ຂປລ
ກອງປະຊຸມ ສຸດຍອດ ຄັ້ງທີ 29 ບັນດາຝ່າຍ ເຂົ້າຮ່ວມ ສົນທິສັນຍາ ສປຊ ກ່ຽວກັບ ການປ່ຽນແປງ ຂອງດິນຟ້າອາກາດ (COP 29) ໄດ້ດຳເນີນຢູ່ ນະຄອນຫລວງ ບາກູ ຂອງອາແຊກໄບຊານ ໂດຍມີ 25 ປະເທດ ໄດ້ໃຫ້ຄຳໝັ້ນສັນຍາ ບໍ່ສ້າງ ໂຮງງານໄຟຟ້າ ຄວາມຮ້ອນ ຈາກຖ່ານຫີນ ຕື່ມອີກ
ຂປລ.ວິທະຍຸ ກະຈາຍສຽງ ຫວຽດນາມ, ວັນທີ 20 ພະຈິກ, ກອງປະຊຸມ ສຸດຍອດ ຄັ້ງທີ 29 ບັນດາຝ່າຍ ເຂົ້າຮ່ວມ ສົນທິສັນຍາ ສປຊ ກ່ຽວກັບ ການປ່ຽນແປງ ຂອງດິນຟ້າອາກາດ (COP 29) ໄດ້ດຳເນີນຢູ່ ນະຄອນຫລວງ ບາກູ ຂອງອາແຊກໄບຊານ ໂດຍມີ 25 ປະເທດ ໄດ້ໃຫ້ຄຳໝັ້ນສັນຍາ ບໍ່ສ້າງ ໂຮງງານໄຟຟ້າ ຄວາມຮ້ອນ ຈາກຖ່ານຫີນ ຕື່ມອີກ ຖ້າຫາກວ່າ ບໍ່ມີມາດຕະການບຳບັດ ການປ່ອຍອາຍພິດ, ເພື່ອແນໃສ່ ຍູ້ໄວ ວິວັດທະນາການ ຄ່ອຍໆລົບລ້າງ ເຊື້ອເພີງ ຟອກຊິວ ປະເພດນີ້ ທີ່ໄດ້ກໍ່ມົນລະພິດ ຕໍ່ສິ່ງແວດລ້ອມ. ອັງກິດ, ການາດາ, ຝຣັ່ງ, ເຢຍລະມັນ ແລະ ອົດສະຕຣາລີ ກໍນອນ ໃນບັນຊີ ລາຍຊື່ ບັນດາ ພື້ນຖານ ເສດຖະກິດ ພັດທະນາ ທີ່ລົງນາມ ໃນຄຳໝັ້ນສັນຍາ ສະໝັກໃຈ ດັ່ງກ່າວ. ຄຳ ໝັ້ນສັນຍາ ຮຽກຮ້ອງ ໃຫ້ບັນດາປະເທດ ຍື່ນສະເໜີ ແຜນການ ດິນຟ້າອາກາດ ແຫ່ງຊາດ ໃນຕົ້ນປີ 2025, ໃນນັ້ນ ຕ້ອງຢັ້ງຢືນວ່າ: ບໍ່ກໍ່ສ້າງ ໂຮງງານໄຟຟ້າ ຄວາມຮ້ອນ ຈາກຖ່ານຫີນ ແຫ່ງໃໝ່ ຖ້າບໍ່ມີ ມາດຕະການ ຫລຸດຜ່ອນ ການປ່ອຍອາຍພິດ, ເປັນຕົ້ນ ແມ່ນເຕັກໂນໂລຊີເກັບ ແລະ ສະສົມ ກາກບອນ. ໃນກອງປະຊຸມ ດັ່ງກ່າວ, ບັນດາ ປະເທດ ຮັ່ງມີ ກໍໄດ້ຮັບການຮຽກຮ້ອງ ໃຫ້ອຸປະຖຳ ດ້ວຍຈຳນວນເງິນ 900 ຕື້ໂດລາສະຫະລັດຕໍ່ປີ ເພື່ອໜູນຊ່ວຍ ບັນດາປະເທດ ທຸກຍາກກວ່າ ຮັບມືກັບ ການປ່ຽນແປງ ຂອງດິນຟ້າອາກາດ. ບັນດາປະເທດ ພັດທະນາ ໄດ້ຮັບການຮຽກຮ້ອງ ໃຫ້ໜູນຊ່ວຍ ດ້ານການເງິນ ໃຫ້ແກ່ ບັນດາປະເທດ ພວມພັດທະນາ ເພື່ອປະຕິບັດ ວິວັດທະນາການ ຫັນເປັນສີຂຽວ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
