ຂປລ. ​ໃນ​ໂອກາດ​ເຂົ້າ​ຮ່ວມພິທີ ສະເຫລີມສະຫລອງ ວັນວິທະຍາສາດແຫ່ງຊາດ 12 ຕຸລາ ຄົບຮອບ 37 ປີ ແລະ ບຸນວິທະຍາສາດ ເພື່ອສະເຫລີມສະຫລອງວັນສ້າງຕັ້ງ ມະຫາວິທະຍາ​ໄລ​ແຫ່ງ​ຊາດ ຄົບຮອບ 28 ປີ ໃນວັນທີ 5 ພະຈິກ 2024 ນີ້, ທ່ານ ສຸຣິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ ​ໄດ້​ມີ​ຄໍາ​ເຫັນ​ວ່າ: ວິທະຍາສາດ ແມ່ນມີ ຄວາມສຳຄັນຫລາຍຕໍ່ການດຳ ລົງຊີວິດ, ການຜະລິດ, ການພັດທະນາ ແລະ ການຄົງຕົວ-ຂະຫຍາຍຕົວຂອງສັງຄົມມະນຸດ. ປະຫວັດສາດໄດ້ຢັ້ງຢືນ ໃຫ້ພວກເຮົາເຫັນວ່າ ການຂະຫຍາຍຕົວ ຂອງສັງຄົມມະນຸດ ແມ່ນຕິດພັນກັບການຄົ້ນພົບ ແລະ ການຂະຫຍາຍຕົວຂອງວິທະຍາສາດ ແລະ ເຕັກໂນໂລຊີ ຊຶ່ງເປັນໝາກຜົນໂດຍລວມ ຈາກການອອກ ແຮງງານຂອງມະນຸດ; ມີຫລາຍຄົນອາດຈະໃຫ້ ຄຳນິຍາມກ່ຽວກັບວິທະຍາສາດ ທີ່ມີທັງຄືກັນ ແລະ ແຕກຕ່າງກັນ ແຕ່ສັງລວມແລ້ວ ວິທະຍາສາດແມ່ນ “ເຫດ ແລະ ຜົນ, ຄວາມຈິງ ແລະ ພາວະວິໄສ” ວິທະຍາສາດແມ່ນເລື່ອງກົດເກນ, ມັນແມ່ນເລື່ອງຂອງລະບົບ ແລະ ຕັກກະ.

ສະນັ້ນ, ການນຳໃຊ້ວິທະຍາສາດ ຈຶ່ງເປັນເລື່ອງການປະຕິບັດຕາມກົດເກນ ຢ່າງເປັນລະບົບ ແລະ ໄປຕາມຕັກກະຂອງມັນ ຊຶ່ງທຸກຄົນສາມາດນໍາໃຊ້ ວິທະຍາສາດເຂົ້າໃນການດຳລົງຊີວິດ, ແກ້ໄຂບັນຫາທາງທຳມະຊາດ ແລະ ສັງຄົມ ແລະ ນຳໃຊ້ເຂົ້າໃນການຜະລິດ, ການພັດທະນາໃຫ້ເກີດຜົນປະໂຫຍດສູງສຸດໄດ້. ພ້ອມນັ້ນ, ເພື່ອເຮັດໃຫ້ສອງວັນດັ່ງກ່າວ ມີຄວາມໝາຍ- ຄວາມສຳຄັນ ໂດຍເນັ້ນໃສ່ເນື້ອໃນໃຫ້ມີຈຸດສຸມ, ມີສ່ວນຮ່ວມຈາກຫລາຍພາກສ່ວນ ແລະ ສາມາດເຜີຍແຜ່ ອອກສູ່ສັງຄົມຢ່າງກວ້າງຂວາງ ເປັນຕົ້ນ ໄດ້ຈັດງານ ຖະແຫລງຂ່າວ ຄວາມສຳຄັນ ຂອງວັນວິທະຍາສາດ ແລະ ຕິດຕັ້ງປ້າຍຄຳຂວັນ ຕາມເສັ້ນທາງຫລັກ ໃນນະຄອນຫລວງວຽງຈັນ; ຈັດສຳມະນາວິທະຍາສາດ ແລະ ເວທີສົນທະ ນາ-ແລກປ່ຽນກ່ຽວກັບ ການຄົ້ນຄວ້າ ວິທະຍາສາດ ກັບການພັດທະນາ ເສດຖະກິດ-ສັງຄົມ; ວາງສະແດງຜົນງານການຄົ້ນຄວ້າວິທະຍາສາດ ແລະ ສາທິດທົດລອງວິທະຍາສາດ; ຈັດເວທີແຂ່ງຂັນຂຽນບົດຄວາມ ແລະ ຖາມ-ຕອບ ທາງວິທະຍາສາດ.

ໃນພິທີຄັ້ງນີ້, ຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບ ການຄົ້ນຄວ້າວິທະຍາສາດຂອງ ມະຫາວິທະຍາ​ໄລ​ແຫ່ງ​ຊາດ, ພ້ອມນັ້ນຍັງມີຫົວຂໍ້ນໍາມາບັນລະຍາຍ 150 ຫົວຂໍ້. ໃນນັ້ນ, ມີຫົວຂໍ້ລະດັບຊາດ 50 ຫົວຂໍ້ ແລະ ຫົວຂໍ້ວິທະຍາສາດທໍາມະຊາດ 50 ຫົວຂໍ້ ເປັນຕົ້ນ ສະພາບການພັດທະນາ ວິທະຍາສາດເຕັກໂນໂລຊີ ແລະ ນະວັດຕະກຳຂອງ ສປປ ລາວ, ຍຸດທະສາດ ການພັດທະນາວຽກງານ ICT/AI, ຍຸດທະສາດການພັດທະນາພະລັງງານ ແລະ ບໍ່ແຮ່ຂອງ ສປປ ລາວ, ການພັດທະນາເສດຖະກິດ ທີ່ຕິດພັນກັບການຄົ້ນຄວ້າ ແລະ ການພັດທະນາຈາກ ຂະແໜງການທີ່ກ່ຽວຂ້ອງ ແລະ ອື່ນໆ.

ຂໍ້​ມູນ-ພາບ: ວັນ​ເພັງ-ພູ​ວັນ

KPL