*ທ່າມກາງບັນຍາກາດອັນເບີກບານມ່ວນຊື່ນ ທີ່ພີ່ນ້ອງຮ່ວມຊາດ, ພະນັກງານ ແລະ ນັກຮົບໃນທົ່ວປະເທດ ພວມອອກແຮງແຂ່ງຂັນກັນສ້າງຜົນງານເປັນຂະບວນຟົດຟ້ືນ ໃນໂອກາດສະເຫລີມສະຫລອງວັນຊາດ 2 ທັນວາ ຄົບຮອບ 49ປີ, ປີນີ້ ກໍ່ພໍດີຄົບຮອບ 104 ປີ (13 ທັນວາ 1920-13 ທັນວາ 2024) ວັນເກີດປະທານ ໄກສອນ ພົມວິຫານ ຜູ້ນໍາປະຕິວັດທີ່ແສນເຄົາລົບຮັກຂອງປວງຊົນລາວບັນດາເຜົ່າ ເຊິ່ງກອງບັນນາທິການໜັງສືພິມປະເທດລາວ ສໍານັກຂ່າວສານປະເທດລາວ ຂໍຖືໂອກາດອັນສຸດທີ່ມີຄວາມໝາຍຄວາມສໍາຄັນດັ່ງກ່າວນີ້ນໍາເອົາບາງເນື້ອໃນກ່ຽວກັບຜົນງານ, ຄຸນງາມຄວາມດີ ແລະ ພ້ອມກັນຮ່ຳຮຽນເອົາແບບຢ່າງຄຸນສົມບັດສິນທຳປະຕິວັດ, ຂອງເພິ່ນເຂົ້າສູ່ຊີວິດ ແລະ ການກະທຳຕົວຈິງ.

    ປະທານ ໄກສອນ ພົມວິຫານ ແມ່ນນັກຮັກຊາດ , ນັກປະຕິວັດ ແລະ ຜູ້ນຳທີ່ດີເດັ່ນ ຊຶ່ງການເປັນນັກປະຕິວັດ, ເປັນຜູ້ນຳຂອງເພິ່ນນັ້ນແມ່ນເລີ່ມຈາກຄວາມຮັກພີ່ນ້ອງຮ່ວມຊາດ, ຮັກເຊື້ອຊາດ, ຮັກບ້ານເກີດເມືອງນອນ ແລະ ຍ້ອນມີຄວາມຮັກອັນດູດດື່ມ, ເພິ່ນໄດ້ເຂົ້າຮ່ວມຂະບວນການຕໍ່ສູ້ເພື່ອສິດເສລີພາບປະຊາທິປະໄຕ ຢູ່ຫວຽດນາມ ໃນຊຸມປີ 1936-1939. ໃນຂະນະນັ້ນ, ເພິ່ນໄດ້ຄົ້ນຄວ້າປະຫວັດສາດຂອງຊາດ ແລະ ໄດ້ຮູ້ໄດ້ເຫັນການກົດຂີ່ຂົ່ມເຫັງຂອງຕ່າງຊາດ, ເມື່ອໄດ້ຮັບຜົນກະທົບທີ່ຕັ້ງໜ້າຈາກກະແສຟອງ ປະຕິວັດເພິ່ນຈຶ່ງໄດ້ກາຍເປັນນັກປະຕິວັດຮັກຊາດຕັ້ງແຕ່ເຍົາໄວ. ທັງນີ້ເປັນການສະແດງໃຫ້ເຫັນວ່າປະທານ ໄກສອນ ພົມວິຫານ ແມ່ນຜູ້ນຳທີ່ມີອຸດົມຄະຕິສູງສົ່ງ ໂດຍຫວັງຢາກປົດປ່ອຍປະຊາຊົນອອກຈາກການເປັນຂ້ອຍຂ້າຕ່າງຊາດ, ຫວັງປົດປ່ອຍປະເທດຊາດອອກຈາກ ການເປັນຫົວເມືອງຂຶ້ນຂອງຕ່າງຊາດ ເພື່ອເຮັດໃຫ້ຊາດມີເອກະລາດ, ສັນຕິພາບ ແລະ ສ້າງປະເທດຊາດ ໃຫ້ວັດທະນາຖາວອນ, ປະຊາຊົນຮັ່ງມີຜາສຸກ, ສັງຄົມສີວິໄລ ແລະ ຍຸຕິທຳ.

    ປະທານ ໄກສອນ ພົມວິຫານ ທີ່ເພິ່ນມັກອ່ານ ແລະ ຄົ້ນຄວ້າກ່ຽວກັບຫລັກການພື້ນຖານຂອງລັດທິມາກ ແລະ ປຶ້ມປ່ຽນແປງວິທີເຮັດວຽກຂອງ ປະທານ ໂຮ່ຈີ່ມິງ. ນອກນັ້ນ, ເພິ່ນຍັງເປັນຜູ້ທີ່ໝູນໃຊ້ທິດສະດີເຂົ້າກັບຂະບວນການຕໍ່ສູ້ປະຕິວັດ ຢ່າງມີຊີວິດຊີວາອັນໄດ້ເຮັດໃຫ້ທິດ ສະດີກາຍເປັນກຳລັງແຮງຕົວຈິງ ໃນການຍູ້ຂະບວນການປະຕິວັດ. ການເປັນຜູ້ນຳທີ່ດີເດັ່ນຂອງປະທານ ໄກສອນ ພົມວິຫານ ໄດ້ສະແດງອອກໃນການເປັນນັກຍຸດທະສາດການທະຫານ-ການເມືອງ ທີ່ມີຄວາມຊຳນິຊຳນານ-ປະດິດສ້າງໃນການນຳໃຊ້ວິທີການແບບສັງລວມຮອບດ້ານເຂົ້າໃນການປະຕິວັດ; ເພິ່ນເປັນຜູ້ວາງຍຸດທະສາດ, ໃຊ້ກຳລັງແຮງດ້ານການທະຫານຂອງກຳລັງປະກອບອາວຸດສົມທົບກັບການຕໍ່ສູ້ດ້ານການເມືອງ ທັງຕີທັງ ເຈລະຈາ, ຍຶດອຳນາດ ແລະ ປັບປຸງອຳນາດການປົກຄອງເປັນແຕ່ລະພາກສ່ວນ, ແຕ່ຂັ້ນຮາກຖານຊົນນະບົດ ແລະ ບໍລິເວນຍຸດທະສາດທັງ 3 ເຂດ ກ້າວຂຶ້ນຍຶດອຳນາດຢູ່ຂັ້ນສູນກາງ, ສ້າງ ແລະ ຂະຫຍາຍເຂດທີ່ໝັ້ນການປະຕິວັດ, ນຳໃຊ້ 3 ບາດຄ້ອນຍຸດທະສາດ ເພື່ອຂັບໄລ່ຈັກກະພັດຜູ້ຮຸກຮານ ແລະ ລູກມື, ກ້າວຂຶ້ນປົດປ່ອຍປະເທດຊາດຢ່າງສົມບູນ.

     ປະທານ ໄກສອນ ພົມວິຫານ ເປັນຜູ້ນຳທີ່ກຳແໜ້ນສະພາວະຄວາມເປັນຈິງຂອງປະເທດຊາດ ແລະ ການປ່ຽນແປງໃໝ່ຂອງສະພາບແວດລ້ອມພາຍນອກ, ເພ່ີ່ນມີຄວາມສະດຸ້ງໄວ ແລະ ກ້າຕັດສິນໃຈປັບປຸງແນວທາງປ່ຽນແປງໃໝ່ຢູ່ປະເທດເຮົາ ແລະ ໄດ້ນຳພາການຈັດຕັ້ງປະຕິບັດໃຫ້ດຳເນີນໄປຢ່າງມີຫລັກການ, ມີບາດກ້າວ ແລະ ຂັ້ນຕອນທີ່ເໝາະສົມ, ມີການສະຫລຸບຖອດຖອນບົດຮຽນ ແລະ ປັບປຸງບູລະນະເພ່ີ່ມເຕີມແນວທາງ ດັ່ງກ່າວເປັນແຕ່ລະໄລຍະຈົນເປັນແນວທາງປ່ຽນແປງໃໝ່ຮອບດ້ານທີ່ສົມບູນ ແລະ ປະຕິບັດໄດ້ຮັບໝາກຜົນອັນຈະແຈ້ງ.

     ປະທານ ໄກສອນ ພົມວິຫານ ແມ່ນຜູ້ທີ່ມີຄວາມເດັດຂາດ ແລະ ແນວຄິດປະຕິວັດສຸດກົກສຸດປາຍ, ມີຫົວຄິດປະດິດສ້າງ, ກ້າຄິດ, ກ້າທໍາ, ກ້າຮັບຜິດຊອບເປັນຕົ້ນແມ່ນການປະຕິບັດຍຸດໂທບາຍ ເພື່ອປະຕິບັດຍຸດທະສາດຂອງການປະຕິວັດ. ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ, ປະທານ ໄກສອນ ພົມວິຫານ ກໍ່ບໍ່ໄດ້ລົດລະຕໍ່ການຈັດຕັ້ງນໍາພາ ເພື່ອເຮັດໃຫ້ພາລະກິດຂອງການປະຕິວັດ ໃນໄລຍະໃໝ່ໄດ້ຮັບຜົນສໍາເລັດຍິ່ງຂຶ້ນ; ນັ້ນຄືພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ. ຈາກຄຸນສົມບັດອັນລໍ້າເລີດ ແລະ  ພາລະກິດນໍາພາການປະຕິວັດ, ດ້ວຍຄຸນທາດຮັກຊາດ, ຄຸນທາດນັກ ປະຕິວັດຜູ້ດີເດັ່ນຄືດັ່ງກ່າວນັ້ນ ໄດ້ເປັນການປະກອບສ່ວນຢ່າງສໍາຄັນໃນການຊຸກຍູ້ພາລະກິດການຕໍ່ສູ້ໃນເມື່ອກ່ອນກໍ່ຄື ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດເຮົາໃນປັດຈຸບັນນີ້ ໃຫ້ມີຄວາມກ້າວໜ້າຍິ່ງຂຶ້ນ. ພາລະກິດອັນສູງສົ່ງຂອງ ປະທານ ໄກສອນ ພົມວິຫານ ຍາມໃດກໍ່ເປັນແສງສະຫວ່າງແຫ່ງການກ້າວເດີນ ແລະ ເປັນແບບຢ່າງທີ່ດີ ໃຫ້ແກ່ປະຊາຊົນລາວບັນດາເຜົ່າ, ເປັນທວນໄຟທີ່ບໍມີວັນດັບມອດ ແລະ ເປັນດວງໃຈຂອງປະຊາຊົນລາວບັນດາເຜົ່າຕະຫລອດໄປ.

    ຊີວິດ, ພາລະກິດ ແລະ ຜົນງານ ຂອງປະທານ ໄກສອນ ພົມວິຫານ ຍັງມີຫລາຍສິ່ງຫລາຍຢ່າງທີ່ໜ້າສົນໃຈ ແລະ ເປັນບົດຮຽນທີ່ດີສໍາລັບພາລະກິດ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຍັງຈະສືບຕໍ່ຮິບໂຮມເອົາມາສະເໜີຕໍ່ໄປ.

ໂດຍ: ແສງສະຫວັນ

KPL