ຂປລ. ​ແຫ​ລ່ງຂ່າວ​ຈາກ ​ແຂວງ​ສາລະ​ວັນ ​ໃຫ້​ຮູ້​ວ່າ: ພິທີປະກາດຮັບຮອງເອົາບ້ານວາປີ ເມືອງວາປີ ແຂວງສາລະວັນ ເປັນຕົວເມືອງນ້ອຍໃນຊົນນະບົດ ໄດ້ຈັດຂຶ້ນໃນວັນທີ 1 ພະຈິກ 2024 ຜ່ານ​ມາ ໂດຍການເປັນກຽດເຂົ້າຮ່ວມຂອງ ທ່ານ ປະເດີມພອນ ສົນທະນີ ຮອງເລຂາພັກແຂວງ, ຮອງເຈົ້າແຂວງສາລະວັນ, ມີ ທ່ານ ບຸນຍູ້ ຈັນທະລັງສີ ກຳມະການພັກແຂວງ, ເລຂາພັກ, ເຈົ້າເມືອງວາປີ, ມີການນໍາຂັ້ນແຂວງ-ຂັ້ນເມືອງ, ອຳນາດການປົກຄອງບ້ານ ແລະ ພໍ່ແມ່ປະຊາຊົນບ້ານວາປີ ເຂົ້າຮ່ວມ.
    ທ່ານ ຄຳໄພ ນະໄພວົງ ເລຂາພັກ​ບ້ານ-ນາຍບ້ານວາປີ ໄດ້ຜ່ານບົດສະຫລຸບຕີລາຄາຜົນສຳເລັດການພັດທະນາເສດຖະກິດ-ສັງຄົມ ຂອງການສ້າງບ້ານວາປີ ເປັນຕົວເມືອງນ້ອຍໃນຊົນນະບົດ ວ່າ: ຈຸດສຸມບ້ານວາປີ ເມືອງວາປີ ແມ່ນຈຸດສຸມໜຶ່ງທີ່ນອນໃນການກຳນົດເປັນຈຸດສຸມຂອງເມືອງ ແລະ ແຂວງສາລະວັນ, ຈຸດສຸມບ້ານ ວາປີ ມີ 400 ຄອບຄົວ, ມີພົນລະເມືອງ 2.033 ຄົນ, ຍິງ 1.151 ຄົນ, ປະ ກອບດ້ວຍເຜົ່າ ລາວລຸ່ມກວມ 100% ນັບຖືສາດສະໜາພຸດ, ອາຊີບສ່ວນໃຫຍ່ ຖືເອົາການປູກເຂົ້າເປັນຕົ້ນຕໍ ກວມເອົາ 90% ແລະ ເອົາການລ້ຽງສັດ, ຄ້າຂາຍ ເຮັດການບໍລິການຄ້າຂາຍອື່ນໆ ເປັນອາຊີບສຳຮອງ; ບ້ານວາປີ ມີເນື້ອທີ່ທຳການຜະລິດທັງໝົດ 799.033 ເຮັກຕາ. ໃນນັ້ນ, ນາປີ 769.033 ເຮັກຕາ, ເນື້ອທີ່ນາແຊງ 100 ເຮັກຕາ, ສະມັດຕະພາບ 4,0 ໂຕນ/​ເຮັກຕາ, ຜົນຜະລິດ 3.476 ໂຕນ/ປີ. ນອກນັ້ນ, ຍັງມີໜໍ່ແໜງກຸ່ມການຜະລິດ ທີ່ເປັນຕົວແບບ 8 ຄອບຄົວ, ມີຕະຫລາດ ແລກປ່ຽນຊື້-ຂາຍ ແລະ ເປັນປັດໃຈໜຶ່ງໃຫ້ແກ່ປະຊົນອ້ອມຂ້າງເຂົ້າເຖິງການບໍລິການ, ມີໂຮງຮຽນ 5 ແຫ່ງ, ມີໂຮງໝໍນ້ອຍ 1 ຫລັງ, ມີຄອບຄົວທີ່ໃຊ້ໄຟຟ້າໃນລະບົບຕາຂ່າຍ 400 ຄອບຄົວ. ໄລຍະຜ່ານມາ, ເສດຖະກິດຂະຫຍາຍຕົວຢ່າງຕໍ່ເນືຶ່ອງ ເຮັດໃຫ້ລາຍຮັບຂອງປະຊາຊົນເພີ່ມຂຶ້ນ, ສ້າງຄວາມເຂັ້ມ ແຂງໃຫ້ແກ່ບ້ານ ເຮັດໃຫ້ບ້ານພົ້ນທຸກກາຍເປັນເປັນບ້ານພັດທະນາ ແລະ ເປັນສີສັນຕົວເມືອງນ້ອຍໃນຊົນນະບົດ.
     ການກະກຽມ ແລະ ດຳເນີນການສ້າງບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດ ແມ່ນປະຕິ ບັດຕາມ 3 ບາດກ້າວຄື: ບາດກ້າວກະກຽມ, ບາດກ້າວດຳເນີນງານ, ບາດກ້າວການປະເມີນ ໂດຍການກວດກາປະເມີນຕາມ 16 ມາດຕະຖານໃນການສ້າງບ້ານໃຫຍ່ຄ້າຍຄືຕົວເມືອງນ້ອຍ ເຊິ່ງສາມາດຈັດຕັ້ງປະຕິບັດໂດຍມີຜົນສຳເລັດ.

ຂ່າວ-ພາບ: ທິດລານີ ໂຄດໂຍທາ.

KPL