ຂປລ. ໃນປີ 2024 ນີ້, ລັດວິສາຫະກິດໂຮງພິມແຫ່ງລັດ ໄດ້ປະຕິບັດພາລະບົດບາດ, ສິດ ແລະ ໜ້າທີຂອງຕົນເອງ ສຳເລັດຕາມເປົ້າໝາຍ ເຮັດໃຫ້ການນຳເນີນທຸລະກິດ ມີການເຕີບໃຫຍ່ຂະຫຍາຍຕົວ ຢ່າງຕໍ່ເນື່ອງ ເຊິ່ງນັບແຕ່ເດືອນມັງກອນ ຫາເດືອນພະຈິກ ສາມາດຜະລິດສິ່ງພິມ ຮັບໃຊ້ສັງຄົມ ໄດ້ທັງໝົດ 280 ລ້ານກວ່າໜ້າ, ສ້າງລາຍຮັບໄດ້ 39 ຕື້ກວ່າກີບ ແລະ ສາມາດມອບພັດທະ ໃຫ້ລັດຖະບານໄດ້ 3,2 ຕື້ກວ່າກີບ.

ທ່ານ ໄມອອນ ທຳມະວົງ ຜູ້ອຳນວຍການລັດວິສາຫະກິດໂຮງພິມແຫ່ງລັດ ໃຫ້ສຳພາດ ໃນວັນທີ 26 ທັນວາ 2024 ນີ້ວ່າ: ໃນປີ 2024 ນີ້, ຄະນະພັກ, ຄະນະອໍານວຍການໂຮງພິມແຫ່ງລັດ ໄດ້ເອົາໃຈໃສ່ ນຳພາ-ຊີ້ນໍາ ຈັດຕັ້ງການຜະລິດ ໃຫ້ໄປຕາມແຜນການ, ເປັນລະບົບຕ່ອງໂສ້ ຂອງການຜະລິດແຕ່ລະພະແນກ, ຂະແໜງການ ໄດ້ດີ ສາມາດຕອບສະໜອງ ຕາມຄວາມຕ້ອງການຂອງລູກຄ້າ ທີ່ມາໃຊ້ບໍລິການ ເຊິ່ງນັບແຕ່ເດືອນມັງກອນ ຫາ ເດືອນພະຈິກ 2024 ສາມາດຜະລິດສິ່ງພິມ ຮັບໃຊ້ສັງຄົມ ໄດ້ທັງໝົດ 280 ລ້ານກວ່າໜ້າ, ສ້າງລາຍຮັບໄດ້ 39 ຕື້ກວ່າກີບ, ມອບພັດທະໃຫ້ລັດຖະບານໄດ້ 3,2 ຕື້ກວ່າກີບ, ປະຕິບັດນະໂຍບາຍຕໍ່ພະນັກງານ 11 ລ້ານກວ່າກີບ, ປະກອບສ່ວນຊ່ວຍເຫລືອສັງຄົມ 240 ກວ່າລ້ານກີບ.

ໃນໄລຍະ 11 ເດືອນຜ່ານມາ ພະນັກງານ ພາຍໃນໂຮງພິມແຫ່ງລັດ ໄດ້ມີຄວາມຫ້າວຫັນຕື່ນຕົວໃຫ້ການຮ່ວມມື, ມີຄວາມສາມັກຄີເປັນເອກະພາບ, ຈັດຕັ້ງນໍາພາ ແລະ ໃກ້ຊິດຕິດແທດ ເຂົ້າໃນວຽກງານຕົວຈິງ ເຮັດໃຫ້ການປະຕິບັດແຜນວຽກ ໃນແຕ່ລະມື້-ແຕ່ລະອາທິດ, ແຕ່ລະໜ້າວຽກ ສໍາເລັດຕາມກຳນົດເວລາ, ຮັບປະກັນດ້ານປະລິມານ ແລະ ຄຸນນະພາບ ໃນນີ້, ໄດ້ຈັດພິມປຶ້ມໂຄສະນາອົບຮົມສູນກາງພັກ (ພາລະກິດ ແລະ ການເຄື່ອນໄຫວຂອງອາດີດປະທານ ຄໍາໄຕ ສີພັນດອນ ໃນໂອກາດສະເຫລີມສະຫລອງ ຄົບຮອບ 100 ປີ) ຄຽງຄູ່ກັບການຜະລິດວຽກປະຈຳ ເຊັ່ນ: ພິມໜັງສືພິມ, ວາລະສານ, ໃບບິນການແຈ້ງເກີດ, ໃບບິນການແຈ້ງເສຍຊີວິດ, ໃບບິນອາກອນຈຸລະພາກ, ສະແຕມອາກອນຢາສູບ, ໃບປະກາດ, ໂປຣສະເຕີ, ແຜ່ນພັບ, ຖົງຫິ້ວ, ບົງ-ບິນ, ປະຕິທິນ, ປຶ້ມ ແລະ ເອກະສານອື່ນໆ ສໍາເລັດທັນເວລາ, ສະໜອງ-ຈັດສົ່ງ ໄດ້ຕາມຄວາມຕ້ອງການ ຂອງລູກຄ້າພາຍໃນ ນະຄອນຫລວງ-ຕ່າງແຂວງ ທັງຮັບປະກັນປະລິມານ ແລະ ຄຸນນະພາບ-ການຫຸ້ມຫໍ່, ສ້າງຄວາມພໍໃຈ ໃຫ້ລູກຄ້າທີ່ມາໃຊ້ບໍລິການ, ພ້ອມນີ້, ຍັງໄດ້ເອົາໃຈໃສ່ປົກປັກຮັກສາ ວັດຖຸ-ອຸປະກອນເຄື່ອງມືທໍາການຜະລິດ, ສະຖານທີ່ເຮັດວຽກ ໃຫ້ມີຄວາມສະອາດ, ໜ່ວຍງານສ້ອມແປງ ເຖິງຈະມີຄົນໜ້ອຍ ແຕ່ກໍໄດ້ເອົາໃຈໃສ່ກວດກາ, ສ້ອມແປງເຄື່ອງຈັກເວລາຕິດຂັດ, ຕິດຕັ້ງແອເຢັນ ພ້ອມທັງສ້ອມແປງເຄື່ອງໃຊ້ຕ່າງໆ ທີ່ເປ່ເພທັນກັບຄວາມຕ້ອງການ.

ທ່ານ ໄມອອນ ທຳມະວົງ ໃຫ້ຮູ້ອີກວ່າ: ບໍລິສັດ ລັດວິສາຫະກິດໂຮງພິມແຫ່ງລັດ ສ້າງຕັ້ງຂຶ້ນ ຕິດພັນກັບຂະບວນການປະຕິວັດ-ຕໍ່ສູ້ປົດປ່ອຍຊາດ ເຊິ່ງໄດ້ສືບທອດມາຈາກໂຮງພິມແນວລາວອິດສະລະ, ໂຮງພິມແນວລາວຮັກຊາດ ແລະ ໂຮງພິມແຫ່ງຊາດ ໃນເມື່ອກ່ອນ, ສ້າງຕັ້ງຂຶ້ນໃນວັນທີ 13 ສິງຫາ 1950, ຫລັງຈາກນັ້ນ, ມາຮອດປີ 1989 ໄດ້ຫັນມາເປັນທຸລະກິດ ກໍຄື ປ່ຽນມາເປັນ ບໍລິສັດ ລັດວິສາຫະກິດໂຮງພິມແຫ່ງລັດ ຈົນເຖິງປັດຈຸບັນ, ເຊິ່ງໄດ້ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ ຢ່າງຕໍ່ເນື່ອງ, ໄດ້ນຳໃຊ້ເຄື່ອງຈັກທີ່ທັນສະໄໝ ເຂົ້າໃນການຈັດພິມ, ສາມາດສັ່ງພິມໄດ້ ຕາມຄວາມຮຽກຮ້ອງຕ້ອງການ ຂອງຜູ້ມາໃຊ້ບໍລິການ, ພ້ອມດຽວກັນນັ້ນ, ກໍມີພະນັກງານທີ່ມີປະສົບການ, ມີຄວາມຮູ້, ມີຄວາມຊຳນິຊຳນານ ໃນການດຳເນີນການ ເຮັດໃຫ້ໂຮງພິມມີຄວາມຍືນຍົງຄົງຕົວ, ສ້າງຜົນກຳໄລ ໃນແຕ່ລະປີ.

ເນື່ອງໃນໂອກາດສົ່ງທ້າຍປີເກົ່າ 2024 ຕ້ອນຮັບປີໃໝ່ 2025 ທີ່ຈະມາເຖິງ ທ່ານ ໄມອອນ ທຳມະວົງ ກໍໄດ້ຝາກຄຳອວຍພອນໄຊອັນປະເສີີດ ເຖິງການນຳພັກ, ລັດ ຕະຫລອດຮອດ ກຸ່ມລູກຄ້າ ຜູ້ມາໃຊ້ບໍລິການ ຢູ່ໂຮງພິມແຫ່ງລັດ ຈົ່ງມີສຸຂະພາບເຂັ້ມແຂງ, ມີພາລານາໄມສົມບູນ, ປະສົບຜົນສຳເລັດ ໃນໜ້າທີ່ການງານ ທັງຊີວິດສ່ວນຕົວ ແລະ ຄອບຄົວ ຕະຫລອດໄປ.

KPL