ຂປລ. ໃນລະຫວ່າງວັນທີ 18-22 ກັນຍາ 2023 ນີ້, ຫ້ອງວ່າການສູນກາງພັກ ໄດ້ຈັດບັ້ນຝຶກອົບຮົມຫລັກສູດ ການບໍລິການ-ຄຸ້ມຄອງລັດ ສຳລັບ ຜູ້ບໍລິຫານລະດັບສູງ ໃຫ້ແກ່ພະນັກງານ ນໍາພາ-ຄຸ້ມຄອງ ພາຍໃນຫ້ອງວ່າການສູນກາງພັກ ໂດຍການເປັນປະທານຂອງ ສະຫາຍ ຄຳຜາ ພິມມະສອນ ຮອງເລຂາຄະນະພັກ, ຮອງຫົວໜ້າຫ້ອງວ່າການສູນກາງພັກ, ມີພະນັກງານນໍາພາ-ຄຸ້ມຄອງ ຂັ້ນກົມເຂົ້າຮ່ວມ.

ຊຸດຝຶກອົບຮົມໃນຄັ້ງນີ້, ແນໃສ່ສ້າງການຫັນປ່ຽນໃໝ່ ຢ່າງແຂງແຮງເລິກເຊິ່ງ, ຮອບດ້ານໃຫ້ແກ່ພະນັກງານ ການນຳຫລັກແຫລ່ງ ພາຍໃນຫ້ອງວ່າການສູນກາງພັກ ໃຫ້ມີບາດກ້າວໃໝ່ ໃນການນຳພາ ທີ່ເຂັ້ມແຂງ, ທັງເປັນການຍົກລະດັບຄວາມຮູ້ ຄວາມສາມາດ, ທັກສະ, ທັດສະນະ, ພາວະຄວາມເປັນຜູ້ນຳ ໃຫ້ມີຄຸນນະພາບສູງຂຶ້ນກວ່າເກົ່າ. ຊຸດຝຶກອົບຮົມດັ່ງກ່າວ, ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ ການຄຸ້ມຄອງບໍລິຫານລັດທັງໝົດ 10 ຫົວຂໍ້ ເປັນຕົ້ນ, ການບໍລິຫານລັດ ໃນລະບົບການເມືອງ; ທິດສະດີການນໍາພາ ແລະ ການຄຸ້ມຄອງ; ທິດສະດີການບໍລິການປ່ຽນແປງ ເພື່ອຄວາມກ້າວໜ້າ; ການຄຸ້ມຄອງ ແລະ ການກວດກາ ງົບປະມານແຫ່ງລັດ; ການກວດກາ, ການກວດສອບ ແລະ ການຕ້ານສໍ້ລາດບັງຫລວງ; ບົດຮຽນດ້ານພຶດຕິກໍາ ຂອງການນໍາພາ ແລະ ການຄຸ້ມຄອງ; ບົດຮຽນດ້ານພຶດຕິກໍາຕົວຈິງ ຂອງການບໍລິຫານ ການປ່ຽນແປງ ເພື່ອຄວາມກ້າວໜ້າ; ການວາງແຜນຍຸທະສາດ; ການຄຸ້ມຄອງພະນັກງານ-ລັດຖະກອນ, ການປະເມີນຜົນ ແລະ ພັດທະນາພະນັກງານ-ລັດຖະກອນ.

ໃນຊຸດຝຶກອົບຮົມ ຄັ້ງນີ້, ມີ ທ່ານນາງ ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າ ວິທະຍາສາດການປົກຄອງ ແລະ ຝຶກອົບຮົມກະຊວງພາຍໃນ, ທ່ານ ສີພຸກ ວົງພັກດີ ອະດີດຮອງລັດຖະມົນຕີ ກະຊວງພາຍໃນ ໄດ້ເຂົ້າຮ່ວມຖ່າຍຖອດບົດຮຽນ. ພ້ອມນີ້ ຍັງມີວິທະຍາກອນ ຈາກກະຊວງການເງີນ, ອົງການກວດກາແຫ່ງລັດ, ຫ້ອງວ່າການສຳນັກງານ ນາຍົກລັດຖະມົນຕີ ໄດ້ໃຫ້ກຽດບັນຍາຍບັນດາ ເອກະສານທີ່ກ່ຽວຂ້ອງ, ພ້ອມທັງມີການແລກປ່ຽນ ຖອດຖອນບົດຮຽນ ກັບນັກສໍາມະນາກອນ ຂອງຫ້ອງວ່າການສູນກາງພັກ ຢ່າງເລິກເຊິ່ງ, ມີເນື້ອໃນ ແລະ ມີບັນຍາກາດຟົດຟື້ນ.

KPL