ສະໜອງທຶນໃຫ້ວຽກງານໂພຊະນາການ ອີງໃສ່ຂໍ້ມູນເພື່ອຈັດຕັ້ງປະຕິບັດຢ່າງເລັ່ງລັດ
ຂປລ. ຄະນະກໍາມະການໂພຊະນາການແຫ່ງຊາດ ແລະ ຄູ່ຮ່ວມພັດທະນາສາກົນ ເປັນຕົ້ນ ສະຫະພາບເອີລົບ, ທະນາຄານໂລກ, ທະນາຄານພັດທະນາອາຊີ, ເຄື່ອຂ່າຍອົງການຈັດຕັ້ງທາງສັງຄົມ ເພື່ອສົ່ງເສີມໂພຊະນາການ, ອົງການສະຫະປະຊາຊາດສໍາລັບເດັກ, ອັງການແຄຣ, ອົງການອາດຣາ, ອົງການອາຫານໂລກ, ກະຊວງກ່ຽວຂ້ອງ, ອົງການຈັດຕັ້ງມະຫາຊົນ, ສະຖາບັນການສຶກສາ ແລະ ຕົວແທນເຄືອ ຂ່າຍພາກເອກະຊົນ ຈັດກອງປະຊຸມແຫ່ງຊາດ ດ້ານໂພຊະນາການຄັ້ງທີ X ໃນວັນທິ 18 ມີນາ 2025 ຢູ່ນະຄອນຫລວງວຽງຈັນ. ພາຍໃຕ້ຫົວຂໍ້ “ສະໜອງທຶນໃຫ້ວຽກງານໂພຊະນາການ ໂດຍອີງໃສ່ຂໍ້ມູນເພື່ອຈັດຕັ້ງປະຕິບັດຢ່າງເລັ່ງລັດ” ພາຍໃຕ້ການເປັນປະທານຂອງ ທ່ານ ກິແກ້ວ ໄຂຄໍາພິທູນ ຮອງນາຍົກ ລັດຖະມົນຕີ ແຫ່ງ ສປປ ລາວ, ປະທານຄະນະກໍາມະການແຫ່ງຊາດ ດ້ານໂພຊະນາການ ເຊິ່ງກອງປະຊຸມໄດ້ເນັ້ນໜັກເຖິງຄວາມສໍາຄັນ ຂອງການລົງທຶນສໍາລັບໂພຊະນາການ ແລະ ການຮ່ວມມື ເພື່ອແກ້ໄຂບັນຫາໂພຊະນາການໃນປະເທດ.
ໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ມີຄຳເຫັນ ແລະ ເນັ້ນໃຫ້ເອົາໃຈໃສ່ບາງວຽກງານທີ່ສຳຄັນ ໃນກອງປະຊຸມດ້ານໂພຊະນາການແຫ່ງຊາດ ຄັ້ງທີ 10 ແລະ ກອງປະຊຸມຄະນະກໍາມະການແຫ່ງຊາດ ດ້ານໂພຊະນາການ ປະຈໍາປີ 2024 ເລັງໃສ່ການສະໜອງທຶນ ໃສ່ວຽກງານໂພຊະນາການ ເພື່ອຮີບຮ້ອນໃຫ້ມີ ການຈັດຕັ້ງປະຕິບັດແບບເລັ່ງລັດ ໃນໄລຍະສຸດທ້າຍ ຂອງການປະຕິບັດ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ 9 ກໍຄື ແຜນປະຕິບັດງານແຫ່ງຊາດດ້ານໂພຊະນາການ 2020-2025 ແນໃສ່ໃຫ້ບັນລຸຄາດໝາຍດ້ານໂພຊະນາການ ໂດຍສະເພາະ ໃຫ້ອັດຕາເດັກຂາດອາຫານປະເພດລວງສູງບໍ່ໄດ້ມາດຕະຖານ ຫລຸດລົງ ເປັນ 1 ໃນ 4 ໃນປີ 2030 ຄື: ສືບຕໍ່ເອົາວຽກໂພຊະນາການ ເຊື່ອມເຂົ້າໃນແຜນການພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 10 ແລະ ລະບົບລາຍງານຕິດຕາມປະເມີນຜົນຂອງຊາດ; ໃຫ້ແຕ່ລະຂະແໜງການ ນຳເອົາບັນດາກຸ່ມກິດຈະກຳ ທີ່ນອນຢູ່ໃນແຜນປະຕິບັດງານແຫ່ງຊາດ ດ້ານໂພຊະນາການເຊື່ອມເຂົ້າໃນ ແຜນພັດທະນາ 5 ປີ ແລະ ຈັດເຂົ້າເປັນແຜນບຸລິມະ ສິດ ປະຈໍາປີ 2025 ແລະ ເຊື່ອມເຂົ້າໃນກອບລະບົບລາຍງານ ຂອງແຕ່ລະຂະແໜງການ ແຕ່ສູນກາງ ຮອດທ້ອງຖິ່ນ; ສູ້ຊົນເພີ່ມທະວີການສະໜອງ ດ້ານງົບປະມານ ເພື່ອໃຫ້ໄດ້ຈັດຕັ້ງປະຕິບັດ ແລະ ການສັງຮວມລາຍງານດ້ານການເງິນ ທີ່ສະໜອງໃນວຽກໂພຊະນາການ ໃນແຕ່ລະຂະແໜງການ; ເພີ່ມທະວີ ການຮ່ວມມື ປະສານງານກັບຄູ່ຮ່ວມພັດທະນາ, ຜູ້ໃຫ້ທຶນ, ອົງການຈັດຕັ້ງສາກົນ, ອົງການຈັດຕັ້ງສັງ ຄົມ ແລະ ການມີສ່ວນຮ່ວມຂອງພາກເອກະຊົນ ເພື່ອລະດົມທຶນ ໃນການສະໜັບສະໜູນວຽກງານໂພ ຊະນາການ; ສືບຕໍ່ປັບປຸງຄະນະກຳມະການ ໂພຊະນາການຂັ້ນແຂວງ ແລະ ເມືອງ ຕາມຂໍ້ຕົກລົງຂອງ ນາຍົກລັດຖະມົນຕີ ສະບັບປັບ ເລກທີ 155 ແລະ ປັບປຸງຈຸດປະສານງານແຕ່ລະຂະແໜງການ ເພື່ອໃຫ້ມີຄວາມຄ່ອງໂຕ ແລະ ຟົດຟຶ້ນຢ່າງຕໍ່ເນື່ອງ ພ້ອມທັງໃຫ້ມີການເຄື່ອນໄຫວຢ່າງເປັນປົກກະຕິ; ສ້າງຄວາມເຂັ້ມແຂງໃຫ້ລະບົບການຜະລິດ ແລະ ຄວາມໝັ້ນຄົງດ້ານສະບຽງອາຫານເພື່ອສຸຂະພາບ ແບບຍືນຍົງ, ພ້ອມທັງສ້າງຄວາມເຂັ້ມແຂງ ລະບົບບໍລິການດ້ານໂພຊະນາການ; ເຮັດການເຝົ້າລະວັງ ທາງດ້ານໂພຊະນາການຢ່າງເປັນປົກກະຕິ ໄປຄຽງຄູ່ກັບການຄົ້ນຄວ້າ ແລະ ນຳໃຊ້ບັນດາຂໍ້ມູນຫລັກຖານໃໝ່ເຂົ້າໃນການວາງແຜນແກ້ໄຂບັນຫາໃຫ້ຖຶກຈຸດ ແນໃສ່ເຮັດໃຫ້ການລົງທຶນ ໄດ້ຮັບປະສິດທິຜົນສູງສຸດ; ທຸກພາກສ່ວນ ໃຫ້ການສະໜັບສະໜຸນການສະໜອງ ແລະ ຈັດສັນທຶນໃສ່ໃນການຮີບຮ້ອນ ເລັ່ງລັດຈັດຕັ້ງປະຕິບັດ ວຽກງານໂພຊະນາການ ພ້ອມທັງມີການຕິດຕາມ, ຊຸກຍູ້, ປະເມີນຜົນຢ່າງເປັນລະບົບ ແລະ ຕໍ່ເນື່ອງ, ພ້ອມທັງມີການສະຫລຸບລາຍງານເປັນແຕ່ລະໄລຍະ.
ທ່ານ ອາເລັກຊານເດີ ເຄຣເມີ ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ໄດ້ກ່າວວ່າ: ໂພຊະນາການທີ່ພຽງພໍ ແມ່ນມີຄວາມຈຳເປັນຕໍ່ການຈະເລີນເຕີບໂຕ, ຄວາມສະຫລາດ ແລະ ລະດັບລາຍຮັບໃນອະນາຄົດຂອງເດັກ. ແຕ່ໜ້າເສຍດາຍ, ປະເທດລາວຍັງຜະເຊີນກັບ ອັດຕາການຂາດສານອາຫານ ໃນໄວເດັກທີ່ສູງຫລາຍ ແລະ ກັບມາມີອັດຕາທີ່ສູງກວ່າແຕ່ກ່ອນ. ເພື່ອໃຫ້ສາມາດກັບມາສືບຕໍ່ຫລຸດຜ່ອນ ອັດຕາການຂາດໂພຊະນາການໄດ້ ມັນຈໍາເປັນຕ້ອງມີບຸກຄະລາກອນ ດ້ານສາທາລະນະສຸກ ທີ່ໄດ້ຮັບການຝຶກອົບຮົມຫລາຍຂຶ້ນ, ມີການສະໜອງເງິນສົດໂດຍມີເງື່ອນໄຂ ເພື່ອໃຫ້ເດັກໄດ້ຮັບສານອາຫານ ແລະ ໂພຊະນາການທີ່ພຽງພໍ, ພ້ອມທັງມີການລົງທຶນໃສ່ການສະໜອງນໍ້າສະອາດ. ທະນາຄານໂລກ ແລະ ບັນດາຄູ່ຮ່ວມງານຈະສືບຕໍ່ສະໜັບສະໜູນລັດຖະບານລາວ ໃນການລົງທຶນໃສ່ວຽກງານທີ່ຕິດພັນກັບໂພຊະນາການ ເຊິ່ງຮຽກໃຫ້ໃຫ້ລັດຖະບານຕ້ອງໄດ້ເພີ່ມການຈັດສັນງົບປະມານ ພາກລັດເຂົ້າໃນວຽກງານດັ່ງກ່າວ ຢ່າງຮີບດ່ວນ ເພື່ອຮັດແຄບຊ່ອງຫວ່າງ ໃນການສະໜອງທຶນ.
ທ່ານ ບິລາລ ໂອແຣັງ ເຊັບ ດູຣານິ, ຜູ້ຕາງໜ້າ ອົງການສະຫະປະຊາດສໍາລັບເດັກ ປະຈໍາ ສປປ ລາວ ໄດ້ກ່າວວ່າ: ຕ້ອງມີຍຸດທະສາດການລົງທຶນ ແລະ ສະໜັບສະໜູນ ດ້ານງົບປະມານທີ່ຍືນຍົງ ຈຶ່ງຈະຮັບປະກັນໄດ້ວ່າ ເດັກນ້ອຍທຸກໆຄົນ ຈະໄດ້ຮັບໂພຊະນາການທີ່ພຽງພໍ ຕາມຄວາມຕ້ອງການຂອງພວກເຂົາ ໂດຍສະເພາະ ແມ່ນໄລຍະ 1.000 ວັນທໍາອິດຂອງຊີວິດ ແລະ ແມ່ເອງກໍຕ້ອງໄດ້ຮັບການສະໜັບສະໜູນ ໃນການຊ່ວຍເບິ່ງແຍງດູແລ ລູກຂອງພວກເຂົາ.