ຂປລ. ກອງປະຊຸມຄົບຄະນະກຳມາທິການ ວັດທະນະທຳ-ສັງຄົມ (ກວທສ) ປະຈຳປີ 2024 ຈັດຂຶ້ນໃນວັນທີ 02-03 ພະຈິກ 2024 ໂດຍມີ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ທີ່ເປັນກຳມະການຂອງ ກວທສ, ຮອງປະທານກຳມາທິການ, ຮອງເລຂາທິການ, ຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ, ຮອງລັດຖະມົນຕີ 4 ກະຊວງ ຄື: ສຶກສາທິການ ແລະ ກິລາ, ສາທາລະ ນະສຸກ, ແຮງງານ ແລະ ສະຫວັດດີການສັງຄົມ, ຖະແຫລງຂ່າວ, ວັດທະນະທຳ ແລະ ທ່ອງ ທ່ຽວ, ຄະນະກຳມະການ ຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ, ອົງການອຸຍນີເຊບ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ບຸນຕາ ເທບພະວົງ ຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ໄດ້ໃຫ້ຮູ້ວ່າ: ກອງປະຊຸມຄັ້ງນີ້, ເພື່ອສະຫລຸບຕີລາຄາການເຄື່ອນໄຫວວຽກງານປະຈໍາປີ 2024 ແລະ ທິດທາງການ ເຄື່ອນໄຫວປີ 2025 ຂອງກຳມາທິການວັດທະນະທຳ-ສັງຄົມ; ຄົ້ນຄວ້າ, ປຶກສາຫາ ລື ແລະ ສ້າງຄວາມເປັນເອກະພາບດ້ານທັດສະນະຕໍ່ບັນດາເນື້ອໃນ ຂົງເຂດວັດທະນະທໍາ-ສັງຄົມ ທີ່ຈະນໍາເຂົ້າຄົ້ນຄວ້າ, ພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງ ຊາດຊຸດທີ IX; ຜ່ານຮ່າງບົດລາຍງານຜົນການຕິດຕາມກວດ ກາ ການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ ແລະ ການພັດທະນາ ຊັບພະຍາກອນມະນຸດແຫ່ງຊາດ ໃນໄລຍະຜ່ານມາ, ບົດລາຍງານຜົນຕິດຕາມກວດກາ ຜົນການປະເມີນການຈັດຕັ້ງປະຕິບັດ 4 ກົດ ໝາຍຂົງເຂດວັດທະນະທຳ-ສັງຄົມ ຄື: ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມ ທີ່ມີທາດເຫລົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ; ລາຍງານຄວາມຄືບໜ້າໃນການສ້າງ ແລະ ປັບປຸງກົດໝາຍ ຄື: ຮ່າງກົດໝາຍວ່າດ້ວຍການສຶກສາ (ສະບັບປັບປຸງ), ຮ່າງກົດໝາຍວ່າດ້ວຍການພັດທະນາ ສີມືແຮງງານ (ສ້າງໃໝ່) ທີ່ຈະນໍາເຂົ້າຜ່ານກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX. ນອກຈາກນີ້, ຍັງຈະໄດ້ຮັບຟັງການປະກອບຄໍາເຫັນຈາກ 4 ກະຊວງ ແລະ 1 ອົງ ການຕໍ່ບົດສະຫລຸບຕີລາຄາ ການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນ ການເຄື່ອນໄຫວປີ 2025 ຂອງກຳມາທິການວັດທະນະທຳ-ສັງຄົມ.

ໂອກາດນີ້, ທ່ານ ຄຳໃບ ດຳລັດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນເລັດທີ່ກຳມາທິການ ວັດທະນະທຳ-ສັງຄົມຍາດມາໄດ້ໃນໜຶ່ງປີຜ່ານມາ, ພ້ອມທັງໄດ້ເນັ້ນໃຫ້ເອົາໃຈໃສ່ຊຸກຍູ້, ປະສານສົມທົບກັບຂະແໜງການ ແລະ ພາກສ່ວນກ່ຽວຂ້ອງ ເພື່ອເຂົ້າຮ່ວມແຕ່ຫົວທີໃນການສ້າງ, ປັບປຸງກົດໝາຍ ໃຫ້ສໍາເລັດຕາມແຜນການ ໂດຍໃຫ້ມີການທາບທາມຄວາມຄິດເຫັນ ຂອງປະຊາຊົນຢ່າງກວ້າງຂວາງ-ເລິກເຊິ່ງກວ່າເກົ່າ ເພື່ອຮັບປະກັນເນື້ອໃນກົດໝາຍ ມີຄວາມຄົບຖ້ວນ, ຮັດກຸມ, ສອດຄ່ອງກັບສະພາບຄວາມເປັນຈິງ ແລະ ສາມາດຈັດຕັ້ງປະຕິບັດໄດ້; ປະສານສົມທົບກັບ ກຳມາທິການຂອງສະພາແຫ່ງຊາດ ແລະ ຂະແໜງການທີ່ກ່ຽວຂ້ອງ ເພື່ອເຂົ້າຮ່ວມແຕ່ຫົວທີ ໃນການຄົ້ນຄວ້າ ແລະ ຕີລາຄາ, ປະເມີນຜົນການຈັດຕັ້ງ ປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ໃນຂົງເຂດວັດທະນະທຳ-ສັງຄົມ ເພື່ອຄົ້ນຄວ້າ, ວາງມາດຕະການ, ກຳນົດທິດທາງສູ້ຊົນຕໍ່ບັນດາຄາດໝາຍ ທີ່ມີຄວາມສ່ຽງທີ່ຈະບໍ່ບັນລຸ ໃຫ້ມີຜົນສຳເລັດດີຂຶ້ນ; ຕິດຕາມກວດກາວຽກງານ ຂົງເຂດວັດທະນະທໍາ-ສັງຄົມໃຫ້ຫລາຍຂຶ້ນ ໂດຍສະເພາະ ຕິດຕາມກວດກາຕາມມະຕິ ກອງປະຊຸມສະພາແຫ່ງຊາດ ທີ່ໄດ້ຮັບຮອງແລ້ວ; ກວດກາຄືນບັນດາແຜນການ, ແຜນງານ, ໂຄງການ ແລະ ກິດຈະກຳໃນແຜນການ 5 ປີ ຂອງກຳມາທິການ (2021-2025) ແລ້ວຮີບຮ້ອນປະສານສົມທົບ ກັບພາກສ່ວນທີ່ກ່ຽວຂ້ອງ ແລະ ສສຊ ທີ່ເປັນກຳມະການ ຂອງກຳມາທິການ ເພື່ອຄົ້ນ ຄວ້າ ແລະ ຈັດຕັ້ງຜັນຂະຫຍາຍ ໃຫ້ສຳເລັດຕາມແຜນການ ພ້ອມທັງກະກຽມຮ່າງແຜນການ 5 ປີ (2026-2030) ໃຫ້ສຳເລັດ.

ຂ່າວ: ກຸກກິກ ບຸດດາໄຊ

KPL