໜ້າທີ່ໃຫຍ່ ແລະ 26 ແຜນງານ ເປັນຕົ້ນຕໍ່. ຄະນະພັກ-ຄະນະບັນຊາ ໄດ້ເອົາໃຈໃສ່ສຶກສາອົບຮົມ ການເມືອງ ນໍາແນວຄິດໃຫ້ພະນັກງານ-ນັກຮົບ ແລະ ນ້ອງນ້ອຍນັກຮຽນ ໃຫ້ມີຫລັກໝັ້ນຄຸນທາດ ການເມືອງໜັກແໜ້ນ, ຮັກຊາດ, ຮັກລະບອບໃໝ່. ພ້ອມນັ້ນ, ກໍໄດ້ຖືເອົາວຽກງານລົງກໍ່ຮາກຖານ ຕິດພັນກັບບ້ານອ້ອມຂ້າງ ເພື່ອເຮັດໃຫ້ສະພາບບໍລິເວນກົມກອງຕັ້ງທັບ ມີຄວາມສະຫງົບປອດໄພ, ກົມກອງໄດ້ສໍາເລັດ ຈັດຕັ້ງກອງປະຊຸມໃຫຍ່ ຜູ້ແທນສະມາຊິກພັກຂອງຕົນ, ປັບປຸງການຈັດຕັ້ງບັນຊາຂັ້ນຕ່າງໆ ໃຫ້ມີຄວາມເຂັ້ມແຂງ, ກໍ່ສ້າງຂະຫຍາຍສະມາຊິກພັກ, ກໍ່ສ້າງພະນັກງານສືບທອດປ່ຽນແທນ ໄດ້ຕາມເປົ້າໝາຍ ແລະ ນໍາສົ່ງພະນັກງານໄປກໍ່ສ້າງບໍາລຸງຢູ່ພາຍໃນ ແລະ ຕ່າງປະເທດ, ມີຄູສອນດີ-ສອນເກັ່ງ, ນັກຮຽນດີ-ຮຽນ, ໄດ້ຮັບໃບຢັ້ງຢືນຈາກ ກະຊວງສຶກສາທິການ ແລະ ກິລາ ໃຫ້ໂຮງຮຽນເປັນໂຮງຮຽນສີຂຽວ ໂຮງຮຽນປອດຢາເສບຕິດ, ພ້ອມນັ້ນກໍໄດ້ປັບປຸງວຽງງານການສຶກສາ, ເຮັດໃຫ້ການຮຽນ-ການສອນ ມີວິທະຍາສາດທີ່ທັນສະໄໝ ທຽບເທົ່າກັບໂຮງຮຽນແຫ່ງອື່ນໆ.

ໃນໂອກາດວັນສ້າງຕັ້ງກອງທັບ ປະຊາຊົນລາວ ຄົບຮອບ 76 ປີ ນີ້, ທ່ານ ພັອ ສະແຫວງ ແດນນາມົນ ຍັງໄດ້ອວຍພອນໄຊອັນປະເສີດ ມາ​ຍັງການນຳພັກ-ລັດ, ການນຳກະຊວງປ້ອງກັນປະເທດ, ພະນັກງານ, ນາຍ ແລະ ພົນທະຫານ ໃນທົ່ວກອງທັບປະຊາຊົນລາວ ຈົ່ງມີສຸຂະພາບແຂງແຮງ, ມີຜົນສຳເລັດໃນໜ້າທີ່ ການເມືອງຂອງຕົນ, ສືບຕໍ່ເຮັດສໍາເລັດ ໜ້າທີ່ວຽກງານທີ່ ການຈັດຕັ້ງຂັ້ນເທິງມອບໝາຍໃຫ້.

ຂ່າວ: ກິດ​ຕາ

KPL