ຂປລ. ເພື່ອເປັນການຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈ ວ່າດ້ວຍການສົ່ງເສີມການຮ່ວມມື ລະຫວ່າງ ພັກປະຊາຊົນປະຕິວັດລາວ ແລະ ພັກປະຊາຊົນມົງໂກລີ, ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນ ຕ່າງປະເທດສູນກາງພັກ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ປະເທດມົງໂກລີ ໃນວັນທີ 13-16 ພະຈິກ 2024 ຜ່ານ​ມາເພື່ອເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ລະຫວ່າງ ສອງພັກ, ສອງປະເທດ ລາວ-ມົງໂກລີ.

ໃນການຢ້ຽມຢາມຄັ້ງນີ້, ທ່ານ ທອງສະຫວັນ ພົມວິຫານ ໄດ້ເຂົ້າຢ້ຽມຂໍ່ານັບ, ພົບປະ ແລະ ເຮັດວຽກກັບການນຳຂັ້ນສູງຂອງພັກປະຊາຊົນມົງໂກລີ ຫລາຍພາກສ່ວນ ເປັນຕົ້ນ ເຂົ້າຢ້ຽມຂ່ຳນັບ ທ່ານ ລົບຊັງນໍາສະແລ ອໍໂຢງ-ເອຣ໌ຕິນ ປະທານ ພັກປະຊາຊົນມົງໂກລີ, ນາຍົກລັດຖະມົນຕີ ແຫ່ງ ມົງໂກລີ ແລະ ພົບປະສອງຝ່າຍກັບ ທ່ານ ຊອດບາທາຣ ຍັງກົກ ເລຂາທິການໃຫຍ່ ພັກປະຊາຊົນມົງໂກລີ, ທ່ານ ເຄ ນຽມບາທາຣ໌, ເຈົ້າຄອງນະຄອນຫລວງ ອູລານບາຕໍ, ປະທານຄະນະພັກປະຊາຊົນມົງໂກລີ ຂອງ ນະຄອນຫລວງອູລານບາຕໍ; ພົບປະກັບ ທ່ານ ນາງ ເຈ ອຸນດຣຸາມ ສະມາຊິກສະພາຄູຣານໃຫຍ່ ແຫ່ງ ມົງໂກລີ, ຮອງປະທານຄະນະມິດຕະພາບ ລັດຖະສະພາ ມົງໂກລີ-ລາວ ປະຈຳ ສະພາຄູຣານໃຫຍ່ ແຫ່ງ ມົງໂກລີ.

ໃນການພົບປະ, ສອງຝ່າຍ ໄດ້ຕີລາສູງຕໍ່ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ມົງໂກລີ ຕະຫລອດໄລຍະຜ່ານມາ ນັບແຕ່ການສ້າງຕັ້ງສາຍພົວພັນທາງການທູດ ໃນປີ 1962 ເຊິ່ງໄດ້ປະກອບສ່ວນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາຂອງສອງປະເທດ; ໄດ້ແລກປ່ຽນສະພາບພາຍໃນພັກ, ພາຍໃນປະເທດ ໃຫ້ກັນຊາບ ໂດຍສະເພາະ ສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດ. ພ້ອມທັງ ເຫັນດີເປັນເອກະພາບກັນ ໃນການສືບຕໍ່ເສີມຂະຫຍາຍສາຍພົວພັນດ້ານພັກ ແລະ ການທູດປະຊາຊົນ ເພື່ອຊຸກຍູ້ການພົວພັນຮ່ວມມື ລະຫວ່າງ ສອງປະເທດ, ສົ່ງເສີມຄວາມເຂົ້າໃຈ ລະຫວ່າງ ປະຊາຊົນສອງຊາດ, ຊຸກຍູ້ການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການສຶກສາ, ການ ທ່ອງທ່ຽວ, ພ້ອມກັນຊອກຫາທ່າແຮງ ບົ່ມຊ້ອນຕ່າງໆໃຫ້ຫລາຍຂຶ້ນ ເພື່ອນໍາເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ລາວ-ມົງໂກລີ.

ໂອກາດດັ່ງກ່າວ, ຝ່າຍລາວ ໄດ້ສະແດງຄວາມຂອບໃຈຢ່າງຈິງໃຈ ມາຍັງ ພັກ, ລັດ ແລະ ປະຊາ ຊົນມົງໂກລີ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫລືອໃຫ້ແກ່ ພັກ, ລັດຖະບານ ແລະ ປະ ຊາຊົນລາວ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາ ປະເທດຊາດຂອງລາວ ໃນໄລຍະຜ່ານມາ ກໍຄື ປັດຈຸບັນ.

 


ໃນການພົບປະຄັ້ງນີ້, ສອງພັກ ຍັງໄດ້ຮ່ວມກັນລົງນາມບົດບັນທຶກຄວາມເຂົ້າໃຈ ວ່າດ້ວຍ ການສົ່ງເສີມການຮ່ວມມື ລະຫວ່າງ ພັກປະຊາຊົນປະຕິວັດລາວ ແລະ ພັກປະຊາຊົນມົງໂກລີ ສະບັບໃໝ່ ປ່ຽນແທນສະບັບເກົ່າ ທີ່ສອງພັກໄດ້ລົງນາມຮ່ວມກັນ ໃນຜ່ານມາ ເພື່ອຊຸກຍູ້ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ ໃຫ້ມີບາດກ້າວຂະຫຍາຍຕົວໃໝ່, ຊຸກຍູ້ການພົວພັນຮ່ວມມື ສອງປະເທດ, ປະກອບສ່ວນເຂົ້າໃນການເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

ໃນໂອກາດດຽວກັນນີ້, ຄະນະຜູ້ແທນລາວ ຍັງໄດ້ພົບປະໂອ້ລົມກັບ ພະນັກງານສະຖານທູດ ແລະ ນັກສຶກສາລາວ ທີ່ມົງໂກລີ ດ້ວຍບັນຍາກາດອັນສະໜິດສະໜົມ ແລະ ຮັກແພງ, ພ້ອມທັງເນັ້ນໜັກໃຫ້ ສະຖານທູດ ສືບຕໍ່ເປັນຂົວເຊື່ອມຕໍ່ທີ່ດີ, ປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ  ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ມົງໂກລີ ໃຫ້ນັບມື້ໄດ້ຮັບການພັດທະນາ ຢ່າງບໍ່ຢຸດຢັ້ງ.

ການຢ້ຽມຢາມມົງໂກລີ ຂອງຫົວໜ້າຄະນະພົວພັນ ຕ່າງປະເທດສູນກາງພັກ ໃນຄັ້ງນີ້, ເປັນບາດ ກ້າວສໍາຄັນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີ ງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ມົງໂກລີ ໃນໄລຍະໃໝ່. ນອກນັ້ນ, ຄະນະຍັງໄດ້ທັດສະນະສຶກສາ ແລະ ຢ້ຽມຊົມສະຖານທີ່ ທ່ອງທ່ຽວທາງປະຫວັດສາດ, ວັດທະນະທໍາ ຈໍານວນໜຶ່ງ ທີ່ນະຄອນຫລວງອູລານບາຕໍ. ໃນໂອກາດຢ້ຽມຢາມດັ່ງກ່າວ, ທ່ານ ຫົງແກ້ວ ສຸກສະຫວັດ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ມົງໂກລີ ກໍໄດ້

KPL