ຂປລ. ວິທະຍຸໂທລະພາບສູນກາງ ຈີນ (CMG): ໜັງສືພິມ Financial Times ຂອງ ອັງກິດ ສະບັບ ລົງວັນທີ 18 ມັງກອນ ລາຍງານວ່າ: ຫລາຍປະເທດ ໃນສະຫະພາບ ເອີຣົບ ພວມຈາລະນາ ທີ່ຈະປັບຂຶ້ນ ພາສີ ຕໍ່ ສິນຄ້າ ສ.ອາເມລິກາ ທີ່ ສົ່ງອອກໄປຍັງ ເອີຣົບ ດ້ວຍມູນຄ່າ 93 ຕື້ເອີໂຣ ຫລື ຈຳກັດ ວິສາຫະກິດ ສ.ອາເມລິກາ ເຂົ້າໄປສູ່ຕະຫລາດ ສະຫະພາບ ເອີຣົບ ເພື່ອຕອບໂຕ້  ທ່ານໂດນັນ ທຣຳ ປະທານາທິບໍດີ ສ.ອາເມລິກາ ໃນກໍລະນີທີ່ປັບຂຶ້ນພາສີຕໍ່ 8 ປະເທດເອີຣົບ ເພື່ອຫວັງ ຈະຢືດຄອງເກາະກຣິນແລນ ຂອງ ດານມາກ.

ບັນດານັກການທູດ ຂອງປະເທດຕ່າງໆ ໃນ ເອີຣົບ ລະບຸວ່າ: ທ່ານໂດນັນ ທຣຳ ໃຊ້ວິທີການແບບມາເຟຍລ້ວນໆ, ແຕ່ສະຫະພາບເອີຣົບ ຍັງຫວັງ ຈະຮຽກຮ້ອງ ໃຫ້ມີ ຄວາມໃຈເຢັນລົງ ເພື່ອໃຫ້ ທ່ານໂດນັນ ທຣຳ ມີໂອກາດແກ້ໄຂ ຄວາມຜິດພາດຂອງຕົນ.

ກ່ອນໜ້ານີ້ ທ່ານໂດນັນ ທຣຳ ໄດ້ໂພສ ບົດຄວາມ ຜ່ານ ສື່ສັງຄົມອອນລາຍ ໂດຍປະກາດວ່າ: ນັບແຕ່ວັນທີ 1 ກຸມພານີ້ ເປັນຕົ້ນໄປ, ສ.ອາເມລິກາ ຈະປັບຂຶ້ນພາສີ 10% ຕໍ່ສິນຄ້າ ຈາກ 8 ປະເທດ ໃນເອີຣົບທີ່ສົ່ງອອກໄປ ສ.ອາເມລິກາ ແລະ ນັບແຕ່ວັນທີ 1 ມິຖຸນາປີນີ້ ເປັນຕົ້ນໄປ ຈະປັບຂຶ້ນເປັນ 25% ຈົນກວ່າ ຝ່າຍທີ່ກ່ຽວຂ້ອງ ຈະບັນລຸສັນຍາ ກ່ຽວກັບການ “ຊື້ເກາະກຣິນແລນ ຢ່າງຮອບດ້ານ ແລະ ສົມບູນ” ຂອງ ສ.ອາເມຣິກາ./

KPL