*ມາຮອດປັດຈຸບັນ ເມືອງຮົ່ມແຂວງໄຊສົມບູນ ໄດ້ເອົາໃຈໃສ່ຕິດຕາມກວດກາບັນດາໜ້າວຽກການກະກຽມກອງປະຊຸມໃຫຍ່ 3 ຂັ້ນຂອງພັກຢ່າງຕໍ່ເນື່ອງ ເພື່ອໃຫ້ການຈັດຕັ້ງດຳເນີນກອງປະຊຸມດັ່ງກ່າວມີເນື້ອໃນຄົບຖ້ວນ ແລະ ປະສົບຜົນສຳເລັດທີ່ວາງໄວ້. ຂະນະດຽວກັນ ກໍ່ໄດ້ເອົາໃຈໃສ່ຕໍ່ການຈັດຕັ້ງຜັນຂະຫຍາຍແຜນພັດທະນາເສດຖະກິດ- ສັງຄົມຕິດພັນກັບ 2 ວາລະແຫ່ງຊາດມາໂດຍຕະຫລອດ ອັນໄດ້ເຮັດໃຫ້ດ້ານເສດຖະກິດນັບມື້ເຂັ້ມແຂງ ແລະ ກາຍເປັນສິນຄ້າຫລາຍຂຶ້ນ. ຢ່າງໃດກໍ່ຕາມເນື່ອງໃນໂອກາດທີ່ ສະຫາຍ ນາງ ເພັດສະໄໝ ໂພ ໄຊຍະວົງ ຄະນະປະຈຳພັກແຂວງ, ປະທານຄະນະກວດກາພັກ, ອົງການກວດກາລັດແຂວງໄຊສົມບູນ ພ້ອມດ້ວຍທີມງາມໄດ້ເຄື່ອນໄຫວເຮັດວຽກຢູ່ເມືອງຮົ່ມນັ້ນ, ກໍ່ໄດ້ຮັບຟັງການລາຍງານແຜນພັດທະນາເສດຖະກິດ-ສັງຄົມຂອງເມືອງ ປະຈຳປີ 2024, ແຜນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແຜນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງເມືອງປີ 2024, ລາຍງານການກະກຽມກອງປະຊຸມໃຫຍ່ 3 ຂັ້ນຂອງພັກ, ໂດຍສາມາດຮັບຮູ້ດ້ານການສ້າງເສດຖະກິດຈະໃຫ້ເຂັ້ມແຂງ, ຂະຫຍາຍດ້ວຍຈັງຫວະຕໍ່ເນື່ອງ ແລະ ໝັ້ນທ່ຽງ, ພ້ອມທັງເອົາໃຈໃສ່ຊຸກຍູ້ການຜະລິດເປັນສິນຄ້າໃຫ້ຫລາຍຂຶ້ນ ສາມາດກາຍເປັນສິນຄ້າສົ່ງອອກຕິດພັນກັບການສ້າງໜໍ່ແໜງພາຍໃນໃຫ້ເຂັ້ມແຂງ ໂດຍສະເພາະເຮັດໃຫ້ໂຄງປະກອບເສດຖະກິດມີການຫັນປ່ຽນໄປຕາມທິດຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ.

    ຂະນະທີ່ການກະກຽມດຳເນີນກອງປະຊູມໃຫຍ່ 3 ຂ້ັນຂອງພັກທ່ົວເມືອງຮົ່ມນັ້ນ, ໂດຍໄດ້ປະຕິບັດຕາມກົດລະບຽບພັກປະຊາຊົນປະຕິວັດລາວ ສະໄໝທີ 11 ໝວດ 4 ມາດຕາ 21, ໝວດທີ 6 ມາດຕາ 31 ແລະ ຄໍາ ສ່ັງເລກທີ 411/ຄລສພ, ຄຳແນະນຳເລກທີ 211/ຄຈສພ, ຄຳສັ່ງ ເລກທີ 0787/ພຂ,ຊບ ດັ່ງກ່າວຄະນະຮັບຜິດຊອບໄດ້ເອົາໃຈໃສ່ຊຸກຍູ້, ເຜີຍແຜ່ນິຕິກຳຕ່າງໆຂອງພັກເຂົ້າສູ່ການຈັດຕັ້ງຮາກຖານພັກ ແລະ ຈັດຕັ້ງເຜີຍແຜ່ເຊື່ອມຊຶມບັນດາເອກະສານ, ນິຕິກຳວາລະແຫ່ງຊາດວ່າດ້ວຍການແກ້ໄຂບັນຫາຢາ ເສບຕິດພາຍໃນເມືອງ ໂດຍເລັ່ງໃສ່ພະນັກງານຂັ້ນຊີ້ນຳບັນຊາ, ພະ ແນກການອ້ອມຂ້າງ ແລະ ບັນດາກຸ່ມ ບ້ານ 3 ກຸ່ມບ້ານທົ່ວເມືອງ, ຕິດປ້າຍໂຄສະນາຜົນຮ້າຍຂອງຢາເສບຕິດ ພ້ອມທັງໂຄສະນາຜ່ານລະບົບໂທລະໂຄ່ງພາຍໃນເທດສະບານເມືອງ ແລະ ບ້ານແຕ່ລະບ້ານຢ່າງເປັນປົກກະຕິ ເພື່ອເຮັດໃຫ້ພໍ່ແມ່ປະຊາຊົນ, ຊາວໜຸ່ມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ນອກຈາກທີ່ກ່າວມານັ້ນແລ້ວ, ອົງການກວດກາລັດແຂວງຍັງໄດ້ເຜີຍແຜ່ກົດໝາຍວ່າດ້ວຍການກວດກາລັດ ແລະ ກົດໝາຍວາດ້ວຍການຕ້ານການສໍ້ລາດບັງຫລວງສະບັບປັບປຸງ.

    ຂະນະທີ່ສະຫາຍ ນາງເພັດສະໄໝ ໂພໄຊຍະວົງ     ໄດ້ຊີ້ນຳຕໍ່ບັນດາໜ້າວຽກໂດຍໃຫ້ທຸກພາກສ່ວນເອົາໃຈໃສ່ສຶກສາອົມຮົມທາງດ້ານການເມືອງແນວຄິດໃຫ້ສະມາຊິກພັກ, ປະຊາຊົນບັນດາເຜົ່າເປັນປົກກະຕິ, ຊຸກຍູ້ສົ່ງເສີມປະຊາຊົນທຳການຜະລິດປູກຝັງ-ລ້ຽງ ສັດໃຫ້ກາຍເປັນສິນຄ້າ, ສືບຕໍ່ເຊື່ອມຊຶມ, ມະຕິ, ຄຳສັ່ງ, ຄຳແນະນຳ, ແນວທາງນະໂຍບາຍປ່ຽນແປງໃໝ່ຂອງພັກໃຫ້ທົ່ວເຖິງ, ສືບຕໍ່ຈັດຕັ້ງປະຕິບັດ 2 ວາລະແຫ່ງຊາດ ແລະ ການກະກຽມດຳເນີນກອງປະຊຸມໃຫຍ່ 3 ຂັ້ນຂອງເມືອງ ໃຫ້ໄດ້ຮັບປະສິດທິພາບສູງສຸດ.

ໂດຍ: ຢ່າຕົ່ງ

KPL