*ກອງທັບປະຊາຊົນລາວ ເປັນກອງທັບທີ່ມີຄວາມເຂັ້ມແຂງ ແລະ ນຳໜ້າໃນທຸກຂະບວນການປະຕິວັດຂອງຊາດລາວ, ນັບແຕ່ມື້ສ້າງຕັ້ງຈົນເຖິງປັດຈຸບັນຍາມໃດກອງທັບກໍເອົາໃຈໃສ່ພັດທະນາ ກຳລັງຂອງຕົນໃຫ້ມີຄວາມເຂັ້ມແຂງຮອບດ້ານ ເພື່ອປົກປ້ອງເຂດ ນຳແດນດິນ, ອຳນາດອະທິປະໄຕ ຂອງປະເທດຊາດ ແລະ ມີຄວາມຈົງຮັກພັກດີຕໍ່ປະເທດຊາດ, ຕໍ່ພັກ ແລະ ຕໍ່ປະຊາຊົນຜູ້ອອກແຮງງານບັນດາເຜົ່າຢ່າງໜັກແໜ້ນ. ສະແດງອອກຕະຫລອດໄລຍະ 76 ປີ ແຫ່ງການເຕີບໃຫຍ່ຂະຫຍາຍຕົວກອງທັບປະຊາຊົນລາວ ໄດ້ສືບຕໍ່ສ້າງກຳລັງຂອງຕົນໃຫ້ມີຄວາມເຂັ້ມແຂງ, ໜັກແໜ້ນ ແລະ ທັນສະໄໝເປັນກ້າວໆ ໃຫ້ສົມເປັນກອງກຳລັງນຳໜ້າທີ່ເຂັ້ມແຂງເປັນກຳແພງເພັດຂອງຊາດຂອງພັກ ໂດຍການເພີ່ມທະວີການຈັດຕັ້ງປະຕິບັດຍຸດທະສາດແນວທາງປ້ອງກັນຊາດຂອງພັກໃຫ້ມີຜົນສຳເລັດ, ສືບຕໍ່ປັບປຸງກ່ໍສ້າງກອງທັບປະຊາຊົນລາວ ໃຫ້ກາຍເປັນກອງທັບປະຕິວັດທີ່ມີແບບແຜນ ແລະ ທັນສະໄໝ, ພ້ອມທັງປົກປັກຮັກສາເອກະລາດ, ອະທິປະ ໄຕຂອງຊາດ ໂດຍການຮ່ວມມືກັບພາກສ່ວນກ່ຽວຂ້ອງລົງກໍ່ສ້າງຮາກຖານ ແລະ ແກ້ໄຂຄວາມບໍ່ສະຫງົບໃນເຂດຊາຍແດນ.

    ຕະຫລອດໄລຍະຜ່ານມາ, ກອງທັບປະຊາຊົນລາວ ໄດ້ເປັນເຈົ້າການເອົາໃຈໃສ່ປັບປຸງກົມກອງໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ, ເຝິກແອບຍົກລະດັບສິລະປະຍຸດ, ຍຸດທະວິທີສູ້ຮົບໃຫ້ເຂັ້ມແຂງຮອບດ້ານ, ພ້ອມທັງປະສານງານຮ່ວມມືກັບບັນດາປະເທດເພື່ອນມິດ ແລະ ສາກົນ ເພື່ອຖອດຖອນບົດຮຽນດ້ານວິຊາການໃຫ້ເຂັ້ມແຂງ ແລະ ທັນສະໄໝ ພ້ອມທັງປະກອບພາຫະນະຍຸດໂທປະກອນທີ່ທັນສະໄໝຈຳນວນໜຶ່ງໃຫ້ກົມກອງ ແລະ ເຫລ່ົາຮົບຕ່າງໆ. ສິ່ງສຳຄັນໄດ້ສືບຕໍ່ການເຮັດວຽກງານພາລາ ທິການກັບທີ່ ຊຶ່ງນອກຈາກເຮັດວຽກງານວິຊາສະເພາະແລ້ວໄດ້ສຸມໃສ່ ການເພີ່ມພູນຜະລິດຜົນຮັບປະກັນໃຫ້ກົມກອງມີຄວາມເຂັ້ມແຂງທາງດ້ານວິຊາສະເພາະ ທັງສາມາດກຸ້ມຕົນເອງ ແລະ ເພິ່ງຕົນເອງທາງດ້ານສະບຽງອາຫານ. ຍ້ອນແນວນັ້ນ, ໃນໄລຍະຜ່ານມາ ກອງທັບພວກເຮົາ ຈຶ່ງມີຄວາມກຽມພ້ອມສູ້ຮົບທີ່ສູງຂຶ້ນ ແລະ ເປັນພາກສ່ວນທີ່ສຳຄັນຮັບປະກັນຄວາມມີສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ.

    ຜົນສຳເລັດທ່ີກອງທັບປະຊາຊົນລາວ ຍາດມາໄດ້ໃນໄລຍະຜ່ານມາ ແມ່ນຜົນມາຈາກການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດຢ່າງຖືກທິດ ພ້ອມທັງສອດຄ່ອງກັບສະພາບເງື່ອນໄຂຈຸດພິເສດຂອງກອງທັບ, ເປັນໝາກຜົນຂອງການບຸກບືນຜ່ານຜ່າດ້ວຍຄວາມມານະອົດທົນ, ເດັດດ່ຽວໜຽວແໜ້ນດ້ວຍຄວາມສາມັກຄີເປັນປຶກແຜ່ນຂອງຄະນະພັກ, ຄະນະບັນຊາ, ສະມາຊິກພັກ, ພະນັກງານນັກຮົບໃນທົ່ວກອງທັບທີ່ຕັ້ງໜ້າທຸມເທເຫື່ອແຮງ, ສະຕິປັນຍາເຂົ້າໃນການຈັດຕັ້ງປະຕິ ບັດແນວທາງນະໂຍບາຍປ່ຽນແປງໃໝ່ຮອບດ້ານທີ່ມີຫລັກການຂອງພັກເຮົາ.

KPL