ກຸ່ມນັກທ່ອງທ່ຽວຈາກປະເທດອາຊຽນ ສາມາດເຂົ້າກິ່ງແຂວງສິບສອງພັ່ນນາຂອງ ສປ ຈີນ ໂດຍຍົກເວັ້ນວິຊາ
ຂປລ.ວິທະຍຸ ສາກົນແຫ່ງ ສປ ຈີນ, ອົງການ ຄຸ້ມຄອງ ຊາວເຄື່ອນຍ້າຍ ຖິ່ນຖານ ແຫ່ງຊາດຈີນ ໄດ້ອອກແຈ້ງການ ໃນວັນທີ 10 ກຸມພານີ້ ໂດຍລະບຸວ່າ: ນັບແຕ່ມື້ນີ້ ເປັນຕົ້ນໄປ, ຈະຈັດຕັ້ງ ປະຕິບັດນະໂຍບາຍ ຍົກເວັ້ນວິຊາ ຕໍ່ກຸ່ມນັກທ່ອງທ່ຽວ ຂອງປະເທດ ອາຊຽນ ທີ່ເຂົ້າກິ່ງແຂວງສິບສອງພັ່ນນາ ແຂວງຢູນນານຂອງ ສປ ຈີນ. ກຸ່ມນັກທ່ອງທ່ຽວທີ່ມີ 2 ຄົນ ແລະ 2ຄົນ ຂຶ້ນໄປຂອງ 10 ປະເທດອາຊຽນ ຄື: ສປປ ລາວ, ມາເລເຊຍ, ອິນໂດເນເຊຍ, ໄທ, ຟີລິບປິນ, ສິງກະໂປ, ບຣູໄນ, ສສ ຫວຽດນາມ, ມຽນມາ ແລະ ກຳປູເຈຍ, ຖືເອົາໜັງສືຜ່ານແດນທົ່ວໄປ ແລະ ຈັດຕັ້ງຕ້ອນຮັບ ໂດຍຜ່ານບໍລິສັດທ່ອງທ່ຽວຂອງ ສປ ຈີນ ສາມາດເຂົ້າ-ອອກເມືອງ ແບບຍົກເວັ້ນວິຊາ ຜ່ານດ່ານ ສະໜາມບິນສາກົນ ກາຊາສິບສອງພັ່ນນາ, ດ່ານທາງລົດໄຟບໍ່ຫານ ແລະ ດ່ານທາງຫລວງບໍ່ຫານ, ບໍລິເວນທ່ອງທ່ຽວ ແມ່ນກິ່ງແຂວງສິບສອງພັ່ນນາ, ໄລຍະເວລາທ່ອງທ່ຽວ ບໍ່ໃຫ້ເກີນ 6 ວັນ.ຜູ້ຮັບຜິດຊອບ ທີ່ກ່ຽວຂ້ອງ ຂອງອົງການຄຸ້ມຄອງ ຊາວເຄື່ອນຍ້າຍ ຖິ່ນຖານ ແຫ່ງຊາດຈີນ ແນະນຳໃຫ້ຮູ້ວ່າ: ຕໍ່ໄປ, ສປ ຈີນ ຈະດຶງດູດຊາວຕ່າງປະເທດ ຫລາຍກວ່າເກົ່າ ເດີນທາງມາທ່ຽວຊົມ ແລະ ດຳເນີນ ທຸລະກິດຢູ່ ສປ ຈີນ, ເພື່ອເພີ່ມພະລັງແຮງ ອັນໃໝ່ ຢ່າງຕໍ່ເນື່ອງ ເຂົ້າໃນຕະຫລາດ ທ່ອງທ່ຽວພາຍໃນ, ຮັບໃຊ້ການເປີດ ປະຕູທີ່ມີລະດັບສູງ ແລະ ການພັດທະນາ ຢ່າງມີຄຸນນະພາບສູງຂອງ ສປ ຈີນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ