*ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ  ໃຫ້ຮູ້ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ  IX ວ່າ:   ເພື່ອສ້າງຄວາມເຂັ້ມແຂງໃນການຈັດເກັບລາຍຮັບ- ຄຸ້ມຄອງລາຍຈ່າຍງົບປະມານໂດຍນໍາໃຊ້ເຄື່ອງມືທີ່ທັນສະໄໝ, ປະຕິບັດຕາມລະບຽບກົດໝາຍຢ່າງເຂັ້ມງວດເດັດຂາດ ຕໍ່ທຸກການກະທໍາທ່ີລະເມີດວິໄນການເງິນ, ສະກັດກັ້ນທຸກການຮົ່ວໄຫລໄປພ້ອມກັບການສ້າງຖານລາຍຮັບໃໝ່ ເພື່ອສ້າງສະຖຽນລະພາບທາງດ້ານການເງິນໃຫ້ມີຄວາມໜັກແໜ້ນ ແລະ ເຂັ້ມແຂງ.

     ໃນໄລຍະຜ່ານມາແຂວງຄໍາມ່ວນ  ໄດ້ມີການນໍາໃຊ້ເຄື່ອງມືທີ່ທັນສະໄໝ (ລະບົບເອເລັກໂຕນິກ) ໃນການຈັດເກັບລາຍຮັບເຂົ້າງົບປະມານທຸກໆປະເພດ, ດ້ວຍລະບົບ GFis ແລະ RTs ເຊື່ອມໂຍງຕໍ່ກັນຂັ້ນແຂວງ, ຂັ້ນເມືອງ ແລະ ສູນກາງ ລະບົບດັ່ງກ່າວນີ້ເຮັດໃຫ້ແຕ່ລະວັນ ຄັງເງິນແຫ່ງຊາດສາມາດກວດກາເຫັນໄດ້ການເຄື່ອນໄຫວໃນລະບົບຄັງເງິນຂອງທ້ອງຖິ່ນ, ນອກຈາກນັ້ນການເກັບລາຍຮັບພາສີສ່ວຍສາອາກອນເຂົ້າງົບປະມານ ນໍາໃຊ້ເຄື່ອງມືທີ່ທັນສະໄໝມີລະບົບ ASY CUDA, Suit’Tax Easy Pass. Lao National Single Window (LNW) ແລະ ລະບົເຄື່ອງມືອື່ນໆທີ່ມີ.

     ຮອດປັດຈຸບັນ ສາມາດເວົ້າໄດ້ວ່າໃນຂົງເຂດພາສີ ພວກເຮົາບໍ່ໄດ້ເກັບລາຍຮັບເປັນເງິນສົດ, ທາງດ້ານສ່ວຍສາອາກອນກໍ່ນໍາໃຊ້ລະບົບ TaoRis RalTax, anTias ເຂົ້າໃນການຄຸ້ມຄອງ, ການນໍາໃຊ້ລະບົບທີ່ທັນສະໄໝນີ້ ໄດ້ສ້າງເງື່ອນໄຂອໍານວຍຄວາມສະດວກໃຫ້ແກ່ຜູ້ປະກອບການໃນການແຈ້ງມອບພັນທະດ້ານພາສີ, ສ່ວຍສາອາກອນດ້ວຍຕົນເອງ ທັງຮັບປະກັນຕ້ານການຮົ່ວໄຫລ ແລະ ການຕົກເຮ່ຍເສຍຫາຍ  ເຊິ່ງຜ່ານການຈັດຕັ້ງປະຕິບັດ ເວົ້າໄດ້ວ່າການຈັດເກັບລາຍຮັບຂອງແຂວງ  ແມ່ນໄດ້ຕາມເປົ້າໝາຍທີ່ວາງໄວ້  ສະນັ້ນ, ຈຶ່ງຢາກໃຫ້ບັນດາແຂວງຕ່າງໆທົ່ວປະເທດ ຫັນການເກັບລາຍຮັບແບບທັນສະໄໝ ເພື່ອເຮັດໃຫ້ວຽກງານດັ່ງກ່າວ  ໄດ້ຮັບໝາກຜົນຫລາຍຂ້ຶນ.

    ນອກຈາກວຽກງານການຈັດເກັບລາຍຮັບແລ້ວ ຍັງໄດ້ເອົາໃຈໃສ່ແກ້ໄຂບັນຫາຢາເສບຕິດ  ເຊິ່ງຜ່ານການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃນໄລຍະຜ່ານມາເຫັນວ່າການສ້າງຄວາມຮັບຮູ້ກ່ຽວກັບຄວາມອັນຕະລາຍ, ຜົນຮ້າຍຂອງຢາເສບຕິດໃນທົ່ວສັງຄົມໄດ້ດີພໍສົມຄວນ, ປະຊາຊົນສ່ວນໃຫຍ່ໄດ້ ມີຄວາມຮັບຮູ້ເຂົ້າໃຈ ແລະ ໄດ້ມີສ່ວນຮ່ວມໃນການຈັດຕັ້ງປະຕິບັດແກ້ໄຂບັນຫາຢາເສບຕິດຢູ່ແຕ່ລະເມືອງ, ປະຊາຊົນມີສ່ວນຮ່ວມໃນການລາຍງານສະພາບປະກົດການຫຍໍ້ທໍ້, ລາຍງາຍເຖິງບຸກຄົນທີ່ມີສ່ວນພົວພັນເຖິງຢາເສບຕິດໃຫ້ເຈົ້າໜ້າທີ່ ເພື່ອສືບຕໍ່ກັກຕົວມາດໍາເນີນຄະດີຕາມຂັ້ນຕອນຂອງກົດໝາຍ, ໄດ້ປັບປຸງບົດບັນທຶກກອງປະຊຸມ 4 ພາກສ່ວນຄື: ອົງການສືບສວນ-ສອບສວນຂອງເຈົ້າໜ້າທີ່ຕໍາຫລວດແຂວງອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຕິດແຂວງ ກ່ຽວກັບການແກ້ໄຂ ແລະ ການດໍາເນີນຄະດີບັນຫາຢາເສບຕິດ.

   ພາກສ່ວນໃນທົ່ວສັງຄົມ ໄດ້ຖືເປົ້າການແກ້ໄຂບັນຫາຢາເສບຕິດເປັນວຽກງານທີ່ສໍາຄັນ ຈໍາເປັນຕ້ອງສືບສວນເຊິ່ງໄດ້ຍົກໃຫ້ເປັນວາລະແຫ່ງຊາດ ເພື່ອສຸມທຸກກໍາລັງແຮງໃນທົ່ວສັງຄົມເຂົ້າໃສ່ການແກ້ໄຂບັນຫາຂອງຊາດ ທີ່ໄດ້ກໍານົດແຕ່ປີ 2021- 2023 ໂດຍສົມທົບຫລາຍມາດຕະການເພື່ອແກ້ໄຂບັນຫາດັ່ງກ່າວ ເຊັ່ນ: ມາດຕະການທາງດ້ານວຽກງານນະໂຍບາຍ, ກົດໝາຍ ແລະ ຫລັກການພິຈາລະນາຂອງຂະແໜງການກ່ຽວຂ້ອງ. ສໍາລັບວຽກງານໃນຂົງເຂດຍຸຕິທໍາໄດ້ການພິຈາລະນາຕັດສິນຄະດີຈໍານວນໜຶ່ງຍັງບ່ໍທັນຮັບປະກັນຫລັກການດໍາເນີນຄະດີຕາມກົດໝາຍກໍານົດໄວ້ເປັນຕົ້ນ. ການເກັບກໍາຂໍ້ມູນຫລັກຖານ, ການວິເຄາະ-ວິໄຈ, ການຕີລາຄາຫລັກຖານ ແລະ ເຫດການຕົວຈິງຢູ່ສະຖານທີ່ເກີດເຫດຍັງບໍ່ທັນຮອບດ້ານ, ຄົບຖ້ວນ, ພາວະວິໄສເຮັດໃຫ້ການຕັດສິນຄະດີ ຫລື ການພິພາກສາຫລົບໄປ-ຫລົບມາຫລາຍຄັ້ງ ຫລື ຄໍາຕັດສິນທີ່ໃຊ້ໄດ້ຢ່າງເດັດຂາດແລ້ວ ບໍ່ສາມາດຈັດຕັ້ງປະຕິບັດໄດ້.

    ການປະກອບສໍານວນຄະດີຂອງເຈົ້າໜ້າທີ່ຍັງບໍ່ຈະແຈ້ງ, ບໍ່ມີຄວາມໜັກແໜ້ນ, ສ່ວນຫລາຍແມ່ນຍັງອີງໃສ່ ແຕ່ການຮັບສາລະພາບຂອງຜູ້ຖືກຫາ, ເຮັດໃຫ້ມີຫລາຍຄະຕິຕ້ອງໄດ້ສົ່ງຄືນໃຫ້ເຈົ້າໜ້າທີ່ເກັບກໍາຂໍ້ມູນຄືນໃໝ່  ແລະ ເຮັດໃຫ້ກາຍກໍານົດເວລາສືບສວນ-ສອບສວນກາຍເວລາເກີນທີ່ກົດໝາຍໄດ້ກໍານົດໄວ້. ການລົງເຄື່ອນໄຫວຕໍາກັນທາງດ້ານວິຊາການ ຕໍ່ກັບຂໍ້ຂັດແຍ່ງທີ່ເກີດຂຶ້ນ ຍັງບ່ໍທັນມີຄວາມເປັນເອກະພາບກັນລະຫວ່າງ ໄອຍະການກັບສານໃນການຕີຄວາມໝາຍບາງມາດຕາຂອງກົດໝາຍໃສ່ເຫດການ ໃນການພິຈາລະນາຄະດີຂອງສານ ບາງຄະດີສານແມ່ນຍັງບໍ່ທັນເປັນເອກະພາບເປັນຕ້ົນແມ່ນຄະດີຂໍ້ຂັດແຍ່ງກ່ຽວກັບທີ່ດິນ.

KPL