ຂປລ. ພະທອງສາມສີ ພະມິ່ງຂວັນຄູ່ ຊາວເມືອງທຸລະຄົມ ແຂວງວຽງຈັນ ປະດິດສະຖານ ທີ່ວັດບ້ານລິ່ງຊັນ (ໃຕ້) ກົ່ງກັນຂ້າມ ກັບວັດນາຄອງ ທີ່ພະທາດມາຫລ້າ ປະດິດສະຖານຢູ່ ບ້ານລິ່ງຊັນ ເປັນຊຸມຊົນເກົ່າແກ່ ຄູ່ກັບລ້ອງນ້ຳງື່ມມາຫລາຍຮ້ອຍປີ ມີປະຫວັດຄວາມເປັນມາຍາວນານ ແລະ ເປັນແຫລ່ງທ່ອງທ່ຽວທາງວັດທະນະທຳ ທີ່ມີຊື່ສຽງຂອງເມືອງທຸລະຄົມອີກດ້ວຍ. ຕາມການໃຫ້ຮູ້ຂອງທ່ານ ໄພແກ້ວ ຫລວງອາໄພ ປະທານແນວລາວສ້າງຊາດ ບ້ານລິ່ງຊັນ ໄດ້ຍົກໃຫ້ເຫັນປະຫວັດຄວາມເປັນມາຂອງພະທອງສາມສີ ຕິດພັນກັບປະຫວັດບ້ານລິ່ງຊັນ ວ່າ: ບ້ານລິ່ງຊັນ ມີ 301 ຫລັງຄາເຮືອນ, ມີ 310 ຄອບຄົວ, ມີພົນລະເມືອງທັງໝົດ 1.588 ຄົນ, ມີຊົນເຜົ່າລາວລຸ່ມເປັນສ່ວນຫລາຍ ຖືສາສະໜາພຸດ ແລະ ສາສະໜາຜີເປັນຫລັກ. ປະຊາຊົນປະກອບອາຊີບປູກຝັງ-ລ້ຽງສັດເປັນຕົ້ນຕໍ; ເປັນບ້ານອະນຸລັກ ແຫລ່ງວັດທະນະທຳອັນເກົ່າແກ່ ຢຶດຖືຮີດຄອງປະເພນີລ້ອງງື່ມຢ່າງໜຽວແໜ້ນ. ພະພຸດທະຮູບທອງສາມສີ ຫລື ພະທອງສາມສີ ເປັນພະຄູ່ບ້ານຄູ່ເມືອງມາຍາວນານ ມີຮູບຊົງເປັນເອກະລັກສະເພາະມີຂະໜາດ ສູງ 56 ຊັງຕີແມັດ, ໜ້າຕັກກວາງ 37 ຊັງຕີແມັດ, ບ່າໄຫລ່ກວ້າງ 21 ຊັງຕີແມັດ, ແທ່ນສູງ 23,5 ຊັງຕີແມັດ ແລະ ກວ້າງ 51 ຊັງຕີແມັດ ຊຶ່ງປະສົມໂລຫະເຂົ້າກັນ ມີ: ທອງສໍາລິດ, ທອງເຫລືອງ, ເງິນ-ຄຳ ແລະ ແກ້ວປະເສີດທີ່ຫາຍາກ ເປັ່ງປະກາຍສີແວວວາວສະດຸດຕາ ຜູ້ໃດເຫັນແລ້ວມີຄວາມສຸກໃຈ, ເປັນສິລະປະລາວແທ້ ຊຶ່ງຜູ້ສ້າງໄດ້ຖວາຍຈິດໃຈອັນບໍລິສຸດ ຈາກສີມືນາຍຊ່າງທີ່ມີຊື່ສຽງໂດງດັ່ງ ໃນຍຸກອານາຈັກລາວລ້ານຊ້າງຮຸ່ງເຮືອງ ແລະ ຍິ່ງໃຫຍ່.

          ເຖິງແນວໃດກໍດີ, ເມື່ອມໍ່ໆມານີ້, ທີ່ວັດບ້ານລິ່ງຊັນ ເມືອງທຸລະຄົມ ແຂວງວຽງຈັນ ໄດ້ຈັດພິທີປະກາດຮັບຮອງພະທອງສາມສີ ເປັນມໍລະດົກແຫ່ງຊາດ ສົມບັດມິ່ງເມືອງລະດັບທ້ອງຖິ່ນ ໂດຍມີ ທ່ານ ສົມປະສົງ ສຸວົງຄຳຈັນ ຮອງປະ ທານຄະນະກຳມະການປົກຄອງ ແຂວງວຽງຈັນ, ມີບັນດາຫ້ອງການທີ່ກ່ຽວຂ້ອງຂັ້ນແຂວງ, ຂັ້ນເມືອງ, ພະສົງ-ສາມະເນນ, ພ້ອມດ້ວຍອຳນາດການປົກຄອງບ້ານ, ພໍ່ແມ່ປະຊາຊົນ ແລະ ນ້ອງນ້ອຍນັກຮຽນເຂົ້າຮ່ວມ ຊຶ່ງການຈັດພິທີປະກາດຮັບຮອງພະທອງສາມສີ ເປັນມໍລະດົກແຫ່ງຊາດສົມບັດມິ່ງເມືອງລະດັບທ້ອງຖິ່ນ ຂຶ້ນໃນຄັ້ງນີ້ ເປັນຄວາມພາກພູມໃຈ ແລະ ເອກອ້າງຂອງປະຊາຊົນບ້ານລິ່ງຊັນ, ເມືອງທຸລະຄົມ ແລະ ຊາວແຂວງວຽງຈັນ, ທັງເປັນການໂຄສະນາ, ສົ່ງເສີມ, ດຶງດູດນັກທ່ອງທ່ຽວ, ການສົ່ງເສີມວຽກງານທ່ອງທ່ຽວວັດທະນະທຳ ຕິດພັນກັບທຳມະຊາດສາຍນ້ຳງື່ມ. ພ້ອມນັ້ນ, ໃນພິທີ ໄດ້ມີຂະບວນການແຫ່ພະທອງສາມສີ ເຂົ້າສູ່ວັດ ແລະ ແຫ່ອ້ອມພັດທະສິມມາ ພ້ອມທັງຮັບຊົມການສະແດງສິລະປະ ບົດຟ້ອນລວມໝູ່ ຂອງນັກຮຽນໂຮງຮຽນ ມ ຕົ້ນ ບ້ານລິ່ງຊັນ ແລະ ໂຮງຮຽນ ມສ ບ້ານຖິ່ນຄຳ.

KPL