ຂປລ. ບຸນນະມັດສະການພະທາດຫລວງວຽງຈັນ ແລະ ງານ​ວາງ​ສະ​ແດງ​ສິນ​ຄ້າ ປະຈຳປີ 2024 ຈະຈັດຂຶ້ນ ໃນລະຫວ່າງ ວັນທີ 11-15 ພະຈິກ ທີ່ຈະມາເຖິງນີ້, ເຊິ່ງຈະຈັດໃຫ້ມີ ຫລາຍກິດຈະກໍາ ສອດຄ່ອງກັບຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ.

ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ໄດ້ຖະແຫລງຂ່າວ ກ່ຽວກັບການຈັດງານດັ່ງກ່າວ ຕໍ່ສື່ມວນຊົນ ໃນວັນທີ 5 ພະຈິກ 2024 ນີ້ວ່າ: ບຸນນະມັດສະການພະທາດຫລວງວຽງຈັນ ໃນປີນີ້, ຈະຈັດໃຫ້ມີຫລາຍກິດຈະກຳ ທີ່ໜ້າສົນໃຈ ຢູ່ເດີ່ນ​ພະ​ທາດ​ຫລວງ, ເດີ່ນສະ​ໜາມຫລວງ ແລະ ງານວາງ​ສະ​ແດງ​ຂາຍ​ສິນ​ຄ້າ ຈະຈັດຢູ່​ສູນ​ການ​ຄ້າ​ ລາວ-ໄອ​ເຕັກ ນະຄອນຫລວງວຽງຈັນ ເຊິ່ງພິ​ທີ​ເປີດ​ງານ​ຢ່າງເປັນທາງການ ຈະຈັດຂຶ້ນ ໃນວັນທີ 11 ພະຈິກ ແລະ ຈະດຳເນີນ ໄປຈົນຮອດວັນທີ 15 ພະຈິກ ໂດຍຈະມີການ​ຄົບ​ງັນ​ ຕາມ​ປະ​ເພ​ນີອັນດີງາມ ຂອງຊາດລາວເຮົາ ເປັນຕົ້ນ ວັນ​ທີ 13 ເວ​ລາ 16:00 ໂມງ ຈະມີ ພິ​ທີ​ສູດ​ປະ​ລິ​ຕະມຸງຄຸນ ທີ່​ພ​ະ​ທາດຫລວງ, ວັນ​ທີ 14 ເວ​ລາ 13:30 ໂມງ ຈະມີພິ​ທີ​ແຫ່​ພະ​ສາດ​ເຜິ້ງ, ວັນ​ທີ 15 ເວ​ລາ 07:00 ໂມງ ຈະມີພິ​ທີ​ໃສ່​ບາດ​ຖວາຍ​ສັງ​ຄະ​ທານ, ເວ​ລາ 13:00 ໂມງ ຈະມີພິ​ທີ​ແຫ່​ລູກ​ຄີ ແລະ ການ​ແແຂ່ງຂັນ​ກິ​ລາ​ພື້ນ​ບ້ານ​ຕີ​ຄີ ແລະ ເວ​ລາ 19:00 ໂມງ ຈະມີພິ​ທີ​ວຽນ​ທຽ​ນ ແລະ ຈູ​ດ​ທູບ​ທຽນ, ບັ້ງ​ໄຟ​ສັກ​ກະ​ລະບູ​ຊາອົງ​ພ​ະ​ທາດ. ທັງນີ້, ກໍເພື່​ອອະ​ນຸ​ລັກ​ຮັກ​ສາ ແລະ ສົ່ງ​ເສີມ​ວັດ​ທະ​ນະ​ທຳ ຮີດ​ຄອງ​ປະ​ເພ​ນີ​ອັນ​ດີ​ງາມ ບຸນນ​ະ​ມັດ​ສະ​ການ​ພະ​ທາດຫລວງ ຂອງ​ຊາວ​ລາວ ​ກໍ​ຄື ​ຊາວ​ນະ​ຄອນຫລວງວຽງຈັນ ທີ່​ເຄີຍ​ສືບ​ທອດ​ກັນ​ມາ ​ແຕ່​ບຸ​ຮານ​ນະ​ການ ໃຫ້​ມີ​ຄວາມ​ໂດດ​ເດັ່ນ ແລະ ເປັນ​ທີ່​ຮັບ​ຮູ້​ໃນ​ເວ​ທີ​ສາ​ກົນ, ທັງ​ເປັນ​ການ​ສ້າງ​ໂອ​ກາດ​ ໃນ​ການ​ຈັດ​ຕັ້ງ​ປະ​ຕິ​ບັດ 2 ວາ​ລະ​ແຫ່ງ​ຊາດ​ ກໍ​ຄື ຟື້ນ​ຟູ​ເສດ​ຖະ​ກິດ ດ້ວຍ​ຮູບ​ການ​ຊຸກ​ຍູ້​ສົ່ງ​ເສີ່ມ​ການ​ທ່ອງ​ທ່ຽວ, ສົ່ງ​ເສີມ​ການ​ຄ້າ, ສິນ​ຄ້າ​ຄອບ​ຄົວ​ຕົວ​ແບບ ​ທີ່​ຈະ​ກ້າວ​ເປັນ​ສິນ​ຄ້າ​ໂອ​ດັອບ ທີ່​ໄດ້​ກາ​ໝາຍ​ແຫ່ງ​ຊາດ ແລະ ສິນ​ຄ້າ​ຂອ​ງບັນ​ດາ​ ວິ​ສາ​ຫະ​ກິດຂະ​ໜາດ​ນ້ອຍ ແລະ ກາງ ໄດ້​ມາ​ວາງ​ສະ​ແດງ, ຈຳ​ໜ່າຍ​ສິນ​ຄ້າ​ ທັງພາຍ​ໃນ ແລະ ຕ່າງ​ປະ​ເທດ ໃຫ້​ປະ​ຊາ​ຊົນ​ພາຍໃນ ນະ​ຄອນຫລວງວຽງ​ຈັນ ແລ​ະ ແຂ​ກ​ຕ່າງ​ປະ​ເທດ​ໄດ້​ເຫັນ ແລະ ໄດ້​ຊົມ​ໃຊ້​ສິນ​ຄ້າ, ພ້ອມ​ທັງ​ເປັນ​ການ​ແລກ​ປ່ຽນ​ບົດ​ຮຽ​ນ ແລະ ປະ​ສົບ​ການ​ຕຕ່າງໆ ຂອງ​ບັນ​ດາ​ຫົວ​ໜ່ວຍ​ທຸ​ລະ​ກິດ​ດ້ວຍ​ກັນ.

ທ່ານ ນາງ ວຽງພອນ ແກ້ວຄູນສີ ຍັງໃຫ້ຮູ້ອີກວ່າ: ເພື່ອຊຸກຍູ້ສົ່ງເສີມ ປີທ່ອງທ່ຽວລາວ 2024 ກໍຄື ເຮັດໃຫ້ບຸນນະມັດສະການ ພະທາດຫລວງວຽງຈັນ ປີນີ້, ດຳເນີນໄປດ້ວຍຜົນສຳເລັດ, ຮັກສາໄດ້ວັດທະນະທຳອັນດີງາມ ຄະ​ນະ​ຮັບ​ຜິດ​ຊອບ ກໍຄື ນະ​ຄອນ​ຫລວງວຽງ​ຈັນ ​ໄດ້​ຈັດໃຫ້ມີ​ຫລາຍ​ກິດ​ຈະ​ກຳ ທີ່​​ໜ້າ​ສົນ​ໃຈ​ ນັບ​ແຕ່​ຮ້ານ​ຄ້າ​ທາງເຂົ້າ​​ຈາກ​ໄຟ​ແດງ ບ້ານໜອງບອນ ຈະຕົບ​ແຕ່ງ​ເປັນ​ເອ​ກະ​ລັກ​ຂອງ​ລາວ, ສິນ​ຄ້າ​ລາວ ເປັນ​ສ່ວນ​ຫລາຍ, ປະ​ຕູ​ໂຂງທາງ​ເຂົ້າງານ ຕົບ​ແຕ່ງ​ປະ​ດັບ​ປະດາ​ດ້ວຍ​ແຄນ ແລະ ກອງ​ຫາງ ທີ່​ເປັນ​ເອ​ກະ​ລັກ​ວັດ​ທະ​ນະ​ທຳລາວທີ່​ໂດດ​ເດັ່ນ, ທາງ​ເຂົ້າຮ້ານວາງ​ສະ​ແດງ​ ສິນ​ຄ້າ ໂອດັອບ ຕົບ​ແຕ່ງ​ປະ​ດັບ​ປະ​ດາ​ດ້ວຍ ວັດ​ຖຸ​ພັນ​ຈາກພາຍ​ໃນ ແລະ ຈະ​ເຫັນ​ຕິບ​ເຂົ້າ​ໃຫຍ່ ສອງ​ດ້ານ​ຂ້າງ, ຮ້ານ​ຄ້າ​ໂອດັອບ ​ຈາກ​ພາຍ​ໃນ ແລະ ຕ່າງ​ປະ​ເທດ ທີ່​ມີສິນ​ຄ້າ​ຫລວງ​ຫລາຍ, ພິ​ເສດ ຈະມີຮ້ານວາງສະແດງຜາ​ສາດ​ເຜິ້ງ, ພາ​ຂວັນ​ໃຫຍ່, ວາງສະແດງ ປະຫວັດ​ພະ​ທາດ​ຫລວງວຽງ​ຈັນ, ປະ​ຫວັດ​ລູກ​ຄີ ແລະ ເຄື່ອງ​ປະ​ດັບປະ​ດາຕ່າງໆ ທີ່​ໜ້າ​ສົນ​ໃຈ. ສຳລັບ ທາງ​ເຂົ້າ ໜ້າ​ສະ​ພາ​ແຫ່ງ​ຊາດ ​ຈະ​ຕົບ​ແຕ່ງ ເປັນ​ບ່ອນ​ຢ່າງ​ຫລິ້ນ ປະ​ດັບ​ປະ​ດາ​ດອກ​ໄຟ, ໂຄມ​ໄຟ ແລະ ມີ​ຈຸດ​ຖ່າຍ​ຮູບ ທີ່​ຈົບ​ງາມ. ນອກນັ້ນ, ຈຸດ​ສູນ​ລວມ ຈະມີ​ເວ​ທີ​ກາງ ໃນ​ການ​ສະ​ແດງ​ກິດ​ຈະ​ກຳ, ສິ​ລະ​ປະຕ່າງໆ ອາດ​ຈະ​ມີ​ສິລະ​ປິນ​ຈາກ​ຕ່າງ​ປະ​ເທດ ມາ​ສະ​ແດງ​ຮ່ວມ​ບາງ​ລາຍ​ການ ໃນ​ທຸກໆຄືນ​ ນັບ​ແຕ່ມື້​ເປີດ​ງານ​ ​ຈົນ​ຮອດມື້​ປິດ​.

ໂອກາດນີ້, ທ່ານ ນາງ ວຽງພອນ ແກ້ວຄູນສີ ຍັງໄດ້ຮຽກຮ້ອງ ໃຫ້ປວງ​ຊົນທັງ​ພາຍ​ໃນ ແລະ ຕ່າງ​ປະ​ເທດ ທີ່​ຈະ​ມາ​ຮ່ວມ​ໃນ​ງານ ຕ້ອງ​ໄດ້​ປະ​ຕິ​ບັດ ຕາມ ​ກົດ​ລະ​ບຽບ​ຂອງ​ງານ​ບຸນ ຢ່າງ​ເຂັ້ມ​ງວດ ເປັນ​ຕົ້ນ ການ​ມາ​ກາບ​ໄຫວ້​ສັກ​ກາ​ລະ​ບູ​ຊາ, ມາ​ແຫ່ຜາ​ສາດ​ເຜິ້ງ, ຕີ​ຄີ, ໃສ່​ບາດ ແລະ ວຽນ​ທຽນ ຕ້ອງປະ​ຕິ​ບັດ​ຕາມ​ວັດ​ທະ​ນະ​ທຳ ຂະ​ນົບ​ທຳ​ນຽມ​ຂອງ ສ​ປ​ປ ​ລາວ ໂດຍສະເພາະ ແມ່ນການ​ນຸ່ງ​ຖື ຜູ້​ຍິງ​ຕ້ອງ​ນຸ່ງ​ສິ້ນ ທີ່​ມີ​ຕີນ​ຈົບ​ງາມ ແລະ ຜູ້​ຊາຍ ກໍ່ຕ້ອງ​ນຸ່ງ​ໂສ້ງ​ທີ່​ສຸ​ພາບ​ຮຽບ​ຮ້ອຍ ຫລື ນຸ່ງ​ຜ້າສະ​ໂລ້ງ ທີ່​ເປັນ​ເອ​ກະ​ລັກ​ຂອງ​ຄົນ​ລາວ. ນອກນັ້ນ, ກໍ່ຂໍ​ໃຫ້​ປະ​ຕິ​ບັດ​ຕາມ​ແຈ້ງ​ການ, ລະ​ບຽບ​ການ ຂໍ້​ຫ້າມຕ່າງໆ ທີ່​ອະ​ນຸ​ກຳ​ມະ​ການ ໄດ້ກຳ​ນົດ​ໄວ້.

ຂ່າວ-ພາບ: ທະນູທອງ

KPL