ຫັນມາ ປູກຝັງ-ລ້ຽງສັດ ເປັນອາຊີບເສີມ ສ້າງລາຍຮັບເຂ້ົ້າສູ່ຄອບຄົວຫລາຍຮ້ອຍລ້ານກີບຕໍ່ປີ
ຂປລ. ດັ່ງທີ່ເຮົາຮູ້ນໍາກັນແລ້ວວ່າ, ການເຮັດອາຊີບກະສິກໍາ ແມ່ນອາຊີບຫລັກຂອງປະຊາຊົນລາວ ເນື່ອງຈາກຜົນຜະລິດກະສິກໍາ ເປັນທີ່ຕ້ອງການຂອງຕະຫລາດຢູ່ສະເໝີ ບໍ່ວ່າຈະຜະລິດໃນລະດູໃດກໍໄດ້ຂາຍ. ສະນັ້ນ, ຈຶ່ງເຮັດໃຫ້ປະຊາຊົນບັນດາເຜົ່າຢຶດອາຊີບ ການຜະລິດກະສິກໍາ ແລະ ບາງຄອບຄົວກໍເຮັດເປັນອາຊີບ ເສີມຄຽງຄູ່ກັບວຽກປະຈຳ ເພື່ອສ້າງລາຍຮັບອີກຊ່ອງທາງເຂົ້າຄອບຄົວ ເໝືອນດັ່ງຄອບຄົວຂອງ ທ່ານ ຄໍາຜາ ຫລວງແສງເພັດ ເກີດໃນຄອບຄົວພະນັກງານ ທີ່ມີມູນເຊື້ອດຸໝັ່ນໃນການອອກແຮງງານ, ເອົາວຽກງານກະສິກໍາ ໄປຄຽງຄູ່ກັບອາຊີບພະນັກງານ ຈົນປະສົບຜົນສໍາເລັດສາມາດສ້າງລາຍຮັບ 157 ລ້ານກີບຕໍ່ປີ.
ທ່ານ ຄໍາຜາ ຫລວງແສງເພັດ ມີຖິ່ນຖານບ້ານເກີດ ຢູ່ບ້ານ ໂພນສະອາດ, ເມືອງປາກຊັນ, ແຂວງ ບໍລິຄຳໄຊ, ຄອບຄົວເປັນພະນັກງານສັງກັດລັດ, ເປັນລູກຜູ້ທີ 1 ມີອ້າຍເອື້ອຍນ້ອງທັງໝົດ 5 ຄົນ, ຍ້ອນມີຄວາມຮັກຊາດ, ຮັກບ້ານເກີດເມືອງນອນ ແລະ ຢາກປະກອບສ່ວນຮັບໃຊ້ຊາດ ໃນຖັນແຖວຂອງກອງທັບປະຊາຊົນລາວ ສະຫາຍໄດ້ສະໝັກໃຈເຂົ້າເປັນທະຫານ ໃນປີ 2010, ໃນຕະຫລອດໄລຍະທີ່ເຂົ້າມາ ໃນຖັນແຖວກອງທັບ ສະຫາຍໄດ້ຊອກຮູ້ຮໍ່າຮຽນ ນຳໝູ່ເພື່ອນດ້ວຍກັນ ແລະ ໄດ້ຮັບການຊີ້ນຳມອບໝາຍໜ້າທີ່ວຽກງານອັນລະອຽດຈາກຄະນະພັກ-ຄະນະບັນຊາ ບວກກັບຄວາມອົດທົນພະຍາຍາມ, ດຸໝັ່ນຂະຫຍັນພຽນ, ຕັ້ງໜ້າຝຶກຝົນຫລໍ່ຫລອມຕົນເອງ ໃນທຸກດ້ານເປັນຕົ້ນແມ່ນ ການປະຕິບັດຂໍ້ກຳນົດກົດລະບຽບ 7 ລະບອບ 18 ວຽກໃນມື້ໜຶ່ງຂອງກອງທັບ. ໄປຄຽງຄູກັບການເຮັດສໍາເລັດໜ້າທີ່ວຽກງານວິຊາສະເພາະແລ້ວ, ສະຫາຍຍັງໄດ້ເປັນແບບຢ່າງໃນການອອກແຮງງານ ດ້ວຍການເສີມຂະຫຍາຍມູນເຊື້ອ ຄວາມຫ້າວຫັນດຸໝັ່ນ ເພີ່ມພູນຜະລິດຜົນປູກຝັງ-ລ້ຽງສັດ ສະໜອງເຂົ້າເຮືອນຄົວລວມ ແລະ ກາຍເປັນການສ້າງລາຍຮັບບວກ ໃສ່ກັບເງິນເດືອນແຕ່ລະເດືອນເຮັດໃຫ້ຊີວິດ ການເປັນຢູ່ນັບມື້ດີຂຶ້ນເລື້້ອຍໆ ຊຶ່ງສະແດງອອກໃນການຕອບສະໜອງຊີ້ນເຂົ້າເຮືອນຄົວ ໄດ້ 4.980 ກິໂລຕໍ່ປີ, ປັດຈຸບັນກຳລັງລ້ຽງສັດຕ່າງໆເຊັ່ນ: ງົວ 31 ໂຕ, ສັດປີກ 560 ໂຕ, ປາ 15.600 ໂຕ ແລະ ກົບ 3.000 ໂຕ, ຜ່ານມາສາມາດສ້າງລາຍຮັບຈາກການປູກຝັງ-ລ້ຽງສັດສ້າງລາຍຮັບໄດ້ 157ລ້ານກີບ.
ທ່ານ ຄໍາຜາ ເວົ້າຕື່ມວ່າ: ພາຍຫລັງ ທີ່ຫັນມາເຮັດການຜະລິດແບບປະສົບປະສານ ເຮັດໃຫ້ຄອບຄົວດີຂຶ້ນກວ່າເມື່ອກ່ອນຫລາຍ ຄອບຄົວມີຢູ່ມີກິນ ທັງມີຄວາມຜາສຸກ-ຖືກຕ້ອງປອງດອງ ລູກໄດ້ຮັບການສຶກສາຮໍ່າຮຽນ ສາມາດສ້າງເສດຖະກິດຄອບຄົວໃຫ້ດີຂື້ນເທື່ອລະກ້າວ ກໍຍ້ອນຄວາມອົດທົນດຸໝັ້ນ ຫັນໃຊ້ເນື້ອທີ່ໃຫ້ເກີດປະໂຫຍດສູງສຸດ ບໍ່ເຮັດວຽກໜ້າດຽວ ຕ້ອງເຮັດຫລາຍຢ່າງຄຽງຄູ່ກັນໄປ.
