ຂປລ
ຂປລ. ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 6 ເດືອນຕົ້ນປີ 2024 ນີ້, ລັດຖະບານ ຈະເນັ້ນໃນ 6 ເປົ້າໝາຍ ເພື່ອເຮັດໃຫ້ການເຕີບໂຕເສດຖະກິດຂອງປະເທດເຮົາ ມີທ່າອ່ຽງຂະຫຍາຍ ຕົວດີຂຶ້ນ, ລວມຍອດຜະລິດຕະພັນພາຍໃນ(GDP) ຂະຫຍາຍຕົວໃນລະດັບ 4,7% (ມະຕິ ຂອງສະພາ ກຳນົດໝົດປີໃຫ້ບັນລຸ 4,5%).
ຂປລ. ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 6 ເດືອນຕົ້ນປີ 2024 ນີ້, ລັດຖະບານ ຈະເນັ້ນໃນ 6 ເປົ້າໝາຍ ເພື່ອເຮັດໃຫ້ການເຕີບໂຕເສດຖະກິດຂອງປະເທດເຮົາ ມີທ່າອ່ຽງຂະຫຍາຍ ຕົວດີຂຶ້ນ, ລວມຍອດຜະລິດຕະພັນພາຍໃນ(GDP) ຂະຫຍາຍຕົວໃນລະດັບ 4,7% (ມະຕິ ຂອງສະພາ ກຳນົດໝົດປີໃຫ້ບັນລຸ 4,5%).
ທ່ານ ເພັດ ພົມພິພັກ ລັດຖະມົນຕີ ກະຊວງແຜນການ ແລະ ການລົງທຶນ ໄດ້ໃຫ້ຮູ້ໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ວັນທີ 10 ມິຖຸນາ 2024 ວ່າ: ເພື່ອເຮັດໃຫ້ການເຕີບໂຕ ເສດຖະກິດຂອງປະເທດເຮົາ ມີທ່າອ່ຽງຂະຫຍາຍຕົວດີຂຶ້ນ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 4,7% ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2024 ນີ້ ຈະເນັ້ນໃສ່ 6 ເປົ້າໝາຍ ສຳຄັນຄື: ເປົ້າໝາຍທີ 1 ເຮັດໃຫ້ເສດຖະກິດ ຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ ໂດຍສືບຕໍ່ຄຸ້ມຄອງ ແລະ ດັດສົມເສດຖະກິດ ມະຫາພາກ ໃຫ້ມີຄວາມສົມດຸນ ແລະ ມີສະຖຽນລະພາບສູງຂຶ້ນ, ສືບຕໍ່ຊຸກຍູ້ສົ່ງເສີມການຜະລິດ ແລະ ການບໍລິການຕາມທ່າແຮງ ບົ່ມຊ້ອນຢ່າງຕັ້ງໜ້າກວ່າເກົ່າ; ເປົ້າໝາຍທີ 2 ຊັບພະຍາກອນມະນຸດ ມີຄຸນນະພາບສູງຂຶ້ນ ສາມາດຕອບສະໜອງຄວາມຕ້ອງການ ຂອງການພັດທະນາ, ມີຄວາມສາ ມາດຄົ້ນຄວ້າ ແລະ ສາມາດນໍາໃຊ້ວິທະຍາສາດ-ເຕັກໂນໂລຊີ ເພື່ອສາມາດຍົກສູງປະສິດທິພາບ ແລະ ສ້າງມູນຄ່າເພີ່ມ ການຜະລິດ ແລະ ການບໍລິການ; ເປົ້າໝາຍທີ 3 ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງປະຊາຊົນ ໄດ້ຮັບການຍົກລະດັບ ໃຫ້ດີຂຶ້ນເທື່ອລະກ້າວ ຕາມທິດມີກິນມີໃຊ້; ເປົ້າໝາຍທີ 4 ປົກປັກຮັກສາສິ່ງແວດລ້ອມ ໃຫ້ມີຄວາມສົມດຸນ ແລະ ຫລຸດຜ່ອນຄວາມສ່ຽງ ຈາກໄພພິບັດຕ່າງໆ, ເປົ້າໝາຍທີ 5 ການສ້າງໂຄງລ່າງພື້ນຖານ ທີ່ມີຄວາມເຂັ້ມແຂງ, ນໍາໃຊ້ທ່າແຮງ, ກາລະໂອກາດທີ່ຕັ້ງ, ການຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ ແລະ ເປົ້າໝາຍທີ 6 ການຄຸ້ມຄອງ-ບໍລິຫານລັດ ມີປະສິດທິພາບ, ສັງຄົມມີຄວາມສະເໝີພາບ, ຍຸຕິທຳ ແລະ ໄດ້ຮັບການປົກປ້ອງຕາມທິດ ການປົກຄອງດ້ວຍ ກົດໝາຍທີ່ສັກສິດ ແລະ ເຂັ້ມງວດ.
ທ່ານ ເພັດ ພົມພິພັກ ຍັງໃຫ້ຮູ້ອີກວ່າ: ໄປຄຽງຄູ່ກັນນີ້, ຕ້ອງໄດ້ສຸມໃສ່ປະຕິບັດ ໃຫ້ບັນລຸຕາມແຜນຈຸດສຸມທີ່ຄາດໄວ້ ເປັນຕົ້ນ ການຜະລິດສິນຄ້າ ແລະ ບໍລິການ ເພື່ອທົດແທນການນໍາເຂົ້າ ແລະ ສົ່ງອອກຕ່າງ ປະເທດ; ການຄຸ້ມຄອງເງິນຕາ ເຖິງວ່າໄດ້ມີຄວາມພະຍາຍາມ ແຕ່ອັດຕາເງິນເຟີ້ ຍັງຢູ່ໃນລະດັບສູງ, ເງິນກີບຍັງສືບຕໍ່ອ່ອນຄ່າ; ໂດຍລວມພື້ນຖານເສດຖະກິດ ບໍ່ທັນເຂັ້ມແຂງ ຍັງອາໄສການນໍາເຂົ້າສິນຄ້າ ຈາກຕ່າງປະເທດໃນມູນຄ່າທີ່ສູງ, ຄວາມຕ້ອງການນໍາໃຊ້ ເງິນຕາຕ່າງປະເທດກໍຍັງມີເພີ່ມຂຶ້ນ; ການປັບປຸງ ນິຕິກຳ, ກົນໄກອໍານວຍຄວາມສະດວກ ໃຫ້ແກ່ການລົງທຶນ ແລະ ການດໍາເນີນທຸລະກິດ ຂອງພາກ ເອກະຊົນ, ລວມທັງການຫັນແຜນນະໂຍບາຍ ມາເປັນໂຄງການ ແລະ ກິດຈະກຳລະອຽດ ໃຫ້ມີຄວາມວ່ອງໄວຍິ່ງຂຶ້ນ.
ຂ່າວ: ວຽງສະຫວັນ
ພາບ: ຂັນໄຊ
KPL
