*ແຂວງວຽງຈັນ ແມ່ນແຂວງໜຶ່ງທີ່ມີຊື່ສຽງດ້ານອາຫານທ້ອງຖິ່ນຍອດນິຍົມ ຊຶ່ງເຮັດໃຫ້ຜູ້ບໍລິໂພກ ແລະ ນັກທ່ອງທ່ຽວຫລົງໄຫລລົດຊາດທີ່ເປັນເອກະລັກ  ແລະ ຈົນກາຍເປັນສິນຄ້າໜຶ່ງເມືອງໜຶ່ງຜະລິດຕະພັນທີ່ເປັນເອກະລັກຂອງ ແຂວງ  ເປັນຕົ້ນແມ່ນເຫລົ້າແກບ 100  ປີ,  ສົ້ມປາແຊບ,  ເຄື່ອງຫັດຖະກໍາ  ແລະ ອື່ນໆອີກຫລາຍຢ່າງ  ເຊິ່ງແຕ່ລະຢ່າງກໍມີເອກະລັກທີ່ແຕກຕ່າງກັນໄປ.  ແຕ່ແນວໃດກໍດີ ມື້ນີ້,  ຄໍລໍາສົ່ງເສີມທຸລະກິດຈະພາທ່ານມາຮູ້ຈັກໜຶ່ງໃນສິນຄ້າໂອ ດັອບຂອງ ແຂວງວຽງຈັນ ນັ້ນກໍຄືສົ້ມປາແຊບຈາກຮ້ານຢ້ຳ ມີຂາຍສົ້ມປາຕອງແຊບ ເປັນອີກຮ້ານທ່ີສັງຄົມໃຫ້ຄວາມໄວ້ໃຈບໍລິໂພກຢ່າງຫລວງຫລາຍ ທັງພາຍໃນ  ແລະ ຕ່າງແຂວງ  ສາມາດສ້າງລາຍຮັບໄດ້ຫລາຍລ້ານກີບຕໍ່ປີ.

     ນາງ ວຽງມອນ  ເພັດດາວົງ ເຈົ້າຂອງຮ້ານຂາຍສົ້ມປາຮ້ານຢ້ຳມີຂາຍສົ້ມປາຕອງແຊບ ໃຫ້ຮູ້ວ່າ: ຈຸດເລີ່ມຕົ້ນທີ່ໄດ້ມາເຮັດອາຊີບນີ້  ຍ້ອນພໍ່,  ແມ່ເຄີຍເຮັດມາເປັນເວລາຫລາຍສີບປີມາແລ້ວ  ເມື່ອເພີ່ນເຖົ້າແກ່ແລ້ວຕົນເອງຈຶ່ງໄດ້ສືບຕ່ໍ ເຮັດອາຊີບນ້ີມາ  ແລະ ກໍມີການປັບປຸງຜະລິດຕະພັນຕາມຄວາມຕ້ອງການຂອງຜູ້ບໍລິໂພກ ເປັນຕົ້ນເມື່ອກ່ອນການເຮັດສົ້ມປາ ແມ່ນຫ່ໍໃສ່ໃບຕອງ ແຕ່ປັດຈຸບັນຈະໃສ່ກັບ,  ໃສ່ຖົງຢ່າງອັດບ່ໍໃຫ້ລົມເຂົ້າ ເພື່ອເກັບຮັກສາໄວ້ໄດ້ດົນ  ແລະ ສາມາດຈັດສ່່ົງໄປຕ່າງແຂວງ ສະດວກຂຶ້ນກວ່າເກົ່າ ສະນັ້ນ, ຈຶ່ງເຮັດໃຫ້ສົ້ມປາຮ້ານເຮົາເລ່ີມເປັນທ່ີຮູ້ຈັກຫລາຍຂຶ້ນ ຈົນສ້າງຊື່ສຽງເຮັດໃຫ້ເມືອງ ຮັບຮອງເປັນສິນຄ້າໜຶ່ງເມືອງໜຶ່ງຜະລິດຕະພັນໃນ ປີ 2024 ທີ່ຜ່ານມານີ້, ຫລັງຈາກນັ້ນ ທາງ  ແຂວງກໍໄດ້ສົ່ງເສີມໃຫ້ມາຂາຍໃນງານບຸນທາດຫລວງ 2024  ເຫັນວ່າຜົນຕອບ ບໍ່ໄດ້ດີເທົ່າທີຄວນ ເນື່ອງຈາກວ່າສະຖານທີ່ຂາຍທ່ີເພີ່ນຈັດສັນໃຫ້ຢູ່ໂຊນດຽວກັບໂຊນເຄື່ອງນຸ່ງ ເຮັດໃຫ້ເຄື່ອງນຸ່ງບັງອາຫານໝົດ. ສະນັ້ນ, ປີຕໍ່ໄປກໍຢາກສະເໜີ ໃຫ້ຈັດໂຊນສໍາລັບຂາຍຜະລິດຕະພັນໂອດັອບປະເພດອາຫານສະເພາະ  ເພື່ອຄວາມຈົບງາມ  ແລະ ສ້າງຄວາມສົນໃຈໃຫ້ລູກຄ້າໄດ້ຫລາຍຂຶ້ນ.  ແຕ່ແນວໃດກໍດີສໍາລັບຜະລິດຕະພັນ ສົ້ມປາຮ້ານເຮົາຈະມີຈຸດເດັ່ນຢູ່ທີ່ວັດຖຸດິບ  ເພາະປາທ່ີນໍາມາ ເຮັດແມ່ນປາຕອງແທ້ໆ  ເຮັດໃຫ້ເນື້ອສົ້ມປາໜຽວ, ນຸ່ມ, ແໜ້ມດີສ່ວນໜັງໝູທີ່ນໍາມາປະສົມກໍຄັດສັນຢ່າງດີ  ເພື່ອໃຫ້ສົ້ມປາອອກມາແຊບຖືກໃຈລູກຄ້າທີ່ໄດ້ກິນ ກໍຕ້ອງກັບມາຊື້ຊໍ້າບໍ່ວ່າພາຍໃນ  ແລະ ຕ່າງແຂວງ.

    ນາງ ວຽງມອນ ໃຫ້ຮູ້ຕື່ມວ່າ: ການເຮັດສົ້ມປາໃນປັດຈຸບັນເນັ້ນຄວາມສະອາດ, ປອດໄພບ່ໍໃສ່ສານກັນບູດ. ສະນັ້ນ,  ເວລາຈັດສົ່ງຕ່າງແຂວງກໍຈະຕິດຕາມຕະຫລອດ ວ່າຮອດແລ້ວສົ້ມປາສົ້ມຫລາຍບໍ່, ພໍ່ດີກິນບໍ່ຖ້າສົ່ງໄປແລ້ວມັນສົ້ມ

ໂພດຈະບໍ່ສົ່ງຕ່າງແຂວງ,   ແຕ່ຫລາຍຄົນທີ່ຈັດສົ່ງໄປກໍ່ວ່າພໍດີກິນຈຶ່ງສົ່ງມາຕະຫລອດ  ແລະ  ເພີ່ມຂຶ້ນເລື້ອຍໆ. ສໍາລັບແຜນໃນອະນາຄົດຢາກສົ່ງອອກຕ່າງປະເທດ ແຕ່ຕ້ອງປັບປຸງເລື່ອງການຫຸ້ມຫໍ່ທີ່ໄດ້ມາດຕະຖານກ່ອນ ຈຶ່ງສາມາດສົ່ງ ອອກໄດ້.

    ສໍາລັບທ່ານໃດຢາກຊີມສ້ົມປາແຊບ ຂອງສິນຄ້າໂອດັອບຈາກເມືອງ ແກ້ວອຸດົມ ກໍສາມາດຕິດຕໍ່ໄດ້ທີ ເບີ 020 99552529 ຮັບຮອງວ່າບໍຜິດຫວັງ ຜູ້ຂຽນຮັບປະກັນຄວາມແຊບ ເພາະໄດ້ກິນມາແລ້ວ.

ໂດຍ: ມາລີດາ

KPL