ຂປລ.ວິທະຍຸ-ໂທລະພາບ ສູນກາງຈີນ, ຫວ່າງ​ມໍ່ໆ​ມາ​ນີ້, ວາ​ລະ​ສານ “Fortune” ຂອງ​ ສ.ອາ​ເມ​ລິ​ກາ, “ໜັງ​ສື​ພິມ Financial Times” ຂອງ​ອັງ​ກິດ, ໜັງ​ສື​ພິມ​ລາຍ​ສັບ​ປະ​ດາ “Die Zeit” ຂອງ​ເຢຍ​ລະ​ມັນ ແລະ ສື່ມວນ​ຊົນ​ອື່ນໆ ​ໄດ້​ລາຍ​ງານ​ ທ່າ​ອ່ຽງ​ ການ​ພັດ​ທະ​ນາ​ ອຸດ​ສາ​ຫະ​ກຳ ​ປັນ​ຍາ​ປະ​ດິດ​ ຫລື AI ຂອງ ສປ ​ຈີນ, ໂດຍ​ເຫັນ​ວ່າ: ແບບຈຳ​ລອງ​ປັນ​ຍາ​ປະ​ດິດ​ ຂະ​ໜາດ​ໃຫຍ່ ​ເປີດກວ້າງ​ແຫລ່ງ​ກຳ​ເນີດ ຫລື open source ປະ​ສິດ​ທິ​ພາບ​ສູງ ​ທີ່​ນຳ​ສະ​ເໜີ ​ໂດຍ​ວິ​ສາ​ຫະ​ກິດ​ຈີນ ​ໄດ້​ຮັບການຍອມ​ຮັບ​ ຈາກ​ຕະຫລາດ​ທົ່ວ​ໂລກ ​ຢ່າງ​ຕໍ່​ເນື່ອງ. ຂະນະທີ່ ເວັບ​ໄຊ​ຂອງ​ຂ່າວ​ສານ​AP ຂອງ​ ສ.ອາ​ເມ​ລິ​ກາ, ແລະ ໜັງ​ສື​ພິມ“Die Zeit” ຂອງ​ເຢຍ​ລະ​ມັນ ໄດ້​ລາຍ​ງານ​ຂ່າວ​ກ່ຽວ​ກັບ ​ແບບ​ຈຳ​ລອງ ​ປັນ​ຍາ​ປະ​ດິດ​ໃໝ່ Kimi K3 ທີ່​ນຳ​ສະ​ເໜີ ​ໂດຍ​ບໍ​ລິ​ສັດ Moonshot AI ຂອງ​ ສປ ຈີນ, ໂດຍກ່າວ​ວ່າ ແບບ​ຈຳ​ລອງ​ດັ່ງ​ກ່າວ​ ໄດ້​ດຶງ​ດູດ​ຜູ້​ພັດ​ທະ​ນານຳ​ໃຊ້ຫລາຍ​ປະ​ເທດ ​ເຊິ່ງ​ລວມ​ທັງ ​ວິ​ສາ​ຫະ​ກິດ​ ຂອງ ສ.​ອາ​ເມ​ລິກາ. ການ​ທີ່​ໄດ້​ຮັບ​ຄວາມ​ນິ​ຍົມ​ ຂອງ​ແບບ​ຈຳ​ລອງ​ຈີນ ​ເຮັດ​ໃຫ້​ບາງ​ບໍ​ລິ​ສັດ​ວິ​ທະ​ຍາ​ສາດ​ເຕັກ​ໂນ​ໂລ​ຊີ ​ລະ​ດັບ​ສຸດຍອດ​ຂອງ ສ.​ອາ​ເມ​ລິ​ກາ ​ຮູ້​ສຶກ​ທໍ້​ຖອຍ​ໃຈ. ວິ​ສາ​ຫະ​ກິດ​ປິດແຫລ່ງ​ກຳ​ເນີດ​ ລະ​ດັບ​ສຸດຍອດ​ຂອງ​ ສ.ອາ​ເມ​ລິ​ກາ ເຊັ່ນ: OpenAI、Anthropic ແລະ ​ອື່ນໆ ໄດ້​ໃຊ້​ຄວາມ​ກົດ​ດັນ​ອັນ​ໃຫຍ່ຫລວງ ​ຕໍ່​ລັດ​ຖະ​ບານ​ອາ​ເມ​ລິ​ກາ, ໂດຍ​ຮຽກ​ຮ້ອງ​ ໃຫ້​ໃຊ້​ມາດ​ຕະ​ການ ​ຕໍ່​ເລື່ອງ​ນີ້. ບໍ​ລິ​ສັດ​ ອາ​ເມ​ລິ​ກາ ຈຳ​ນວນ 179 ແຫ່ງ​ ໄດ້​ສົ່ງ​ຈົດ​ໝາຍ​ລົງ​ນາມ​ຮ່ວມ​ ຕໍ່​ທຳ​ນຽບ​ຂາວ ໂດຍ​ລະ​ບຸ​ວ່າ ​ການສະ​ກັດ​ກັ້ນ ​ບໍ່​ໃຫ້​ວິ​ສາ​ຫະ​ກິດ​ໃໝ່​ຂອງ​ອາ​ເມ​ລິ​ກາ ຮັບ​ແບບ​ຈຳ​ລອງ ​ເປີດ​ແຫລ່ງ​ກຳ​ເນີດ ​ຈາກ​ຕ່າງ​ປະ​ເທດ​ນັ້ນ ​ເປັນ​ການ​ກຳ​ຈັດ​ການ​ແຂ່ງ​ຂັນ. ສ່ວນ ເວັບ​ໄຊວາ​ລະ​ສານ “Fortune” ຂອງ​ ສ.ອາ​ເມ​ລິກາ​ ລາຍ​ງານ​ວ່າ: ບໍ​ລິ​ສັດ​ຈີນ ​ດຳ​ເນີນ​ການ​ເຄື່ອນ​ໄຫວ ​ເປີດແຫລ່ງ​ກຳ​ເນີດ, ເຜີຍ​ແຜ່​ ແບບ​ຈຳ​ລອງ​​ແບບ​ບໍ່​ເສຍ​ຄ່າ. ຄຽງ​ຄູ່​ກັບ​ ລັດ​ທິ​ປົກ​ປ້ອງ​ການ​ຄ້າ​ ໃນ​ນະ​ໂຍ​ບາຍ ​ອາ​ເມ​ລິກາ​ ນັບ​ມື້ ​ນັບ​ຮຸນ​ແຮງ​ຂຶ້ນ ແລະ ບໍ່​ສາ​ມາດ​ຄາດ​ຄະ​ເນ​ໄດ້, ຈະ​ມີ​ຄວາມ​ຕ້ອງ​ການ​ເພີ່ມ​ຂຶ້ນ ​ຕໍ່​ແບບ​ຈຳ​ລອງ​ຂອງ ສປ ​ຈີນ. ເວັ​ບ​ໄຊ “ໜັງ​ສື​ພິມ Financial Times” ຂອງ​ອັງ​ກິດຊີ້​ໃຫ້​ເຫັນ​ວ່າ: ສປ ຈີນ ​ໄດ້​ສະ​ເໜີ ​ວິ​ໄສ​ທັດ​ອີກ​ຢ່າງ​ໜຶ່ງ​ ຕໍ່​ການ​ພັດ​ທະ​ນາ ​ປັນ​ຍາ​ປະ​ດິດ​ຂອງ​ໂລກ. ສປ ຈີນ ​ບໍ່​ພຽງ​ແຕ່ ​ຈະ​ເຜີຍ​ແຜ່​ປັນ​ຍາ​ປະ​ດິດ ​ຢ່າງທົ່ວເຖິງ ​ໂດຍ​ຜ່ານ​ແບບ​ຈຳ​ລອງ ​ເປີດ​ແຫລ່ງ​ກຳ​ເນີດ​ເທົ່າ​ນັ້ນ, ຍັງ​ຈະ​ສະ​ໜອງ​ທຶນ ​ອົບ​ຮົມ​ພາຍ​ໃຕ້​ຫົວ​ຂໍ້ ​ປັນ​ຍາ​ປະ​ດິດ ຫລາຍ​ພັນ​ທຶນ​ໃຫ້​ແກ່​ ປະ​ເທດ​ພວມ​ພັດ​ທະ​ນາ, ສ້າງ​ສູນ​ການ​ຮ່ວມ​ມື​ນຳ​ໃຊ້ ​ປັນ​ຍາ​ປະ​ດິດ​ສາ​ກົນ. ໜັງ​ສື​ພິມ​ດັ່ງ​ກ່າວ ​ໄດ້​ຍົກ​ເອົາ​ທັດ​ສະ​ນະ ​ຂອງ​ນັກ​ວິ​ເຄາະ ໂດຍ​ຊີ້​ໃຫ້​ເຫັນ​ວ່າ, ແບບ​ຈຳ​ລອງ​ປິດ​ແຫລ່ງ​ກຳ​ເນີດ ຂອງ​ ສ.ອາ​ເມ​ລິ​ກາ​ ແມ່ນ​ແພງ​ເກີນ​ໄປ​​ສຳ​ລັບຜູ້​ຊົ​ມ​ໃຊ້​ຂອງປະ​ເທດ​ ເຂດ​ໂລກ​ໃຕ້ ​ສ່ວນຫລາຍ​ທີ່​ຂາດ​ເຂີນ ​ຄວາມ​ສາ​ມາດ​ການ​ຄົ້ນ​ຄວ້າ​ ພັດ​ທະ​ນາ​ດ້ວຍ​ຕົນ​ເອງ. ອົງ​ການ​ຮ່ວມ​ມື​ ປັນ​ຍາ​ປະ​ດິດ​ໂລກ ​ຈະ​ສາ​ມາດ​ກາຍ​ເປັນ​ເວ​ທີ​ທີ່​ດີ, ນຳ​ສະ​ເໜີ​ ເຕັກ​ນິກ ແລະ ແບບ​ຈຳ​ລອງ​ເປີດ​ແຫລ່ງ​ກຳ​ເນີດ​ຂອງ​ ສປ ຈີນ​ ໄປ​ສູ່​ປະ​ເທດ​ເຂດ​ໂລກ​ໃຕ້./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL