ຂປລ. ພິທີເຊັນສັນຍາຮ່ວມມື ດ້ານການທ່ອງທ່ຽວ ແລະ ຮັບ-ສົ່ງ ນັກທ່ອງທ່ຽວ ລະຫວ່າງ ບໍລິສັດທ່ອງທ່ຽວ ພັດທະນາ ຈຳປາໃໝ່ ແລະ ສະມາຄົມບໍລິສັດທ່ອງທ່ຽວ ແຫ່ງ ສາທາລະນະລັດ ຕາຕາສຖານ ສະຫະພັນ ຣັດເຊຍ ຈັດຂຶ້ນ ໃນວັນທີ 4 ພະຈິກ 2024 ຢູ່ນະຄອນຫລວງວຽງຈັນ ໂດຍການຮ່ວມລົງນາມ ລະຫວ່າງ ທ່ານ ນາງ ສອນທິດາ ອຸນາພົມ ປະທານບໍລິສັດ ທ່ອງທ່ຽວ ພັດທະນາ ຈໍາປາໃໝ່ ແລະ ທ່ານ ລາມີ ມິດຕາກົບ (Ramil Miftakhov) ປະທານສະມາຄົມບໍລິສັດທ່ອງທ່ຽວ, ສາທາລະນະລັດ ຕາຕາສຖານ, ສະຫະພັນຣັດເຊຍ ໂດຍມີ ທ່ານ ນາງ ດາລານີ ພົມມະວົງສາ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ແຊເກ ອີວັນໜົບ ປະທານ ຄະນະ ກຳມະທິການ ການທ່ອງທ່ຽວ ແຫ່ງລັດ ສາທາລະນະລັດ ຕາຕາສຖານ ແຫ່ງ ສະຫະພັນ ຣັດເຊຍ, ມີການນໍາ ຂອງກະຊວງ, ແຂວງ ທີ່ກ່ຽວຂ້ອງ ພ້ອມດ້ວຍການນໍາພາກລັດ ແລະ ພາກທຸລະກິດ ຂອງສອງຝ່າຍ ເຂົ້າຮ່ວມ.

ໂອກາດດັ່ງກ່າວ, ທ່ານ ນາງ ສອນທິດາ ອຸນາພົມ ໄດ້ໃຫ້ຮູ້ວ່າ: ການເຊັນສັນຍາຮ່ວມມື ໃນຄັ້ງນີ້, ຈະເຮັດໃຫ້ບໍລິສັດທ່ອງທ່ຽວ ພັດທະນາ ຈຳປາໃໝ່ ແລະ ສະມາຄົມ ບໍລິສັດທ່ອງທ່ຽວ ຂອງ ສາທາລະນະລັດ ຕາຕາສຖານ ມີການແລກປ່ຽນນັກທ່ອງທ່ຽວຮ່ວມກັນ ໃນອະນາຄົດອັນໃກ້ໆນີ້ ເຊິ່ງນັກທ່ອງທ່ຽວຣັດເຊຍ ເປັນນັກທ່ອງທ່ຽວທີີ່ມີຄຸນນະພາບ ແລະ ໃຊ້ຈ່າຍສູງ, ໃນແຕ່ລະປີ ຊາວຣັດເຊຍ ໄດ້ເດີນທາງ ໄປທ່ອງທ່ຽວຕ່າງປະເທດ ເປັນຈໍານວນຫລາຍ. ໃນນີ້, ເດີນທາງມາທ່ຽວ ບັນດາປະເທດ ອາຊຽນ ນັບມື້ນັບເພີ່ມຂຶ້ນ, ສໍາລັບ ສປປ ລາວ ໃນປີ 2022 ມີນັກທ່ອງທ່ຽວຣັດເຊຍ ມາທ່ອງທ່ຽວ ສປປ ລາວ ຈໍານວນ 4.410 ເທື່ອຄົນ ແລະ ໃນປີ 2023 ມີຈໍານວນ 44.345 ເທື່ອຄົນ ສະແດງໃຫ້ເຫັນວ່າ ສະຫະພັນຣັດເຊຍ ໄດ້ມີນະໂຍບາຍ ເພື່ອຊຸກຍູ້ ສົ່ງເສີມ ດ້ານການທ່ອງທ່ຽວ ຮ່ວມກັບ ສປປ ລາວ ຢ່າງຕໍ່ເນື່ອງ.

ທ່ານ ນາງ ສອນທິດາ ອຸນາພົມ ຍັງໃຫ້ຮູ້ອີກວ່າ: ການເດີນທາງ ມາເຮັດວຽກ ແລະ ຢ້ຽມຢາມ ສປປ ລາວ ຂອງຄະນະຜູ້ແທນຄະນະກໍາມະທິການ ດ້ານການທ່ອງທ່ຽວ ສາທາລະນະລັດ ຕາຕາສຖານສະຫະພັນຣັດເຊຍ ໃນຄັ້ງນີ້ ເປັນຂໍ້ລິເລີ່ມ ໃນການຮ່ວມມືທີ່ດີ ເພື່ອສ້າງໂອກາດ ໃຫ້ຫົວໜ່ວຍທຸລະກິດ ບໍລິການ ການທ່ອງທ່ຽວ ລະຫວ່າງ ລາວ-ຣັດເຊຍ-ຣັດເຊຍ-ລາວ ຮ່ວມກັນຊອກຮູ້ ແລະ ຂຸດຄົ້ນທ່າແຮງ ດ້ານການທ່ອງທ່ຽວເຊິ່ງກັນ ແລະ ກັນ ໃນການແລກປ່ຽນ ຮັບ-ສົ່ງນັກທ່ອງທ່ຽວ, ພ້ອມທັງ ເປັນການປະກອບສ່ວນສໍາຄັນ ເຂົ້າໃນການຮ່ວມມື ດ້ານການ ທ່ອງທ່ຽວຂອງສອງຝ່າຍ.

ການມີວິໄສທັດ ແລະ ເປົ້າໝາຍການພັດທະນາວຽກງານ ຮ່ວມກັນຄືແນວນີ້ ຈະເຮັດໃຫ້ການຮ່ວມມື ຂອງສອງຝ່າຍ ເກີດຜົນເປັນຈິງ, ອັນຈະເປັນການປະກອບສ່ວນ ບໍ່ສະເພາະ ໃຫ້ແກ່ ດ້ານເສດຖະກິດ, ທຸລະກິດແຕ່ຍັງຈະມີຄວາມໝາຍຄວາມສຳຄັນ ດ້ານການແລກປ່ຽນ-ຮຽນຮູ້ ທາງດ້ານວັດທະນະທໍາ ແລະ ເພີ່ມທະວີຄວາມເຂົ້າອົກເຂົ້າໃຈ ລະຫວ່າງປະຊາຊົນ ສອງຊາດ ດ້ວຍກັນ.

ຂ່າວ: ທະນູທອງ

ພາບ: ຂັນໄຊ

KPL