ຂປລ. ກອງປະຊຸມສະຫລຸບວຽກງານໄອຍະການ ປະຊາຊົນທົ່ວປະເທດ ປະຈໍາປີ 2024 ໄດ້ຈັດຂຶ້ນໃນຕອນບ່າຍຂອງວັນທີ 8 ມັງກອນ 2025  ພາຍໃຕ້ການເປັນປະທານ ຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີຮອງຫົວໜ້າອົງການໄອຍະການປະຊາຊົນສູງສຸດ,  ບັນດາຄະນະນໍາ ອົງການໄອຍະການ ປະຊາຊົນນະຄອນຫລວງ ແລະ 17 ແຂວງ ພ້ອມດ້ວຍພະນັກງານ ຫລັກແຫລ່ງອົງການ ໄອຍະການປະຊາຊົນເຂດ ໃນຂອບເຂດທົ່ວປະເທດ ເຂົ້າຮ່ວມ ຢ່າງພ້ອມພຽງ. 

ທ່ານ ຄຳເພັດ ສົມວໍລະຈິດ ຮອງຫົວໜ້າອົງການ ໄອຍະການປະຊາຊົນສູງສຸດ ໄດ້ລາຍງານການ ເຄື່ອນໄຫວ ວຽກງານ ໄອຍະການປະຊາຊົນທົ່ວປະເທດ ປະຈໍາປີ 2024 ໂດຍຍົກໃຫ້ເຫັນຜົນສໍາເລັດ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງວຽກງານຈຸດສຸມປະຈຳປີ 2024 ເຊັ່ນ: ອອກຄໍາສັ່ງເລກທີ 006/ອອປສ, ລົງວັນທີ 30 ມິຖຸນາ 2023 ແລະ ຄໍາແນະນໍາເລກທີ 002/ອອປສ, ລົງວັນທີ 27 ກໍລະກົດ 2024 ກ່ຽວກັບການດໍາເນີນຄະດີ ຕໍ່ຜູ້ກະທຳຜິດ ກ່ຽວກັບໃບກະທ່ອມ, ນໍ້າກະທ່ອມ ຫລື ສານລະເຫີຍທີ່ມີສານເສບຕິດອື່ນ ເຊັ່ນ: ປຸມເປົ້າອັດແກ໊ສ ສານໄນຕັດອ໋ອກໄຊ (Nitrous oxide), ຢາສູບໄຟຟ້າ-ຊີຊ່າ (ບາລາກູ); ຄໍາສັ່ງເລກທີ 011/ອອປສ, ລົງວັນທີ 23 ສິງຫາ 2021 ກ່ຽວກັບການດໍາເນີນຄະດີຟອກເງິນ, ການດໍາເນີນຄະດີການຟອກເງິນ ຍັງບໍ່ທັນໄດ້ປະຕິບັດເປັນຮູບປະທໍາ, ສ່ວນຫລາຍບໍ່ໄດ້ດໍາເນີນຄະດີ ໄປຄວບຄູ່ກັບການດໍາເນີນຄະດີຢາເສບຕິດ. ສຳລັບວຽກຕິດຕາມກວດ ກາທົ່ວໄປ ໄດ້ຮັບການຈັດຕັ້ງປະຕິບັດ ເປັນຮູບປະທໍາ ຫລາຍຂຶ້ນ, ບັນດາອົງການຈັດຕັ້ງພັກ, ລັດ ແລະ ປະຊາຊົນບັນດາເຜົ່າ ມີຄວາມຮັບຮູ້ເຂົ້າໃຈ ແລະ ໃຫ້ຄວາມຮ່ວມມື ໃນວຽກງານດັ່ງກ່າວຫລາຍຂຶ້ນ; ກົນໄກປະສານງານ, ການວິເຄາະວິໄຈອາຊະຍາກໍາ ສາມາດຮູ້ໄດ້ບາງສາເຫດຕົ້ນຕໍ ແລະ ວາງມາດຕະການແກ້ໄຂ; ວຽກງານຕິດຕາມກວດກາ ການດຳເນີນຄະດີອາຍາ ໄດ້ຮັບການຍົກສູງ ສູ່ຄຸນນະພາບເປັນກ້າວໆ, ວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ ໄດ້ຮັບການຈັດຕັ້ງປະຕິບັດ ຢ່າງມີສິດທິພາບ, ກົນໄກປະສານງານສະດວກ, ວ່ອງໄວ, ໂລ່ງລ່ຽນ; ການຕິດຕາມກວດກາການດໍາເນີນ ຄະດີຢູ່ສານອາຍາ ແລະ ການສັ່ງຟ້ອງຜູ້ຖືກຫາຂຶ້ນ ໄດ້ຮັບການຍົກສູງທາງດ້ານຄຸນນະພາບ; ວຽກງານ ຕິດຕາມກວດກາ ການປະຕິບັດກົດໝາຍຢູ່ຄ້າຍຄຸມຂັງ-ດັດສ້າງ ມີຄຸນນະພາບດີຂຶ້ນ, ການແຕ່ງຕັ້ງພະນັກງານ ລົງປະຈໍາຢູ່ຄ້າຍຄຸມຂັງ-ດັດສ້າງ, ເກັບກໍາບັນຊີຜູ້ຖືກຫາ ແລະ ນັກໂທດທີ່ຂໍອະນຸຍາດ, ການກັກຂັງຜູ້ຖືກຫາເກີນກໍານົດ, ການຄົ້ນຄວ້າອະໄພຍະໂທດປະຈໍາປີ ຖືກຕ້ອງ ແລະ ສອດຄ່ອງ ກັບກົດໝາຍ ແລະ ລະບຽບການ.

ໂອກາດນີ້, ທ່ານ ໄຊຊະນະ ໂຄດພູທອນ ໄດ້ຮຽກຮ້ອງໃຫ້ຜູ້ແທນ ຈົ່ງເຊີດຊູຄວາມຮັບຜິດຊອບຂອງຕົນ ໃນການເຮັດລ້ອນໜ້າທີ່ທີ່ພັກ, ລັດ ແລະ ປະຊາຊົນມອບໝາຍໃຫ້; ຮັບໃຊ້ຊາດ, ຮັບໃຊ້ປະຊາຊົນ ດ້ວຍຄວາມບໍລິສຸດໃຈ, ນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປຈັດຕັ້ງຜັນຂະຫຍາຍຢູ່ກົມກອງຂອງຕົນ ເຂົ້າໃນວຽກງານຕົວຈິງ ຢ່າງມີຜົນສໍາເລັດ; ພັດທະນາວຽກງານ ໄອຍະການປະຊາຊົນ ຕາມທິດກ້າວໜ້າ, ທັນສະໄໝ ແລະ ວິທະຍາສາດ; ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ເຂົ້າສູ່ວຽກງານໄອຍະການປະຊາຊົນ; ຍົກສູງຄຸນນະພາບ ໃນການຕິດຕາມກວດກາ ການປະຕິບັດກົດໝາຍ, ການຕິດຕາມກວດກາທົ່ວໄປ, ການດໍາເນີນຄະດີປົກຄອງ, ການປະຕິບັດຄໍາຕັດສີນຂອງສານ; ສ້າງກົນໄກປະສານງານລະຫວ່າງ ອົງການໄອຍະການປະຊາຊົນ ກັບອົງການປົກຄອງ, ອົງການສືບສວນ-ສອບສວນ ຂອງເຈົ້າໜ້າທີ່ຕຳຫລວດ, ພາສີ, ປ່າໄມ້ ແລະ ອົງການສືບສວນ-ສອບສວນອື່ນ ຢ່າງກົມກຽວ ດ້ວຍການສ້າງບົດບັນທຶກຮ່ວມ, ນິຕິກຳ ແລະ ປື້ມຄູ່ມືອັນເປັນພື້ນຖານ ໃຫ້ແກ່ການຍົກສູງຄຸນນະພາບ ໃນການຕິດຕາມກວດກາ ການປະຕິບັດກົດໝາຍ, ແກ້ໄຂການລະເມີດທາງປົກຄອງ, ນຳເອົາຜູ້ກະທຳຜິດມາດຳເນີນຄະດີ, ສັ່ງຟ້ອງໃຫ້ສານຕັດສິນຖືກຕ້ອງ, ເປັນທຳ, ເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ, ປະເທດຊາດຈະເລີນກ້າວໜ້າຢ່າງບໍ່ຢຸດຢັ້ງ.

ຂ່າວ: ກິດຕາ

KPL