ຂປລ. ວິ​ທະ​ຍຸ​ໂທ​ລະ​ພາບ​ສູນ​ກາງ​ຈີນ ຫລື CMG ​ປະ​ຈຳ​ລາວ ຮ່ວມກັບກົມຮູບ​ເງົາ ກະ​ຊວງ​ຖະ​ແຫລງ​ຂ່າວ, ວັດ​ທະ​ນະ​ທຳ ແລະ ທ່ອ​ງ​ທ່ຽວ​ ແລະ ​ບໍ​ລິ​ສັດ​ຕາ​ຂ່າຍ​ໄຟ​ຟ້າ​ພາກ​ໃຕ້​ຈີນຈໍາກັດ ຈັດເທສະ​ການ​ຮູບ​ເງົາ​ດີ​ເດັ່ນ​ ລາວ-ຈີນ 2024 ຮອບ​ປະຖົມ​ມະ​ເລີກ ​ໃນວັນ​ທີ 5 ພະ​ຈິກ​ 2024 ຢູ່​ຫໍ​ວັດ​ທະ​ນະ​ທຳ​ແຫ່ງ​ຊາດ​ ​ນະ​ຄອນຫລວງວຽງ​ຈັນ ໂດຍມີ ທ່ານ ສິນລະວົງ ຄຸດໄພທູດ ປະທານສູນກາງແນວ​ລາວສ້າງຊາດ, ທ່ານ​ ນາງ ​ຟາງ​ ຫົງ ເອກ​ອັກ​ຄະ​ລັດ​ຖະ​ທູດ​ຈີນ​ປະ​ຈຳ​ລາວ, ມີ​ຜູ້​ຕາງ​ໜ້າ​ຈາກ​ກະຊວງທະບວງກົມ​​ຂອງລາວ, ຜູ້ຕາງໜ້າຂອງບໍ​ລິ​ສັດ​ຈີນ​ປະ​ຈຳ​ລາວ ແລະ ຊາວ​ເຊື້ອ​ສາຍ​ຈີນ​ ​ເຂົ້າຮ່ວມຊົມ​ຮູບ​ເງົາເລື່ອງ​ “ສິງ​ໜຸ່ມ​ໄວ​ໄຟ” ທີ່​ແປ ແລະ ພາກ​ເປັນ​ພາ​ສາ​ລາວ ໂດຍ CMG.

ໂອກາດນີ້, ທ່ານ​ ນາງ ຟາງ ຫົງ ໄດ້​ຕີ​ລາ​ຄາ​ສູງ​ຕໍ່​ເທ​ສະ​ການ​ຮູບ​ເງົາ​ ດີ​ເດັ່ນ​ລາວ-ຈີນ​ ທີ່​ໄດ້​ປະ​ກອບ​ສ່ວນ ​ເຂົ້າ​ໃນ​ການ​ແລ​ກ​ປ່ຽນ​ ວັດ​ທະ​ນະ​ທຳ​ຈີນ-ລາວ​ ໃນຫລາຍ​ປີ​ຜ່ານ​ມາ, ຮູບເງົາແມ່ນສິລະປະແຫ່ງແສງ ແລະ ເງົາ ເຊິ່ງໄດ້ຮັບຄວາມນິຍົມຊົມຊອບ ຈາກປະຊາຊົນ ແລະ ໄດ້ເສີມຂະຫຍາຍບົດບາດ ທີ່ສຳຄັນເຂົ້າໃນການແລກປ່ຽນ ແລະ ຖອດຖອນບົດຮຽນ ເຊິ່ງກັນ ແລະ ກັນ ລະຫວ່າງອະລິຍະທຳທີ່ແຕກຕ່າງກັນ. ການແລກປ່ຽນດ້ານຮູບເງົາ ເປັນພາກສ່ວນໜຶ່ງຂອງ ການເພີ່ມທະວີການແລກປ່ຽນ ດ້ານວັດທະນະທຳລະຫວ່າງ ຈີນ-ລາວ. ພ້ອມ​ນີ້, ທ່ານ​ຍັງ​ສະ​ແດງ​ຄວາມຫວັງວ່າ ກິດຈະກຳແລກປ່ຽນ ດ້ານວັດທະນະທຳທີ່ມີ “ເທສະການຮູບເງົາດີເດັ່ນ” ເປັນຕົວແທນນັ້ນ, ຈະສາມາດເພີ່ມທະວີມິດຕະພາບ ແລະ ຄວາມເຂົ້າໃຈເຊິ່ງກັນ ແລະ ກັນ ລະຫວ່າງປະຊາຊົນສອງຊາດ, ຊຸກຍູ້ການແລກປ່ຽນ ແລະ ຖອດຖອນບົດຮຽນ ໃນດ້ານວັດທະນະທຳ, ພ້ອມທັງສ້າງບັນຍາກາດ ດ້ານວັດທະນະທຳທີ່ດີ ໃຫ້ແກ່ການສ້າງຄູ່ຮ່ວມຊາຕາກຳ ຈີນ-ລາວ. 

ທ່ານ ວັນ​ສີ ກົ່ວ​ມົວ ​ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວລາວ ກໍ​ໄດ້​ມີ​ຄໍາ​ເຫັນວ່າ: ເທສະການຄັ້ງນີ້, ເປັນຂີດໝາຍສໍາຄັນ ຂອງສາຍພົວພັນ ມິດຕະພາບ ລາວ-ຈີນ ​ທີ່​ມີການຮ່ວມມື ແລະ ຊ່ວຍເຫລືອກັນມາຍາວນານ ແລະ ນັບມື້ນັບເຕີບໃຫຍ່ຂະຫຍາຍຕົວ. ຜ່ານການຮ່ວມມືອັນດີລະຫວ່າງ ວິ​ທະ​ຍຸ​ໂທ​ລະ​ພາບ​ສູນ​ກາງ​ຈີນ (CMG) ແລະ ກົມຮູບເງົາ ຕະຫລອດ 7 ປີທີ່ຜ່ານມາ, ພວກເຮົາໄດ້ນໍາເອົາຮູບເງົາດີເດັ່ນ ຂອງຈີນຫລາຍປະເພດ ທັງເລື່ອງຕະຫລົກ, ກັງຟູ, ກາຕູນ ແລະ ສາລະຄະດີ ໄປສູ່ປະຊາຊົນລາວ ໃນທົ່ວທຸກພາກຂອງປະເທດ. ທຸກເລື່ອງລ້ວນໄດ້ຮັບການແປເປັນ ພາສາລາວຢ່າງປະນີດ, ສ້າງຄວາມມ່ວນຊື່ນ ແລະ ເປີດໂລກະທັດໃຫ້ຜູ້ຊົມ, ນີ້ເປັນຂົວຕໍ່ທາງຈິດໃຈອັນແໜ້ນແຟ້ນ ລະຫວ່າງປະຊາຊົນສອງຊາດ.

ຂ່າວ: ກິດຕາ

ພາບ: ເກດສະໜາ

KPL