ເຂດສາມຫລ່ຽມ ປາກແມ່ນ້ຳຢາງຊີກຽງ ອອກແຮງສ້າງສູນ ຫັນປ່ຽນໝາກຜົນ ດ້ານວິທະຍາສາດ ເຕັກໂນໂລຊີ ແລະ ກຸ່ມນະວັດຕະກຳ ອຸດສາຫະກຳລະດັບສູງ
ຂປລ.ວິທະຍຸ-ໂທລະພາບ ສູນກາງຈີນ ຫລື CMG, ນະຄອນຊຽງໄຮ້ ມີວິສາຫະກິດ ເຕັກໂນໂລຊີ ທັນສະໄໝ ຫລາຍກວ່າ 25.000 ແຫ່ງ ແລະ ມີວິສາຫະກິດ ວິທະຍາສາດ ເຕັກໂນໂລຊີ ກຳເນີດຂຶ້ນ ສະເລ່ຍ 320 ແຫ່ງຕໍ່ວັນ, ໃນ 6 ເດືອນຕົ້ນປີ 2025, ໃນທຸກໆ 3 ບົດວິທະຍານິພົນ ທີ່ລົງພິມ ໃນວາລະສານ ລະດັບສູງສຸດ ສາກົນ ກໍມີບົດໜຶ່ງ ມາຈາກຊຽງໄຮ້.ໂດຍຖືເອົາ ນະຄອນຊຽງໄຮ້ ເປັນຜູ້ນຳໜ້າ, ຄວາມສາມາດປະດິດສ້າງ ຂອງເຂດສາມຫລ່ຽມ ປາກແມ່ນ້ຳຢາງຊີກຽງຂອງ ສປ ຈີນ ເຊິ່ງລວມທັງ ແຂວງຈ່ຽງຊູ, ແຂວງເຈີ້ຈ່ຽງ ແລະ ແຂວງອ່ານຮຸຍໄດ້ຍົກສູງຂຶ້ນ ຢ່າງບໍ່ຢຸດຢັ້ງ ໃນຊຸມປີຜ່ານມານີ້. ໃນເວລາລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເຂດສາມຫລ່ຽມປາກແມ່ນ້ຳຢາງຊີກຽງ, ທ່ານ ສີ ຈິ້ນຜິງ ຜູ້ນຳສູງສຸດຂອງ ສປ ຈີນ ໄດ້ຊີ້ໃຫ້ເຫັນຢ່າງຈະແຈ້ງວ່າ, ນະຄອນຊຽງໄຮ້ ແລະ ເຂດສາມຫລ່ຽມປາກແມ່ນ້ຳຢາງຊີກຽງ ບໍ່ພຽງແຕ່ຄວນສະໜອງ ຜະລິດຕະພັນ ທີ່ມີຄຸນນະພາບດີເທົ່ານັ້ນ, ຍັງຕ້ອງສະໜອງ ວິທະຍາສາດເຕັກໂນໂລຊີ ໃນລະດັບສູງ ເພື່ອສະໜັບສະໜູນ ການພັດທະນາ ທີ່ມີຄຸນນະພາບສູງ ຂອງທົ່ວປະເທດ. ປີ 2007, ທ່ານ ສີ ຈິ້ນຜິງ ເລຂາຄະນະພັກນະຄອນຊຽງໄຮ້ ໃນເວລານັ້ນໄດ້ຮຽກຮ້ອງ ໃຫ້ໂຄງການປະດິດສ້າງ ວິທະຍາສາດ ເຕັກໂນໂລຊີ ລະດັບຊາດເຊັ່ນ: ສູນລັງສີຊິນໂຄຣຕຣອນຊຽງໄຮ້ ຫລື SSRF ປະສານສົມທົບກັບ ຍຸດທະສາດ ແຫ່ງຊາດ ຢ່າງແໜ້ນແຟ້ນ. ພາຍຫລັງ ສ້າງຕັ້ງຂຶ້ນເມື່ອປີ 2009 ເປັນຕົ້ນມາ SSRF ໄດ້ສະໜັບສະໜູນຫົວຂໍ້ ທົດລອງ ຫລາຍກວ່າ 20.000 ຫົວຂໍ້. ຜູ້ຊົມມີຄວາມສົນໃຈຕໍ່ລົດຍົນ ທີ່ພິມດ້ວຍເຕັກນິກ 3D ຢູ່ເຂດວາງສະແດງລົດຍົນ ຂອງງານວາງສະແດງສິນຄ້າ ນຳເຂົ້າສາກົນຈີນ ທີ່ນະຄອນຊຽງໄຮ້.ປັດຈຸບັນ, ການປະດິດສ້າງ ດ້ານວິທະຍາສາດເຕັກໂນໂລຊີ ຂອງເຂດສາມຫລ່ຽມ ປາກແມ່ນ້ຳຢາງຊີກຽງ ໄດ້ຍົກລະດັບສູງຂຶ້ນ ຢ່າງບໍ່ຢຸດຢັ້ງ, ໃນ 100 ກຸ່ມນະວັດຕະກຳ ທີ່ເຂັ້ມແຂງທີ່ສຸດຂອງ “ດັດຊະນີນະວັດຕະກຳທົ່ວໂລກປີ 2025” ຂອງອົງການຊັບສິນທາງປັນຍາໂລກ ຫລື WIPO, ກຸ່ມຊຽນໄຮ້-ຊູໂຈ່ວ ເປັນອັນດັບທີ 6, ສ່ວນນະຄອນຫາງໂຈ່ວ ເປັນອັນດັບທີ 13, ນະຄອນນານກິ່ງ ເປັນອັນດັບທີ 15 ແລະ ນະຄອນເຫີເຝີຍ ເປັນອັນດັບທີ 39./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ