ຂປລ. ໃນວັນທີ 5 ທັນວາ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຢ້ຽມຂ່ຳນັບ ສົມເດັດ ມະຫາ ຣັດສະເພຍທິກາ ທິບໍດີ ຄຸນ ສຸດາຣີ ປະທານສະພາແຫ່ງຊາດ ແຫ່ງ ຣາຊະອານາຈັກ ກຳປູເຈຍ ຢູ່ ສະພາແຫ່ງຊາດ ກຳປູເຈຍ.

ໃນໂອກາດນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຮູ້ສຶກ ປິຕິຍິນດີທີ່ໄດ້ພົບປະກັບ ສົມເດັດ ມະຫາ ຣັດສະເພຍທິກາ ທິບໍດີ ກຸນ ສຸດາຣີ ປະທານສະພາ ແຫ່ງຊາດ ແຫ່ງຣາຊະອານາຈັກ ກຳປູເຈຍ ແລະ ຖືໂອກາດສຳຄັນນີ້ ນຳເອົາຄວາມຢື້ຢາມຖາມຂ່າວຈາກ ປະທານສະພາແຫ່ງຊາດລາວ ທ່ານ ໄຊສົມພອນ ພົມວິຫານ ແລະ ການນໍາພັກ-ລັດຖະບານ ແຫ່ງ ສປປ ລາວ ມາຍັງ ສົມເດັດ, ສະແດງຄວາມຊົມເຊີຍ ຢ່າງສຸດໃຈຕໍ່ວັນ ປະກາດເອກະລາດ ຄົບຮອບ 71 ປີ ຂອງ ຣາຊະອານາຈັກ ກໍາປູເຈຍ (09 ພະຈິກ 1953) ແລະ ຜົນສໍາເລັດ ໃນການເປັນເຈົ້້າພາບ ຈັດກອງປະຊຸມລັດຖະມົນຕີ ສິ່ງແວດລ້ອມ ອະນຸພາກພື້ນລຸ່ມແມ່ນໍ້າຂອງຄັ້ງທີ 6 ໃນເດືອນກັນຍາ 2024 ຜ່ານມາ ແລະ ການກະກຽມເປັນເຈົ້້າພາບ ຈັດຕັ້ງສົນທິສັນຍາໂອຕາວາ 2024 ວ່າດ້ວຍ ລະເບີດຝັງດິນ. ລັດຖະບານ ແຫ່ງ ສປປ ລາວ ສະແດງຄວາມຊົມເຊີຍຕໍ່ຜົນສໍາເລັດ ໃນການພັດທະນາ ເສດຖະກິດ-ສັງຄົມ ຂອງລັດຖະບານ ແລະ ປະຊາຊົນກຳປູເຈຍ ຍາດມາໄດ້ໃນໄລຍະຜ່ານມາ, ເຮັດໃຫ້ປະເທດຊາດ ມີຄວາມສີວິໄລກ້າວໜ້າ, ຮັກສາໄດ້ມີສະຖຽນລະພາບ ທາງດ້ານ ການເມືອງ, ເສດຖະກິດຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ກໍໄດ້ຮັບການປົວແປງດີຂຶ້ນເປັນກ້າວໆ ບົດບາດອິດທິພົນຊື່ສຽງຂອງກໍາປູເຈຍ ກໍໄດ້ຮັບ ການຍົກສູງຂຶ້ນ ໃນເວທີພາກພື້ນ ແລະ ສາກົນ. ພ້ອມນັ້ນ, ສອງຝ່າຍ ໄດ້ຕີລາຄາສູງຕໍ່ການ ພົວພັນຮ່ວມມືອັນແໜ້ນແຟ້ນ ຂອງສອງສະພາແຫ່ງຊາດລາວ ແລະ ກຳປູເຈຍ, ສະແດງອອກ ໃນການແລກປ່ຽນ ການພົບປະຢ້ຽມຢາມ ຂອງຄະນະຜູ້ແທນສອງຝ່າຍ ເພື່ອຖ່າຍທອດບົດຮຽນນຳກັນ ໃນໄລຍະຜ່ານມາ ເຮັດໃຫ້ການພົວພັນຮ່ວມມືສອງຝ່າຍ ນັບມື້ແຕກດອກ ອອກຜົນ, ຊົມເຊີຍຄວາມຄືບໜ້າ ຂອງວຽກງານຊາຍແດນ ທີ່ສອງຝ່າຍໄດ້ຮ່ວມກັນສຳຫລວດ ແລະ ປັກຫລັກໝາຍຊາຍແດນ ໄດ້ເປັນສ່ວນໃຫຍ່ ແລະ ເຫັນດີຊຸກຍູ້ໃຫ້ສືບຕໍ່ ການສຳຫລວດ ໃນສ່ວນທີ່ຍັງຄົງຄ້າງ ບົນຈິດໃຈທີ່ເປັນຍາດພີ່ນ້ອງ ບ້ານໃກ້ເຮືອນຄຽງດ້ວຍກັນ ເພື່ອເຮັດໃຫ້ຊາຍແດນ ເປັນຊາຍແດນແຫ່ງສັນຕິພາບ, ມີຄວາມສະຫງົບ ແລະ ມີການຮ່ວມມື ເພື່ອການພັດທະນາ ໃຫ້ຈະເລີນຮຸ່ງເຮືອງຕະຫລອດໄປ, ພ້ອມນີ້ ສອງຝ່າຍ ໄດ້ສະເໜີໃຫ້ເພີ່ມການຮ່ວມມືທີ່ມີທ່າແຮງ ເປັນຕົ້ນ ການຄ້າ-ການລົງທຶນ, ການທ່ອງທ່ຽວ, ຍົກສູງການຮ່ວມມືດ້ານວັດທະນະທຳ ແລະ ຮີດຄອງປະເພນີທີ່ດີງາມ ຂອງສອງປະເທດ ແລະ ການໄປມາຫາສູ່ກັນ ຂອງປະຊາຊົນ ລາວ-ກຳປູເຈຍ ໃຫ້ນັບມື້ນັບສູງຂຶ້ນ, ສອງຝ່າຍ ຍັງໄດ້ປຶກສາຫາລືເຖິງແຜນວຽກໃນປີ 2025 ກໍຄື ການກະກຽມຈັດກອງປະຊຸມຄະນະກຳມາການຮ່ວມມື ຮັກສາຄວາມສະຫງົບຮຽບຮ້ອຍ ຕາມຊາຍແດນ ລາວ-ກຳປູເຈຍ ຄັ້ງທີ 3 ທີ່ ສປປ ລາວ ແລະ ກອງປະຊຸມຕ່າງໆ ທີ່ກ່ຽວຂ້ອງພາຍໃຕ້ສົນທິສັນຍາ ວ່າດ້ວຍ ການກໍານົດຊາຍແດນ ລາວ-ກໍາປູເຈຍ ແລະ ກອງປະຊຸມຄະນະກຳມາທິການຊາຍແດນ ລາວ-ກຳປູເຈຍ ຄັ້ງທີ 8 ທີ່ຝ່າຍກໍາປູເຈຍ ຈະເປັນເຈົ້້າພາບໃນຕົ້ນປີ 2025.

ນອກຈາກນັ້ນ, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງມາຍັງ ພັກ, ລັດ ແລະ ປະຊາຊົນກໍາປູເຈຍ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນໄລຍະການເປັນປະທານ ໝູນວຽນອາຊຽນ ກໍຄື ການເປັນເຈົ້້າພາບ ຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45, ກອງປະຊຸມສະມັດຊາໃຫຍ່ ຄັ້ງທີ 45 ທີ່ ນະຄອນຫລວງວຽງຈັນ ຈົນໄດ້ຮັບຜົນສໍາເລັດໃນລະດັບຄາດໝາຍ. ໃນຂະນະດຽວກັນ, ສົມເດັດ ມະຫາ ຣັດສະເພຍທິກາ ທິບໍດີ ຄຸນ ສຸດາຣີ ໄດ້ຢືນຢັນຈະສືບຕໍ່ຊຸກຍູ້ ໃຫ້ສອງສະພາແຫ່ງຊາດ ກຳປູເຈຍ-ລາວ ຈັດຕັ້ງປະຕິບັດຜົນ ການຕົກລົງຮ່ວມກັນ ລະຫວ່າງ ສອງນາຍົກລັດຖະມົນຕີ ລາວ-ກໍາປູເຈຍ ໃນໄລຍະຜ່ານມາ ໃຫ້ເປັນຮູບປະທໍາ ເພື່ອນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ກໍາປູເຈຍ, ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ຈົ່ງຍືນຍົງຕະຫລອດໄປ.

ຫລັງຈາກນັ້ນ, ທ່ານ ນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ເຂົ້າຢ້ຽມຂ່ຳນັບ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ເຊນ ປະທານສະພາສູງ ແຫ່ງ ຣາຊະອານາຈັກ ກໍາປູເຈຍ, ທີ່ ຫ້ອງວ່າການພັກ ຊີພີພີ (Vimean 7Makara) ເຊິ່ງສອງຝ່າຍ ໄດ້ປຶກສາຫາລື ແລະ ແລກປ່ຽນຄໍາຄິດເຫັນໃນຫລາຍດ້ານ, ຕີລາຄາສູງຕໍ່ການພົວພັນດ້ານການເມືອງຂອງ ສອງພັກ, ສອງລັດຖະບານ ແລະ ອົງການນິຕິບັນຍັດສອງປະເທດ ລາວ-ກຳປູເຈຍ ທີ່ສືບຕໍ່ໄດ້ຮັບການ ເສີມຂະຫຍາຍຂຶ້ນຢ່າງຕໍ່ເນື່ອງ, ພ້ອມທັງ ໄດ້ຢືນຢັນຈະເພີ່ມທະວີ ການຮ່ວມມື ແລະ ສະໜັບສະໜູນກັນຍິ່ງຂຶ້ນ ໂດຍສະເພາະ ໃນທ່າມກາງສະພາບການ ຂອງໂລກມີຄວາມສັບສົນນີ້ ຍິ່ງຕ້ອງສາມັກຄີກັນຫລາຍຂຶ້ນ ເພື່ອຮັບມືກັບບັນດາສິ່ງທ້າທາຍຕ່າງໆຮ່ວມກັນ, ສອງຝ່າຍ ເຫັນດີໃຫ້ສືບຕໍ່ຊຸກຍູ້ການພົບປະແລກປ່ຽນ ຂອງຄະນະຜູ້ແທນສອງປະເທດ ຢ່າງເປັນປົກກະຕິ, ເພີ່ມທະວີການຮ່ວມມື ໃນຂະແໜງການທີ່ມີທ່າແຮງຮ່ວມກັນ, ຊຸກຍູ້ການຈັດຕັ້ງປະຕິບັດວຽກງານ ປັກຫລັກໝາຍຊາຍແດນ ລາວ-ກຳປູເຈຍ ໃຫ້ມີຜົນສຳເລັດ ບົນພື້ນຖານຄວາມເຂົ້າອົກເຂົ້າໃຈກັນ. ຝ່າຍລາວ ຍັງໄດ້ແຈ້ງໃຫ້ຊາບກ່ຽວກັບ ຜົນຂອງກອງປະຊຸມພົບປະສອງຝ່າຍ ລະຫວ່າງ ສອງນາຍົກລັດຖະມົນຕີ ລາວ-ກຳປູເຈຍ ເຊິ່ງໄດ້ປຶກສາຫາລືກັນໃນຫລາຍບັນຫາສຳຄັນຮ່ວມກັນ, ໂດຍສະເພາະ ແມ່ນການຈັດຕັ້ງຜັນຂະຫຍາຍ ການເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລາວ-ກໍາປູເຈຍ ກໍຄື ບັນດາຂໍ້ຕົກລົງຕ່າງໆ ຂອງການນໍາສອງປະເທດ ໃນໄລຍະຜ່ານມາ ພ້ອມທັງວາງທິດທາງ ການຮ່ວມມືໃນຕໍ່ໜ້າ. ໃນໂອກາດດຽວກັນນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ກໍໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນຈາກ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ຍັງມາ ສົມເດັດ ຮຸນ ເຊນ ເພື່ອນມິດທີ່ສະໜິດສະໜົມ ຂອງປະຊາຊົນລາວ ແລະ ໄດ້ເຊື້ອເຊີນ ສົມເດັດ ພ້ອມດ້ວຍ ຄະນະຜູ້ແທນ ຂັ້ນສູງຂອງສະພາສູງກຳປູເຈຍ ເດີນທາງໄປຢ້ຽມຢາມ ສປປ ລາວ ຢ່າງເປັນທາງການ ໃນຕົ້ນປີ 2025..

ໃນຕອນບ່າຍວັນດຽວກັນນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ຍັງໄດ້ເຂົ້າຮ່ວມເປັນແຂກກິດຕິມະສັກຂອງ ກອງປະຊຸມພາກທຸລະກິດ ລາວ-ກໍາປູເຈຍ. ພາຍຫລັງສຳເລັດ ການເຂົ້າຮ່ວມກອງປະຊຸມ ຄະນະຜູ້ແທນຂັ້ນສູງຂອງ ສປປ ລາວ ກໍໄດ້ເດີນທາງກັບຄືນ ນະຄອນຫລວງວຽງຈັນ.

ຂ່າວ-ພາບ: ກຕທ

KPL