*ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ (ກຄງຕ), ທະນາຄານແຫ່ງ ສປປ ລາວ (ທຫລ) ໄດ້ຍົກໃຫ້ເຫັນທິດທາງການຄຸ້ມຄອງເງິນຕາ ຕ້ອງຮັບປະກັນສະພາບທາງດ້ານເງິນຕາໂດຍລວມມີຄວາມຫງົບ, ໝັ້ນທ່ຽງ. ທຫລ ຈະສືບຕໍ່ຄຸ້ມຄອງແຫລ່ງເງິນຕາຕ່າງປະເທດໃຫ້ເຂົ້າສູ່ລະບົບທະນາຄານເພີ່ມຂຶ້ນ, ສ້າງຄວາມສົມດຸນລະຫວ່າງກະແສເງິນຕາເຂົ້າ-ອອກໄປເພື່ອຊຳລະກັບຕ່າງປະເທດ, ສ້າງຄວາມເຂ້ັມແຂງຄັງສຳຮອງເງິນຕາຕ່າງປະເທດ ສາມາດກຸ້ມການນຳເຂົ້າຫລາຍກວ່າ 5 ເດືອນ ແລະ ບັນລຸຄາດໝາຍມະຕິສະພາແຫ່ງຊາດກຳນົດ, ນຳລາຍຮັບເງິນຕາຕ່າງປະເທດຈາກການສົ່ງອອກ ເຂົ້າລະບົບທະນາຄານໃນສປປ ລາວ ໃຫ້ໄດ້ຢ່າງໜ້ອຍ 70%. ສະນັ້ນ ທຫລ ຈະສຸມໃສ່ໜ້າວຽກ ຕົ້ນຕໍດັ່ງນີ້: ຈະສ້າງ ແລະ ປັບປຸງນິຕິກຳລຸ່ມກົດໝາຍເປັນຕົ້ນ: ຂໍ້ກຳນົດ ກ່ຽວກັບການຄຸ້ມຄອງລາຍຮັບເງິນ ຕາຫົວໜ່ວຍຜູ້ສົ່ງອອກເພື່ອແລກ ເງິນຕາກັບລະບົບທະນາຄານຕາມ ສັດສ່ວນຂັ້ນຕ່ຳ, ກຳນົດເປົ້າໝາຍ ການນຳໃຊ້ເງິນຕາໃນ ສປປ ລາວ, ການຄຸ້ມຄອງເງິນຕາຈາກລາຍຮັບ ແຮງງານ, ການທ່ອງທ່ຽວ, ການ ເປີດບັນຊີເງິນຕາຕ່າງປະເທດຢູ່ພາຍ ໃນແລະຕ່າງປະເທດ ແລະ ອື່ນໆ.

    ຄຸ້ມຄອງກະແສເງິນຕາຕ່າງປະເທດ ດ້ານການຄ້າລະຫວ່າງປະເທດ ໂດຍໃຫ້ສຳເລັດການເປີດ/ຫັນບັນຊີ ເງິນຝາກສະເພາະບໍລິສັດນຳເຂ້ົາ- ສົ່ງອອກໃນໄຕມາດ 1 ປິ 2024. ເລັ່ງພັດທະນາລະບົບການຄຸ້ມຄອງ ກະແສເງິນຕາຕ່າງປະເທດໃຫ້ທົດລອງນຳໃຊ້ໃນໄຕມາດ 1 ປີ 2024  ແລະ ມີການຄຸ້ມຄອງຕິດຕາມແບບອອນລາຍໂດຍເຊື່ອມໂຍງກັບຂະແໜງການ ( ການເງິນ, ການຄ້າ ແລະ ທະ ນາຄານ). ຕິດຕາມຫົວໜ່ວຍຜູ້ສົ່ງອອກ ນໍາລາຍຮັບເງິນຕາເຂົ້າມາ ສປປ ລາວ ຜ່ານລະບົບທະນາຄານຕາມໄລຍະເວລາ ແລະ ອັດຕາສ່ວນນຳລາຍຮັບເຂົ້າມາ ພ້ອມທັງຂາຍອັດຕາສ່ວນຂັ້ນຕ່ຳໃຫ້ແກ່ລະບົບທະນາຄານ. ຕິດຕາມຊຸກຍູ້ວຽກງານຄຸ້ມຄອງເງິນຕາຕ່າງປະເທດນຳຫົວໜ່ວຍສົ່ງອອກ ແຕ່ລະຂະແໜງການຢູ່ທ້ອງຖິ່ນໃນດ່ານທີ່ມີການສົ່ງອອກ ເພື່ອນຳລາຍຮັບເງິນຕາເຂົ້າມາຕາມລະບຽບການ. ຄຸ້ມຄອງການອະນຸຍາດໂອນເງິນ ເພື່ອຊຳລະກັບຕ່າງປະເທດໂດຍສະເພາະຊຳລະສິນຄ້າ ແລະ ການບໍລິການທີ່ມີລັກສະນະຟຸມເຟືອຍຂອງບຸກຄົນ ແລະ ນິຕິບຸກຄົນຜ່ານທະນາຄານທຸລະກິດ (ເປັນຕົ້ນການໂອນເງິນຊື້ອະສັງຫາລິມະຊັບ, ພາຫະນະ ແລະ ອື່ນໆ).

   ເອົາໃຈໃສ່ຄຸ້ມຄອງກະແສການລົງທຶນໂດຍກົງຕ່າງປະເທດທັງສູນກາງ ແລະ ທ້ອງຖິ່ນໃຫ້ມາຢັ້ງຢືນທຶນໃຫ້ທັນເວລາ, ເມື່ອນຳທຶນເຂົ້າມາຜ່ານທະນາຄານຢູ່ ສປປ ລາວ ເພື່ອສະດວກໃນການໂອນທຶນກັບຄືນປະເທດໃນອານາຄົດ. ປະຕິບັດຜູ້ລົງທຶນຕ່າງປະເທດເປີດບັນຊີກະກຽມການລົງທຶນກັບທະນາຄານທຸລະກິດ ກ່ອນໄດ້ຮັບອະນຸຍາດລົງທຶນ ຫລື ທະບຽນວິສາຫະກິດ ແລະ ຫັນບັນຊີເງິນຝາກສະເພາະກ່ຽວກັບການລົງທຶນ. ຊຸກຍູ້ຫົວໜ່ວຍ FDI ແລກປ່ຽນເງິນນຳທະນາຄານຜ່ານບັນຊີດັ່ງກ່າວ ເມື່ອມີການໃຊ້ຈ່າຍຢູ່ພາຍໃນ ສປປ ລາວ ເປັນເງິນກີບເປັນຕົ້ນ: ຄ່າສິນຄ້າ, ຄ່າບໍລິການ, ເບີກຈ່າຍເງິນເດືອນ ຫລື ຄ່າແຮງງານ ແລະ ອື່ນໆ. ສ້າງຍຸດທະສາດ ຄຸ້ມຄອງໜີ້ສິນຕ່າງປະເທດໃນລະດັບຄວບຄຸມໄດ້ ແລະ ກຳນົດຂອບເຂດເພດານອະນຸຍາດກູ້ຢືມຕ່າງປະເທດຂອງຂະແໜງການ (ພາກລັດ, ເອກະຊົນ, ສະຖາບັນການເງິນ ແລະ ສະຖາບັນການເງິນທີບໍ່ແມ່ນທະນາຄານ) ໃຫ້ຢູ່ລະດັບລວມສະເລ່ຍ 60-70% ຂອງ GDP ໃນ 5 ປີຕໍ່ໜ້າ. ສົ່ງເສີມການນໍາໃຊ້ເງິນກີບໃນການຊໍາລະ ແລະ ການຕິດປະກາດລາຄາສິນຄ້າ ແລະ ບໍລິການພາຍໃນປະເທດໃຫ້ເປັນເງິນກີບ ແລະ ຜ່ານລະບົບທະນາຄານໂດຍສະເພາະການຊຳລະຄ່າທີດິນແລະພາຫະນະ, ສົ່ງເສີມການນຳໃຊ້ສະກຸນທ້ອງຖິ່ນໃນການ ຊຳລະກັບປະເທດອ້ອມຂ້າງຂອງພາກທຸລະກິດໂດຍສະເພາະກີບ- ດົງ; ກີບ-ຢວນ ແລະ ກີບ-ບາດ.

   ຕິດຕາມກວດກາການເຄ່ືອນໄຫວທຸລະກໍາການເງິນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຕາມກົດໝາຍເປັນຕົ້ນການແລກປ່ຽນບໍ່ຖືກຕ້ອງໃຫ້ຫລຸດລົງ, ການໂອນເງິນດ່ວນຜ່ານບັນຊີ, ໂດຍສະເພາະການເປີດບັນຊີການສົ່ງອອກ-ນຳເຂົ້າ ແລະ ການເປີດບັນຊີການລົງທຶນ.ສັງລວມແລ້ວ, ການປັບປຸງການຄຸ້ມຄອງເງິນຕາຕ່າງປະເທດທີ່ດໍາເນີນແມ່ນມາຖືກທິດທາງແລ້ວ, ຂໍ ໃຫ້ສັງຄົມມີຄວາມເຊື່ອໝັ້ນ ແລະ ສະໜັບສະໜູນເປັນກຳລັງແຮງຊຸກຍູ້ທິດທາງນະໂຍບາຍ ແລະ ມາດຕະການຕ່າງໆຂອງລັດໃຫ້ເປັນຈິງ, ແລະ ຕ້ອງເຮັດໃຫ້ເຖິງຖອງ ໂດຍການມີສ່ວນຮ່ວມຂອງຫລາຍຂະແໜງການ ແລະ ພ້ອມກັນປະຕິບັດເປັນເອກະພາບທຸກຂັ້ນທາງສູນກາງ ແລະ ທ້ອງຖິ່ນເຊິ່ງຈະເຮັດໃຫ້ການຄຸ້ມຄອງເງິນຕາຕ່າງປະເທດ ໄດ້ຮັບການປັບປຸງເປັນລະບົບຄົບຊຸດ ແລະ ມີບາດກ້າວຫັນປ່ຽນຢ່າງແທ້ຈິງ ແລະ ນຳສະຖຽນລະພາບທາງດ້ານເສດຖະກິດ-ການເງິນກັບຄືນສູ່ສະພາບປົກກະຕິໂດຍໄວ.

ໂດຍ: ຣັດສະໝີ ດວງສັດຈະ

KPL