ກອງປະຊຸມຄັ້ງທີ 24 ຂອງສະພາມົນຕີ ຫົວໜ້າລັດຖະບານ ປະເທດສະມາຊິກ ອົງການຮ່ວມມືຊຽງໄຮ້
ຂປລ.ວິທະຍຸ-ໂທລະພາບ ສູນກາງຈີນ, ເມື່ຶອບໍ່ດົນມານີ້, ກອງປະຊຸມຄັ້ງທີ 24 ຂອງສະພາມົນຕີ ຫົວໜ້າລັດຖະບານປະເທດສະມາຊິກ ອົງການຮ່ວມມືຊຽງໄຮ້ ໄດ້ຈັດຂຶ້ນ ຢູ່ນະຄອນຫຼວງມົດສະກູ ຂອງຣັດເຊຍ, ພາຍຫລັງ ສຳເລັດກອງປະຊຸມ ໄດ້ອອກຖະແຫລງການຮ່ວມ. ຝ່າຍຕ່າງໆ ໄດ້ຕີລາຄາສູງ ຕໍ່ການປະຕິບັດວຽກງານຂອງ ສປ ຈີນ ໃນໄລຍະທີ່ເປັນປະເທດ ປະທານ ໝູນວຽນ ຂອງອົງການຮ່ວມມື ຊຽງໄຮ້ ລະຫວ່າງປີ 2024-2025, ແລະ ຢືນຢັນວ່າ ຈະສະໜັບສະໜູນ ກຽກກິດສະຖານ ເປັນປະເທດ ປະທານໝູນວຽນ ຄັ້ງຕໍ່ໄປ ຂອງອົງການຮ່ວມມືຊຽງໄຮ້.ຖະແຫລງການເນັ້ນໜັກວ່າ: ປະເທດ ສະມາຊິກຕ່າງໆ ຈະຍຶດໝັ້ນຈຸດປະສົງ ແລະ ຫລັກການ ຂອງກົດບັດສະຫະປະຊາຊາດ, ສະໜັບ ສະໜູນ ອົງການ ສະຫະ ປະຊາຊາດ(ສປຊ) ດຳເນີນການປະຕິຮູບ ທີ່ຈຳເປັນ, ເພື່ອສອດຄ່ອງກັບທ່າອ່ຽງທີ່ໂລກ ກາຍເປັນຫລາຍຂົ້ວ. ຝ່າຍຕ່າງໆຮ່ວມກັນຄັດຄ້ານ ການແກ້ໄຂ ບັນຫາສາກົນ ດ້ວຍວິທີທີ່ເປັນປໍລະປັກກັນ ລະຫວ່າງກຸ່ມ, ເນັ້ນໜັກວ່າ ຕ້ອງຮ່ວມກັນປົກປັກຮັກສາ ລະບົບການຄ້າຫລາຍຝ່າຍ ແລະ ສຸມກຳລັງ ເພື່ອສ້າງຂອບຄວາມໝັ້ນຄົງ ທີ່ສະເໝີພາບ ແລະ ຕັດແຍກ ບໍ່ໄດ້ຢູ່ແຜ່ນດິນໃຫຍ່ ອາຊີ-ເອີຣົບ. ກອງປະຊຸມໄດ້ກຳນົດ ຢ່າງຈະແຈ້ງວ່າ: ໃນຕໍ່ໜ້າ ຈະຈັດຕັ້ງປະຕິບັດ “ຍຸດທະສາດການພັດທະນາໃນ 10 ປີຕໍ່ໜ້າ ຂອງອົງການຮ່ວມມືຊຽງໄຮ້” ເປັນຈຸດສຸມຮ່ວມກັນສົ່ງເສີມ ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ ຂອງພາກພື້ນ. ກອງປະຊຸມສະພາມົນຕີ ຫົວໜ້າລັດຖະບານ ປະເທດສະມາຊິກ ອົງການຮ່ວມມືຊຽງໄຮ້ ຄັ້ງຕໍ່ໄປ ຈະຈັດຂຶ້ນຢູ່ກຽກກິດສະຖານ ໃນປີ 2026./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ