ຂປລ. ຫ້ອງວ່າການສໍານັກງານ ນາຍົກລັດຖະມົນຕີ (ຫສນຍ) ຈັດກອງປະຊຸມພົບປະ ລະຫວ່າງ ຫ້ອງວ່າການສໍານັກງານ ນາຍົກລັດຖະມົນຕີ ແລະ ຫ້ອງການກະຊວງ-ອົງການ, ຫ້ອງວ່າການແຂວງ ແລະ ເລຂານຸການການນຳ  ອ້ອມຂ້າງສູນກາງ ແລະ ທ້ອງຖິ່ນ ໃນວັນທີ 6 ມັງກອນ 2025 ຢູ່ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ບົວຄົງ ນາມມະວົງ ລັດຖະມົນຕີ, ຫົວໜ້າຫ້ອງວ່າການສຳນັກ ງານນາຍົກລັດຖະມົນຕີ, ມີບັນດາຫົວໜ້າຫ້ອງການກະຊວງ, ຫົວໜ້າຫ້ອງວ່າການແຂວງ ແລະ ນະ ຄອນຫລວງວຽງຈັນ, ເລຂານຸການປະຈຳການນຳ ຢູ່ສູນກາງ ແລະ ທ້ອງຖິ່ນ, ພ້ອມດ້ວຍພະນັກງານ-ລັດຖະກອນ ທີ່ມີຕຳແໜ່ງບໍລິຫານ ຂັ້ນຮອງຫົວໜ້າພະແນກຂຶ້ນໄປ ຂອງ ຫສນຍ ເຂົ້າຮ່ວມ.

ຈຸດປະສົງ ເພື່ອເຜີຍແຜ່ບາງເນື້ອໃນ ລະບຽບການເຮັດວຽກ ຂອງລັດຖະບານ, ຍາດແຍ່ງເອົາບົດຮຽນ ແລະ ຄໍາເຫັນແນະນໍາ ຈາກບັນດາທ່ານທີ່ມີປະສົບການຕົວຈິງ ໃນການຈັດຕັ້ງປະຕິບັດວຽກງານເສນາທິການ ແລະ ເລຂານຸການການນຳຂັ້ນສູງຂອງພັກ ແລະ ລັດ ໃນໄລຍະຜ່ານມາ, ທັງເປັນການສ້າງເງື່ອນໄຂ ໃຫ້ຜູ້ເຂົ້າຮ່ວມ ກໍຄື ຜູ້ເຮັດວຽກເສນາທິການ ແລະ ເລຂານຸການການນຳ ຢູ່ສູນກາງ ແລະ ທ້ອງ ຖິ່ນ ທີ່ໄດ້ຕິດຕາມການນຳຂອງຕົນ ມາເຂົ້າຮ່ວມກອງປະຊຸມ ລັດຖະບານເປີດກວ້າງ ຄັ້ງທີ II ປີ 2024 ໄດ້ມີໂອກາດແລກປ່ຽນບົດຮຽນ ແລະ ຄໍາຄິດເຫັນຕ່າງໆ ເຊິ່ງກັນ ແລະ ກັນ ແນໃສ່ຍົກສູງຄວາມສາ ມາດ, ປະສິດທິພາບ ແລະ ປະສິດທິຜົນ ຂອງວຽກງານເສນາທິການ ແລະ ເລຂານຸການການນຳ ໃຫ້ສູງຂຶ້ນກວ່າເກົ່າ. ສໍາລັບເນື້ອໃນການພົບປະ ແລະ ແລກປ່ຽນບົດຮຽນ ໃນຄັ້ງນີ້, ຜູ້ເຂົ້າຮ່ວມ ໄດ້ຮັບຟັງການເຜີຍແຜ່ບາງເນື້ອໃນກ່ຽວກັບລະບຽບການ ແລະ ກົນໄກການເຮັດວຽກຂອງລັດຖະບານ ຊຸດທີ IX ທີ່ປັບປຸງໃໝ່; ກົນໄກການສົ່ງ ເອກະສານທາງລັດຖະການ ແລະ ນິຕິກຳຕ່າງໆ ດ້ວຍຮູບແບບຫັນເປັນທັນສະໄໝ. ຫລັງຈາກນັ້ນ, ຜູ້ເຂົ້າຮ່ວມ ກໍໄດ້ມີຄຳເຫັນແລກປ່ຽນເຊິ່ງກັນ ແລະ ກັນ ຕໍ່ການຈັດຕັ້ງປະຕິບັດວຽກງານ ໃນໄລຍະຜ່ານມາ ໂດຍສະເພາະ ຕໍ່ບາງຈຸດທີ່ເຫັນວ່າ ການຈັດຕັ້ງປະຕິບັດ ໃນໄລຍະຜ່ານມາ ບໍ່ທັນມີຄວາມເປັນເອກະພາບ, ປະສິດທິພາບ-ປະສິດທິຜົນ ບໍ່ທັນສູງເທົ່າທີ່ຄວນ ແລະ ອື່ນໆ.

ໂອກາດນີ້, ທ່ານປະທານກອງປະຊຸມ ກໍໄດ້ມີຄຳເຫັນພົບປະໂອ້ລົມຕໍ່ຜູ້ເຂົ້າຮ່ວມ ໂດຍໄດ້ຍົກໃຫ້ເຫັນຄວາມໝາຍ ຄວາມສຳຄັນ ຂອງວຽກງານເສນາທິການ ແລະ ເລຂານຸການຂອງການນຳ, ພ້ອມທັງ ມີຄຳເຫັນສັງຮວມເນື້ອໃນ ໃນການເຜີຍແຜ່ ແລະ ແລກປ່ຽນບົດຮຽນໃນຄັ້ງນີ້. ພ້ອມນີ້, ທ່ານປະທານກອງປະຊຸມ ໄດ້ມີຄຳເຫັນໂດຍເນັ້ນ ໃຫ້ເອົາໃຈໃສ່ພິຈາລະນາຕື່ມບາງດ້ານ ເປັນຕົ້ນ ສະເໜີໃຫ້ຫ້ອງການ ບັນດາກະຊວງ-ອົງການ ສ້າງແຜນການເຄື່ອນໄຫວ ວຽກງານປະຈຳປີ ໃຫ້ແກ່ການນຳຂອງຕົນ ສອດຄ່ອງກັບແຜນການ ເຄື່ອນໄຫວວຽກງານປະຈຳປີ ຂອງລັດຖະບານ ໂດຍສະເພາະ ແຜນການດຳເນີນກອງປະຊຸມ ລັດຖະບານສະໄໝ ສາມັນປະຈຳເດືອນ ແລະ ກອງປະຊຸມລັດຖະບານເປີດກວ້າງ; ໃຫ້ຍົກສູງຄວາມຮັບຜິດຊອບ ທາງດ້ານການເມືອງຂອງຕົນ ໃຫ້ສູງຂຶ້ນຕື່ມ ເພື່ອຮັບປະກັນການປະຕິບັດ ໜ້າທີ່ເປັນເສນາທິການໃຫ້ການນຳຂອງຕົນ ມີປະສິດທິພາບ-ປະສິດທິຜົນສູງຂຶ້ນ, ທັງວ່ອງໄວ ແລະ ທັນການ ເນື່ອງຈາກ ປີ 2025 ເປັນປີມ້ວນທ້າຍ ໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ເປັນປີຄົບຮອບ 3 ວັນປະຫວັດສາດຂອງຊາດ ທີ່ຈະໄດ້ມີການສະເຫລີມສະຫລອງໃຫຍ່ ແລະ ວຽກງານສຳຄັນອື່ນໆຕື່ມອີກ; ໃຫ້ເພີ່ມທັດສະນະຫລັກໝັ້ນ ແລະ ຄວາມຮັບຜິດຊອບຂອງຕົນໃຫ້ສູງຂຶ້ນ ເຊິ່ງເລຂານຸການຂອງການນຳ ຕ້ອງມີຫລັກໝັ້ນ, ມີຄວາມໂປ່ງໃສ, ເຂັ້ມງວດ, ເດັດຂາດ ແລະ ບໍ່ຄອນແຄນ, ປະຕິບັດວຽກງານບົນພື້ນຖານ ຍຶດໝັ້ນແນວທາງນະໂຍບາຍ, ກົດໝາຍ, ລະບຽບການທີ່ກ່ຽວຂ້ອງ ແລະ ແທດເໝາະກັບຄວາມເປັນຈິງ; ຈົ່ງພ້ອມກັນເອົາໃຈໃສ່ຮັກສາຄວາມລັບທາງລັດຖະການ; ສືບຕໍ່ເອົາໃຈໃສ່ການປະສານງານເຊິ່ງກັນ ແລະ ກັນ ໃຫ້ມີຄວາມກົມກຽວ, ແໜ້ນແຟ້ນ ວ່ອງໄວ, ມີການຖອດຖອນບົດຮຽນ ເຊິ່ງກັນ ແລະ ກັນ; ສືບຕໍ່ປະຕິບັດລະບອບສ່ອງແສງລາຍງານ ໃຫ້ເປັນປົກ ກະຕິ; ສືບຕໍ່ເອົາໃຈໃສ່ເຮັດໜ້າທີ່ເປັນເສນາທິການ ໃຫ້ສົມບົດບາດເປັນເລຂານຸການ ຂອງການນຳ ຢ່າງແທ້ຈິງ ໂດຍສະເພາະມີຄວາມລະອຽດ, ຮອບຄອບ, ຊັດເຈນ, ສະດຸ້ງໄວ. ພ້ອມນັ້ນ, ກໍໃຫ້ຫລີກລ່ຽງ ແນວຄິດມັກງ່າຍ, ຈົ່ງຈຽມ, ຂາດຄວາມຮັບຜິດຊອບ ແລະ ອື່ນໆ.

ຂ່າວ-ພາບ: ກົມປະຊາສຳພັນ ຫສນຍ.

KPL