ຂປລ. ໃນໂອກາດເຂົ້າຮ່ວມ ກອງປະຊຸມສະຫລຸບ ການຈັດຕັ້ງປະຕິບັດ ວຽກງານຄຸ້ມຄອງແຮງງານ ປະຈຳປີ 2024 ແລະ ທິດທາງແຜນການປະຈໍາປີ 2025 ເມື່ອບໍ່ດົນມານີ້, ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ໂອ້ລົມຕໍ່ກອງປະຊຸມ ໂດຍທ່ານໄດ້ກ່າວວ່າ ເຖິງແມ່ນວ່າ ກົມຄຸ້ມຄອງແຮງງານ ພວກເຮົາຈະຍາດໄດ້ຜົນງານ ຫລືຜົນສຳ ເລັດຫລາຍຂຶ້ນເປັນກ້າວໆໃນປີຜ່ານມາກໍຕາມ, ແຕ່ຖ້າສົມທຽບໃສ່ການປ່ຽນແປງ ຢ່າງໄວວາຂອງໂລກໃນການເຮັດວຽກ ທີ່ນັບມື້ນັບມີການຫັນປ່ຽນ ບວກກັບສະພາບເສດຖະກິດ, ອັດຕາເງິນເຟີ້, ຄ່າຄອງຊີບສູງເຫັນວ່າ ພວກເຮົາຍັງມີ ຄວາມຈຳເປັນ ຕ້ອງໄດ້ເອົາໃຈໃສ່ຕໍ່ວຽກງານ ການຄຸ້ມຄອງແຮງງານໃຫ້ມີປະສິດທິພາບສູງຂຶ້ນ.

ໂອກາດນີ້, ທ່ານຮອງລັດຖະມົນຕີກະຊວງ ຮສສ ໄດ້ໃຫ້ກົມຄຸ້ມຄອງແຮງງານ ເອົາໃຈໃສ່ໃນວຽກງານບາງດ້ານສຳຄັນ ໂດຍສະເພາະ ດ້ານນິຕິກຳຕ້ອງສົມທົບກັບ ພາກສ່ວນທີ່ກ່ຽວຂ້ອງ ໂດຍສະ ເພາະແມ່ນອົງການສາມຝ່າຍ ເພື່ອສືບຕໍ່ເອົາໃຈໃສ່ ໃນການສ້າງນິຕິກຳລຸ່ມກົດໝາຍ ວ່າດ້ວຍແຮງງານຕາມແຜນການຂອງກົມ ກໍຄື ແຜນການຂອງກະຊວງ ໃຫ້ເຫັນຜົນສຳເລັດ ເປັນຕົ້ນ ໃຫ້ໄດ້ປະກາດໃຊ້ດໍາລັດ ວ່າດ້ວຍການກວດກາແຮງງານ, ຜ່ານຮ່າງດໍາລັດການປັບໄໝວ່າດ້ວຍແຮງງານ, ປະເມີນການ ຈັດຕັ້ງປະຕິບັດກົດໝາຍ ວ່າດ້ວຍແຮງງານສະບັບທີ 43/ສພຊ, ລົງວັນທີ 24 ທັນວາ 2013, ຮັບຮອງແຜນງານແຫ່ງຊາດ ເພື່ອປ້ອງກັນ ແລະ ລຶບລ້າງການນໍາໃຊ້ແຮງງານເດັກ ແລະ ສົ່ງເສີມວຽກທີ່ມີຄຸນຄ່າສໍາລັບໄວໜຸ່ມຂອງ ສປປ ລາວ ໄລຍະ 2023-2025 ແລະ ວິໄສທັດຮອດປີ 2030; ໃຫ້ໄດ້ຮັບຮອງສູດຄິດໄລ່ຄ່າແຮງງານຂັ້ນຕ່ຳສຸດຂອງຜູ້ອອກແຮງງານຢູ່ ສປປ ລາວ ຈາກຄະນະກໍາມະການແຮງງານແຫ່ງຊາດ ແລະ ຮັບຮອງຮ່າງມາດຕະຖານດ້ານຄວາມປອດໄພ ແລະ ສຸຂະພາບແຮງງານ ໃນສະຖານທີ່ເຮັດວຽກ ແລະ ວຽກງານສາມຝ່າຍ ກໍໍໃຫ້ຖືເປັນບັນຫາສໍາຄັນ.

ສຳລັບ ແຮງງານທີ່ມີຄວາມຈຳເປັນ ຕ້ອງໄດ້ປົກປ້ອງສະເພາະເຊັ່ນ: ແຮງງານເພດຍິງ, ໄວໜຸ່ມ, ຜູ້ພິການ ແລະ ຜູ້ດ້ອຍໂອກາດ ຕ້ອງເຮັດໃຫ້ເປັນໄປ ຕາມມາດຕະຖານແຮງງານ ທັງຂອງສາກົນ, ພາກພື້ນອາຊຽນ ແລະ ຂອງປະເທດເຮົາ; ເອົາໃຈໃສ່ກ່ຽວກັບການອະນຸຍາດ ນໍາເຂົ້າ-ອອກບັດອະນຸຍາດ ເຮັດວຽກໃຫ້ແຮງງານ ຕ່າງປະເທດທີ່ມາເຮັດວຽກຢູ່ ສປປ ລາວ, ການຄຸ້ມຄອງແຮງງານ ຢູ່ຕາມບັນດາຫົວໜ່ວຍແຮງງານ ໃນຂອບເຂດທົ່ວປະເທດ, ການກວດສຸຂະພາບແຮງງານ ເພື່ອຜົນປະໂຫຍດ ຂອງຜູ້ອອກແຮງງານ ແລະ ຂອງປະເທດຊາດໂດຍລວມ ແລະ ບັນຫາອື່ນໆ ກໍໃຫ້ສືບຕໍ່ເອົາໃຈໃສ່ ເຮັດໃຫ້ເກີດດອກອອກຜົນ ໂດຍສະເພາະ ການບັນລຸຄາດໝາຍ ສູ້ຊົນທີ່ກຳນົດໄວ້ ກໍໃຫ້ເອົາໃຈໃສ່ເຮັດໃຫ້ສຳເລັດ ໄດ້ທັງປະລິມານ ແລະ ມີຄຸນນະພາບດີຂຶ້ນກວ່າປີຜ່ານໆມາ.

ຂໍ້ມູນ-ພາບ: ຂ່າວສານ ຮສສ

KPL