ຂປລ. ກອງປະຊຸມໃຫຍ່ສະມາຊິກພັກຄັງເງິນ ປະຈຳແຂວງວຽງຈັນ ຄັ້ງທີ IV ຈັດຂຶ້ນ ແລະ ອັດລົງດ້ວຍຜົນສຳເລັດ ໃນວັນທີ 7 ພະຈິກ 2024 ໂດຍການເປັນປະທານຂອງ ສະຫາຍ ເພັດສະໝອນ ໄຊສະຫຍາ ຄະນະພັກຮາກຖານ, ເລຂາໜ່ວຍພັກຄັງເງິນ ປະຈຳແຂວງວຽງຈັນ, ມີສະຫາຍ ສົມດີແກ້ວດາລາວິນ ຄະນະປະຈຳພັກແຂວງ, ປະທານກວດກາພັກ, ປະທານອົງການກວດກາລັດແຂວງວຽງຈັນ, ຫົວໜ້າອົງການຕ້ານ ແລະ ສະກັດກັ້ນການສໍ້ລາດບັງຫລວງ ແຂວງວຽງຈັນ, ມີສະຫາຍ ວອນ ວໍລະສານ ກຳມະການພັກແຂວງ, ເລຂາຄະນະພັກຮາກຖານ ຫົວໜ້າພະແນກການເງິນແຂວງວຽງຈັນ, ມີຄະນະຮັບຜິດຊອບກອງປະຊຸມໃຫຍ່ຂອງແຂວງ ​ແລະ ຜູ້ແທນສົມບູນ ເຂົ້າຮ່ວມ.
|    ສະຫາຍ ໄຊພອນ ໄຊທອງປານ ຮອງເລຂາໜ່ວຍພັກຄັງເງິນ ປະຈຳແຂວງວຽງຈັນ ໄດ້ຜ່ານຮ່າງບົດລາຍງານການເມືອງ ເຊິ່ງສ່ອງແສງໃຫ້ເຫັນຜົນສຳເລັດໃນການນຳພາ-ຊີ້ນຳ ຕະຫລອດໄລຍະ 5 ປີ ຜ່ານມາ ເຊິ່ງຄະນະພັກ ໄດ້ເອົາໃຈໃສ່ນຳພາສະມາຊິກພັກ ຈັດຕັ້ງຜັນຂະຫຍາຍມະຕິຂອງກອງປະຊຸມ ຄັ້ງທີ III ເປັນຕົ້ນ ໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ປັບປຸງການຈັດຕັ້ງພັກໃຫ້ມີຄວາມເຂັ້ມແຂງໜັກແໜ້ນ ຊີ້ນຳວຽກງານອົງການຈັດຕັ້ງມະຫາຊົນ ແລະ ວຽກງານວິຊາສະເພາະ ເຮັດໃຫ້ສະ ມາຊິກພັກມີແນວຄິດອຸ່ນອ່ຽນທຸນທ່ຽງ ເອົາໃຈໃສ່ປະຕິບັດໜ້າທີ່ການເມືອງທີ່ພັກມອບໝາຍໃຫ້ ຢ່າງມີຜົນສຳເລັດ, ​ໃນ 5 ປີຜ່ານມາ (2020-2024) ໄດ້ເອົາໃຈໃສ່ແກ້ໄຂບັນຫາໜີ້ສິນໃຫ້ຫລຸດລົງໃນແຕ່ລະປີ ໂດຍສະເພາະໜີ້ລ່ວງໜ້າບັນດາໂຄງການ, ບຸກຄົນ ສາມາດເກັບຄືນໄດ້ 5,3 ຕື້ກວ່າກີບ ແລະ ໜີ້ລ່ວງໜ້າທີ່ຄຸມເຄືອແກ່ຍາວມາຫລາຍປີຂອງບັນດາເມືອງ 1,3 ຕື້ກີບ, ຄຸ້ມຄອງບັນຊີ 471 ແລະ 48 ຂອງບັນດາພະແນກການ, ກົມກອງ ທີ່ເປີດໄວ້ໃນຄັງເງິນ ມີທັງໝົດ 169 ບັນຊີ, ມີຍອດເຫລືອທັງໝົດເກືອບ 63 ຕື້ກີບ. ຂະນະ​ດຽວ​ກັນ ການຈັດຕັ້ງປະຕິບັດລາຍຮັບພູດສູນກາງ ປະຕິບັດໄດ້ 134 ຕື້ກວ່າກີບ, ລາຍຮັບທ້ອງຖິ່ນ ປະຕິບັດໄດ້ 1.430 ຕື້ກວ່າກີບ, ລາຍຮັບການດຸ່ນດ່ຽງຈາກສູນກາງ ປະຕິບັດໄດ້ 1.950 ຕື້ກວ່າກີບ. ສຳລັບລາຍຈ່າຍງົບປະມານ ປະຕິບັດໄດ້ 3.003 ຕື້ກວ່າກີບ.
    ຈາກ​ນັ້ນ, ສະຫາຍ ເພັດສະໝອນ ໄຊສະຫຍາ ໄດ້ຜ່ານຮ່າງບົດສຳຫລວດການນຳພາລວມຂອງໜ່ວຍພັກ ຕະຫລອດ​ໄລຍະ 5 ປີຜ່ານມາໄດ້ນໍາພາ-ຊີ້​ນໍາດ້ານການເມືອງ, ນໍາພາດ້ານແນວຄິດ, ນໍາພາດ້ານການຈັດຕັ້ງ, ນໍາພາດ້ານແບບແຜນນໍາພາ ແລະ ວິທີເຮັດວຽກ ແລະ ນໍາພາດ້ານຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ ເຊິ່ງໄດ້ສຶກສາອົບຮົບການເມືອງ-ແນວຄິດ ໃຫ້ສະມາຊິກພັກມີຄວາມອຸ່ນອ່ຽນທຸນທ່ຽງ ເຊື່ອໝັ້ນຕໍ່ການນຳພາຂອງພັກ ເອົາໃຈໃສ່ປະຕິບັດໜ້າທີ່ການເມືອງຂອງຕົນມີຜົນສຳເລັດປັນກ້າວໆມາ.
     ໃນກອງປະຊຸມ, ຜູ້ແທນສົມບູນຂອງໜ່ວຍພັກດັ່ງກ່າວ ໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກເອົາຄະນະໜ່ວຍພັກຊຸດໃໝ່, ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ, ກອງປະຊຸມຄັ້ງປະຖົມມະລືກໄດ້ຕົກລົງເຫັນດີເລືອກເອົາ ສະຫາຍ ເພັດສະໝອນ ໄຊສະຫຍາ ເປັນເລຂາ, ສະຫາຍ ໄຊພອນ ໄຊທອງປານ ເປັນຮອງເລຂາ ທັງເປັນຜູ້ກວດກາ, ສະຫາຍ ນາງ ກອງມີ ສໍພາບມີໄຊ ເປັນຄະນະ ແລະ ສະຫາຍ ນາງ ຄຳພາ ພອນບຸຜາ ເປັນຜູ້ຊ່ວຍວຽກກວດກາ.

KPL